सिंहगडावर गेल्यानंतर छातीत वेदना होऊन कोसळले; पुण्यातील निवृत्त पोलीस अधिकाऱ्याच्या मृत्यूने हळहळ.

पुण्यात एक दुःखद घटना घडली. सिंहगड किल्ल्यावर फिरण्यासाठी गेलेले निवृत्त पोलीस अधिकारी राजकुमार गायकवाड यांचे हृदयविकाराच्या झटक्याने निधन झाले. ते 62 वर्षांचे होते. गायकवाड आपल्या मित्रांसोबत ट्रेकिंगसाठी गेले होते.पुणे: शहरातील किल्ले सिंहगड इथं फिरायला गेलेल्या एका निवृत्त पोलीस अधिकाऱ्याचा हृदयविकाराच्या तीव्र झटक्याने मृत्यू झाल्याची घटना समोर आली आहे. राजकुमार गायकवाड (वय 62) असं मृत्यू झालेल्या निवृत्त पोलिसाचे नाव असून या घटनेनं पोलीस दलातून हळहळ व्यक्त होत आहे.
याबाबत पोलिसांनी दिलेल्या माहितीनुसार, मूळचे पुण्यातील रहिवासी असलेले आणि सध्या मार्केट यार्ड इथं वास्तव्यास असलेले राजकुमार गायकवाड हे सिंहगड किल्ल्यावर आपल्या सहकाऱ्यांसोबत ट्रेकिंगसाठी गेले होते.

सिंहगड किल्ला चढताना अचानक त्यांच्या छातीत वेदना होऊ लागल्या. ही बाब त्यांच्या मित्रांच्या ही लक्षात आली. त्यांच्यासोबत एक डॉक्टर मित्रही होता. त्यामुळे सदर डॉक्टर मित्राने सुरुवातीला राजकुमार गायकवाड यांच्यावर तिथेच प्राथमिक उपचार केले आणि त्यानंतर त्यांना जवळच असलेल्या एका खासगी रुग्णालयात दाखल केले. मात्र उपचारापूर्वीच गायकवाड यांचा मृत्यू झाला असल्याचे डॉक्टरांकडून सांगण्यात आले. ट्रेकिंगला आपल्यासोबत आलेल्या मित्राचे निधन झाल्याचे कळताच गायकवाड यांच्या इतर सहकाऱ्यांना धक्का बसला.

राजकुमार गायकवाड हे मनमिळावू स्वभावाचे व्यक्तिमत्व होते. त्यांनी पुण्यातील अनेक पोलीस ठण्यात कामगिरी बजावली होती. स्वारगेट पोलीस ठाण्यात त्यांनी वरिष्ठ पोलीस निरीक्षक म्हणून त्यांनी जबाबदारी सांभाळली होती. तसेच त्यांनी मुंबईसारख्या ठिकाणी देखील काम केले होते. गायकवाड यांच्या जाण्याने कुटुंबावर दु:खाचा डोंगर कोसळला आहे. दरम्यान, या प्रकरणी हवेली पोलिसांनी पंचनामा करून आकस्मित मृत्यूची नोंद केली आहे. गायकवाड यांच्या निधनाने एका हरहुन्नरी व्यक्तिमत्व गेल्याची भावना त्यांच्या मित्र परिवाराकडून व्यक्त केली जात आहे.