माओवाद्यांचा कणा मोडला, बस्तरमध्ये म्होरक्या बसवराजू याच्यासह २७ माओवादी ठार.

बसवराजू हा प्रतिबंधित भारतीय कम्युनिस्ट पक्षाचा (माओवादी) सरचिटणीस होता. माओवाद्यांच्या केंद्रीय समितीने बसवराजू याला सरचिटणीसपदी नेमल्याचे निवेदन माओवाद्यांनी नोव्हेंबर २०१८मध्ये प्रसृत केले होते.छत्तीसगडच्या बस्तर भागात सुरक्षा दलांसोबत झालेल्या चकमकीत सुमारे २७ माओवादी ठार झाले, अशी माहिती अधिकाऱ्यांनी बुधवारी दिली. त्यात माओवाद्यांचा म्होरक्या नंबाला केशव राव उर्फ बसवराजू याचाही समावेश आहे, असे केंद्रीय गृहमंत्री अमित शहा यांनी जाहीर केले. दरम्यान, या चकमकीत राज्य पोलिस दलाची शाखा असलेल्या जिल्हा राखीव रक्षकचा (डीआरजी) एक जवान हुतात्मा झाला असून, अन्य काही जण जखमी झाले आहेत.‘माओवाद्यांविरोधातील भारताच्या तीन दशकांच्या लढाईत सुरक्षा दलांनी सरचिटणीसस्तरावरील नेत्याला ठार करण्याची ही पहिलीच घटना आहे,’ असे अमित शहा यांनी अधोरेखित केले. तर ‘चकमकीदरम्यान माओवाद्यांचा म्होरक्या मारला गेल्याने सुरक्षा दलांना ऐतिहासिक यश मिळाले आहे,’ असे एका वरिष्ठ पोलिस अधिकाऱ्याने नमूद केले. मात्र, त्यांनी अधिक तपशील दिला नाही.

बसवराजू हा प्रतिबंधित भारतीय कम्युनिस्ट पक्षाचा (माओवादी) सरचिटणीस होता. माओवाद्यांच्या केंद्रीय समितीने बसवराजू याला सरचिटणीसपदी नेमल्याचे निवेदन माओवाद्यांनी नोव्हेंबर २०१८मध्ये प्रसृत केले होते. गणपती याच्या स्थानी बसवराजूची नियुक्ती झाली होती. त्याच्यावर दीड कोटीचे बक्षीस जाहीर करण्यात आले होते.नारायणपूर-विजापूर-दंतेवाडा जिल्ह्यांच्या सीमावर्ती क्षेत्रातील अबूझमाडच्या घनदाट जंगलात ही चकमक झाली, असे वरिष्ठ पोलिस अधिकाऱ्याने सांगितले. माओवाद्यांची केंद्रीय समिती, पॉलिटब्युरो सदस्य, माड विभाग, पीपल्स लिबरेशन गुरिल्ला आर्मीचे वरिष्ठ सदस्य तिथे असल्याची माहिती गुप्तचर यंत्रणांकडून सुरक्षा यंत्रणेला मिळाली होती. त्या आधारावर नारायणपूर, दंतेवाडा, विजापूर, कोंडागावच्या डीआरजीच्या संयुक्त दलांनी मोहीम हाती घेतली. माओवाद्यांनी सुरक्षा दलांवर गोळीबार सुरू केला. यानंतर सुरक्षा दलांनीही प्रत्युत्तरादाखल कारवाई केली. आत्तापर्यंत २७ माओवाद्यांचे मृतदेह आणि मोठ्या प्रमाणात शस्त्रसाठा हस्तगत करण्यात आला आहे. गेल्या अनेक दिवसांपासून सुरू असलेल्या मोहिमेदरम्यान अनेक वरिष्ठ स्तरावरील माओवादी मारले गेल्याचा किंवा गंभीररित्या जखमी झाल्याचा अंदाज आहे. ‘या चकमकीत सुरक्षा दलांनी वरिष्ठ स्तरावरील अनेक माओवाद्यांना ठार केले,’ असे छत्तीसगडचे उपमुख्यमंत्री विजय शर्मा यांनी नमूद केले.यावर्षी छत्तीसगडमध्ये आत्तापर्यंत झालेल्या विविध चकमकींत सुमारे २०० माओवादी मारले गेले. यातील १८३ जण बस्तर भागात मारले गेले. या विभागात विजापूर, नारायणपूर, दंतेवाडा आणि कोंडागावसह सात जिल्ह्यांचा समावेश होतो.चार महिन्यापूर्वी बसवराजूच्या सुरक्षेशी संबंधित असलेल्या चार माओवाद्यांनी आत्मसमर्पण केले होते. तेव्हापासूनच सुरक्षा दले त्याच्या मागावर होत्या. माओवाद्यांचा आणखी एक मोठा नेता गणपती आणि बसव्राजू या दोघांच्याही सुरक्षेसाठी ४० जणांचा समावेश असलेली एक कंपनी तसेच सात ते आठ माओवाद्यांचे एक वैयक्तिक सुरक्षापथक सदैव तैनात असते. या व्यतिरिक्त आणखी एक बाह्य सुरक्षाकडे या दोघांच्या संरक्षणासाठी असते. या दोघांची त्रिस्तरीय सुरक्षा कशी असते, ते कशा पद्धतीने प्रवास करतात, त्यांचे वास्तव्य कोणत्या ठिकाणी अधिक असते, या सर्व गोष्टींचा अभ्यास नारायणपूर पोलिसांनी केला आणि ही सुरक्षा भेदली.