आधी ढाब्यावरच्या मटण बिर्याणीचा फटका, आता कोर्टाचा झटका; गजा मारणेला मोठा धक्का.

गजानन मारणेने जामीन मिळण्यासाठी ॲड. विजयसिंह ठोंबरे यांच्यामार्फत विशेष न्यायालयात अर्ज केला होता. या गुन्ह्यात ‘मकोका’चे कलम लागू होत नसल्याचं म्हटलं होतं. कोथरूडमधील आयटी कर्मचाऱ्याला मारहाण केल्याप्रकरणी महाराष्ट्र संघटित गुन्हेगारी नियंत्रण कायद्यानुसार- मकोका- दाखल गुन्ह्यात मुख्य आरोपी गजा मारणेचा जामीन अर्ज विशेष न्यायालयाने फेटाळला. या गुन्ह्याचा तपास सुरू असल्याचे नमूद करत विशेष न्यायाधीश व्ही. आर. कचरे यांनी हा आदेश दिला. दरम्यान, या प्रकरणी गजा मारणे, रूपेश मारणेसह एकूण दहा आरोपींविरोधात आरोपपत्र दाखल करण्यास 30 दिवसांची मुदतवाढ देण्यात आली आहे.कोथरूडमधील भेलकेनगर येथे मारणे टोळीतील सराईतांनी देवेंद्र जोग नावाच्या तरुणाला बेदम मारहाण केल्याची घटना 19 फेब्रुवारी रोजी सायंकाळी साडेचारच्या सुमारास घडली होती. त्याची गंभीर दखल घेत पुणे पोलिसांनी गजानन मारणे याच्यासह रुपेश मारणे, ओम तीर्थराम धर्मजिज्ञासू, किरण कोंडिबा पडवळ, अमोल विनायक तापकीर, सर्व रा.

शास्त्रीनगर, कोथरूड, आणि बाब्या उर्फ श्रीकांत संभाजी पवार, रा. वडगाव रासाई, शिरूर, या सहा जणांवर ‘मकोका’ कारवाई करण्यात आली.या गुन्ह्यात गजा मारणेला येरवडा कारागृहातून सांगली कारागृहात नेताना वाटेत ढाब्यावर मटण बिर्याणी खाऊ घालणारे बाळकृष्ण उर्फ पांड्या लक्ष्मण मोहिते, प्रदीप कंधारे, सतीश उर्फ आबा सुधाकर शिळीमकर व विशाल विलास धुमाळ यांच्यावरही या प्रकरणात गुन्हा दाखल केला आहे.या गुन्ह्यात गजानन मारणेने जामीन मिळण्यासाठी ॲड. विजयसिंह ठोंबरे यांच्यामार्फत विशेष न्यायालयात अर्ज केला होता. या गुन्ह्यात ‘मकोका’चे कलम लागू होत नसून, याबाबत उच्च न्यायालयात अर्ज केला आहे; तसेच आपल्याला मारहाण करणाऱ्या आरोपींना कोणीही चिथावणी दिली नसल्याचे प्रतिज्ञापत्र तक्रारदारांनी सादर केल्याचा युक्तिवाद बचाव पक्षाच्या वकिलांनी केला. त्याला विशेष सरकारी वकील प्रमोद बोंबटकर यांनी विरोध केला.आरोपी गजा मारणेचा गुन्ह्यात सक्रिय सहभाग असून, तक्रारदारावर दबाव आणण्याचा प्रयत्न केला जात आहे. या प्रकरणात ‘मकोका’चे कलम लागू होते. गुन्ह्याचा तपास सुरू असून, फरार आरोपींना अटक करायची आहे; तसेच आणखी आरोपी निष्पन्न होण्याची शक्यता आहे, असा युक्तिवाद विशेष सरकारी वकिलांनी केला. तो ग्राह्य धरत न्यायालयाने गजा मारणेचा जामीन फेटाळला.