अमेरिकेत दहशतवादी हल्ला, इस्रायली दूतावासातील दोन कर्मचाऱ्यांवर गोळ्या घालून संपवलं, घटनेने खळबळ.

अमेरिकेतील इस्रायली दूतावासावर मोठा हल्ला करण्यात आला आहे. यामध्ये दोन कर्मचाऱ्यांची हत्या करण्यात आली आहे. बुधवारी रात्री येथे गोळीबार करण्यात आला, त्यात या दोन कर्मचाऱ्यांचा मृत्यू झाला आहे.अमेरिकेतील इस्रायली दूतावासातील दोन कर्मचाऱ्यांची गोळ्या घालून हत्या करण्यात आली आहे. वॉशिंग्टन डीसीमधील कॅपिटल ज्यू म्युझियमजवळ ही घटना घडल्याची माहिती आहे. या घटनेनंतर पोलिसांनी तात्काळ घटनास्थळ गाठून तपास सुरू केला आहे. सध्या पोलिसांकडून संशयिताचा शोध सुरू आहे. अमेरिकेत वाढत्या इस्रायल-पॅलेस्टाईन वादाच्या पार्श्वभूमीवर ही घटना घडली आहे, ज्यामुळे ज्यू समाजात भीतीचे वातावरण निर्माण झालं आहे.
बुधवारी (21 मे) रात्री कॅपिटल ज्यू म्युझियमजवळ वॉशिंग्टन डीसीमधील इस्रायली दूतावासातील दोन कर्मचाऱ्यांची हत्या करण्यात आल्याचे होमलँड सिक्युरिटी सेक्रेटरी क्रिस्टी नोएम यांनी सांगितलं.

जवळजवळ एक वर्षापासून सुरु असलेल्या पॅलेस्टिनी समर्थकांचं निदर्शन आणि इस्रायलविरोधानंतर अमेरिकेत अशी ही पहिलीच घटना घडली आहे. सोशल मीडियावर असा दावा केला जात आहे की, पॅलेस्टिनी कैफिया घालून एक संशयित संग्रहालयात येताना दिसला आहे.”वॉशिंग्टन डीसीमधील ज्यू संग्रहालयाजवळ आज रात्री दोन इस्रायली दूतावास कर्मचाऱ्यांची निर्दयीपणे हत्या करण्यात आली. आम्ही तपास करत आहोत आणि अधिक माहिती मिळण्याची वाट पाहत आहोत,” असे नोएमने एक्सवरील पोस्टमध्ये म्हटले आहे.पोलिसांनी सांगितले की त्यांनी घटनेचा तपास सुरू केला आहे. संग्रहालयापासून थोड्या अंतरावर असलेल्या एफबीआय कार्यालयाजवळ ही गोळीबाराची घटना घडली आहे. त्यांनी असेही सांगितले की इस्रायली दूतावास या प्रकरणात कायदा अंमलबजावणी अधिकाऱ्यांसोबत मिळून काम करत आहे.इस्रायली राजदूत या घटनेत सहभागी नव्हते आणि गोळीबाराच्या घटनेवेळी ते घटनास्थळी नव्हते, असं इस्रायली दूतावासाच्या प्रवक्त्याने सीएनएनला सांगितलं.

अमेरिकेचे अॅटर्नी जनरल पाम बोंडी यांनी सोशल मीडियावर माहिती देताना सांगितलं की, ते आणि डीसीच्या कार्यवाहक अमेरिकन अॅटर्नी जीनिन पिरो कॅपिटल ज्यूइश म्युझियमच्या बाहेर झालेल्या गोळीबाराच्या ठिकाणी पोहोचले आहेत.अमेरिकेत वाढत्या ज्यू-विरोधी घटनांमुळे ज्यू आणि इस्रायल समर्थक लोकांमध्ये भीती निर्माण झाली आहे. 20 लाख गाझा लोकसंख्येला उपासमारीत ढकलल्याबद्दल आणि नरसंहार केल्याबद्दल अमेरिकेत इस्रायलचा विरोध वाढला आहे.अमेरिकन ज्यू कमिटीचे सीईओ टेड ड्यूश म्हणाले, “कार्यस्थळाबाहेर अकल्पनीय हिंसाचार घडला हे पाहून आम्हाला धक्का बसला आहे. सध्या, नेमके काय घडले याबद्दल पोलिसांकडून अधिक माहिती मिळण्याची आम्ही वाट पाहत आहोत. आमच्या संवेदना पीडितांच्या कुटुंबासोबत आहेत.”