कोल्हापुरात उपसरपंचाच्या घरी दरोडा: पत्नीची निर्घृण हत्या, पती गंभीर; दागिन्यांसह रोख रक्कम लंपास.

 कोल्हापूर जिल्ह्यातील आजरा तालुक्यातील मडिलगे गावात एक धक्कादायक घटना घडली आहे. सशस्त्र दरोडेखोरांनी उपसरपंच सुशांत गुरव यांच्या घरी दरोडा टाकला. यावेळी सुशांत यांच्या पत्नी पूजा गुरव यांचा निर्घृण खून करण्यात आला, तसेच घरातील दागिने आणि रोख रक्कम लुटून नेण्यात आली.कोल्हापूर: आजरा तालुक्यातील मडिलगे गावात रविवारी पहाटे अडीच वाजताच्या सुमारास सशस्त्र ४ दरोडेखोरांनी दरोडा टाकत उपसरपंच सुशांत गुरव यांच्या पत्नी पूजा गुरव यांचा निर्घृण खून केला. तसंच पूजा यांच्या गळ्यातील दागिने व रोख रक्कम लंपास केल्याची धक्कादायक घटना घडली असून या दरोड्यानंतर तालुक्यात मोठी खळबळ उडाली आहे. या हल्ल्यात सुशांत गुरव देखील जखमी झाले असून पोलीस या घटनेचा वेगाने तपास करत आहेत.पोलिसांकडून मिळालेली माहितीनुसार, सुशांत गुरव यांचे कोल्हापूर जिल्ह्यातील आजरा तालुक्यातील मडिलगे गावात अगदी मध्यवस्तीत घर आहे. ते स्वतः वारकरी असल्याने घरात धार्मिक वातावरण आहे. सुशांत गुरव व त्यांची पत्नी पूजा गुरव हे दोघेही आचारी म्हणून काम करत असतात. अगदी मनमिळाऊ स्वभाव असल्याने गावातील प्रत्येकजण त्यांना ओळखत होता. रविवारी रात्री अडीचच्या सुमारास सुशांत गुरव यांना लघुशंका आल्याने त्यांना जाग आली.

लघुशंकेसाठी सुशांत गुरव हे बाहेर आले असताना अज्ञात चार दरोडेखोरांनी अचानक घरात घुसले आणि इतक्यात पूजा गुरव यांचा जोरात ओरडण्याचा आवाज आला. यामुळे सुशांत गुरव हे धावत घरात गेले असता चौघेजण पूजा यांना मारहाण करत असल्याचं त्यांना दिसलं. यावेळी सुशांत गुरव यांनी प्रतिकार करण्यासाठी पुढे गेले असता त्यांना देखील जबर मारहाण करण्यात आली. पूजा गुरव यांच्या तोंडावर रुमाल दाबून धरून गळ्यातले सोने बाजूला बॅगेत असलेली रोख रक्कम काढून घेत डोक्यात धारदार शस्त्राने वार करण्यात आले. यामध्ये पूजा गुरव यांचा जागीच मृत्यू झाला, त्या घरात रक्ताच्या थारोळ्यात पडल्या होत्या.दरम्यान, सुशांत गुरव यांना देखील मोठ्या प्रमाणात मारहाण झाली होती. दरोडेखोर पळून जाताच सुशांत यांनी मुलगा सोपान व मुलगी मुक्ता या दीड वर्षाच्या मुलांना घेऊन दारात येऊन आरडाओरड केली. त्यानंतर आजूबाजूचे नागरिक मदतीसाठी धावून आले आणि पूजा गुरव यांना तातडीने आजरा ग्रामीण रुग्णालयात उपचारासाठी दाखल केल. मात्र उपचारापूर्वीच त्यांचा मृत्यू झाला होता. या घटनेची माहिती पोलिसांना कळताच सकाळी ७.३० वाजता श्वान पथकाला घटनास्थळी आणून तपास सुरू करण्यात आला. घटनेवेळी सुशांत गुरव यांची आई बाहेर गावी गेल्याने त्या थोडक्यात बचावल्या. मात्र पोलीस तपास करत असताना पाठीमागील बाजूची दरवाज्याची कडी उचकटल्याचं देखील दिसत नसल्याने तसेच तिजोरी फोडलेली दिसत नसल्याने या गुन्ह्याचा पोलीस विविध बाजूने तपास करत आहेत. या गुन्ह्याची नोंद आजरा पोलीस ठाण्यात करण्यात आली असून पोलीस ठाण्याचे पोलीस अधिकारी रामदास इंगवले, सहाय्यक पोलीस निरीक्षक नागेश यमगर आणि स्थानिक अन्वेषण शाखेचे पथक वेगाने तपास करत आहेत.