लक्षात ठेवा मला हसन मुश्रीफ म्हणतात, दम मिळताच बंड थंड, ‘गोकुळ’ अध्यक्षपदावरुन अरुण डोंगळेंचा राजीनामा.

हसन मुश्रीफ यांनी अरुण डोंगळे यांना तुम्ही आमचे फोन उचलत नाही “लक्षात ठेवा मला मुश्रीफ म्हणतात” म्हणत दम दिला. यानंतर आपण मुख्यमंत्री व उपमुख्यमंत्र्यांना भेटून राजीनामा देणार असल्याचं अरुण डोंगळे यांनी शब्द दिला.कोल्हापूर जिल्हा दूध उत्पादक संघ म्हणजे गोकुळ दूध संघात आठवडाभरापासून अध्यक्ष पदावरुन राजकीय उकळी आली आहे. सहकारच्या राजकारणात थेट राज्य पातळीवरुन, तेही मुख्यमंत्री आणि उपमुख्यमंत्र्यांनी लक्ष घातले. स्थानिक स्वराज्य संस्थांच्या निवडणुकांच्या तोंडावर गोकुळमध्ये महायुतीचा अध्यक्ष असावा, असे सांगितल्याने विद्यमान अध्यक्ष अरुण डोंगळे यांनी राजीनामा देण्यास नकार दिला होता. यानंतर गोकुळचे नेते हसन मुश्रीफ आणि सतेज पाटील यांनी तीव्र नाराजी व्यक्त करत टीका केल्यानंतर अखेर अरुण डोंगळे यांनी अध्यक्षपदाचा राजीनामा दिला आहे. त्यामुळे आता नव्या अध्यक्ष निवडीकडे सर्वांचे लक्ष लागून राहिल आहे.चार वर्षांपूर्वी निवडणुकीत काँग्रेस नेते आमदार सतेज पाटील व मंत्री हसन मुश्रीफ यांनी एकत्र येत गोकुळमधील महाडिकांच्या विरोधात असलेल्या नेत्यांना आपल्या सोबत घेऊन सत्ता उलथवून लावली.

यानंतर गोकुळचे अध्यक्ष पद दोन-दोन-एक असे वर्ष वाटून घेण्याचं ठरलं होतं. त्यानुसार सुरुवातीला काँग्रेस नेते सतेज पाटील यांच्या गटातील विश्वास पाटील यांनी सुरुवातीचे दोन वर्ष अध्यक्षपद भूषवलं. यानंतर दोन वर्ष हसन मुश्रीफ गटाचे अरुण डोंगळे अध्यक्षपद भूषवत आहेत. त्यांचा कार्यकाळ 25 मे रोजी संपणार असून त्यांना राजीनामा देण्यास दोन्ही नेत्यांनी सांगितलं होतं.राज्यात झालेल्या सत्तांतर आणि पक्षफुटीनंतर अरुण डोंगळे हे सध्या अजित पवार गट म्हणजेच महायुतीसोबत आहेत. राजीनामा मागितल्यानंतर अरुण डोंगळे यांनी मुंबईमध्ये मुख्यमंत्री व उपमुख्यमंत्र्यांची भेट घेतली. यावेळी स्थानिक स्वराज्य निवडणुकांच्या तोंडावर गोकुळमध्ये महायुतीचा अध्यक्ष असावा असे भूमिका मुख्यमंत्री व उपमुख्यमंत्र्यांनी व्यक्त करत राजीनामा देऊ नये अशा सूचना दिल्या असल्याचं सांगत अरुण डोंगळे यांनी राजीनामा देणार नसल्याच जाहीर केलं.यानंतर कोल्हापूरच्या गोकुळच्या राजकारणात राजकीय उकळी आली. आमदार सतेज पाटील आणि हसन मुश्रीफ यांनी अरुण डोंगळे यांच्यावर तीव्र शब्दात टीका करत नाराजी दर्शवली.

दरम्यान दोन दिवसांपूर्वी चंदगड येथे अरुण डोंगळे आणि हसन मुश्रीफ यांच्यामध्ये चर्चा देखील झाली. यावेळी हसन मुश्रीफ यांनी अरुण डोंगळे यांना तुम्ही आमचे फोन उचलत नाही “लक्षात ठेवा मला मुश्रीफ म्हणतात” म्हणत दम दिला. यानंतर आपण मुख्यमंत्री व उपमुख्यमंत्र्यांना भेटून राजीनामा देणार असल्याचं अरुण डोंगळे यांनी शब्द दिला.त्यानुसार अरुण डोंगळे यांनी काल मुख्यमंत्री व उपमुख्यमंत्र्यांची भेट घेतली आणि आज गोकुळचे कार्यकारी संचालक योगेश गोडबोले यांच्याकडे सकाळी आपला राजीनामा सुपूर्द केला आहे. यानंतर आता नवीन अध्यक्ष कोण होणार याकडे सर्वांचं लक्ष लागलं असून यामध्ये शशिकांत चुयेकर पाटील आणि अजित नरके यांची नावं चर्चेत आहेत. यामध्ये गोकुळची स्थापना केलेले आनंदराव चुयेकर पाटील यांना एक सर्वसामान्य चेहरा म्हणून संधी मिळणार असल्याच्या चर्चा सध्या सुरू असून त्यांचं नाव आघाडीवर असून संचालकांच्या बैठकीमध्ये नावावर शिक्कामोर्तब होण्याची शक्यता आहे.