शिक्षणमंत्र्यांसह आजी-माजी आमदारांत ‘संघर्ष’; मालेगाव महापालिकेसाठी मोर्चेबांधणी सुरु.

महापालिका निवडणुकीत राज्याचे शालेय शिक्षणमंत्री दादा भुसे, मालेगाव मध्यचे आमदार मौलाना मुफ्ती इस्माईल व माजी आमदार असिफ शेख, भाजप गटनेते सुनील गायकवाड यांच्या समर्थकांमध्ये सत्तासंघर्ष होणार आहे.सर्वोच्च न्यायालयाने सहा महिन्यांच्या आत स्थानिक स्वराज्य संस्थांच्या निवडणुका घेण्याचे आदेश राज्य शासनाला दिले आहेत. त्यामुळे मालेगाव महापालिकेच्या वर्तुळात राजकीय घडामोडींना वेग आला आहे. महापालिका निवडणुकीत राज्याचे शालेय शिक्षणमंत्री दादा भुसे, मालेगाव मध्यचे आमदार मौलाना मुफ्ती इस्माईल व माजी आमदार असिफ शेख, भाजप गटनेते सुनील गायकवाड यांच्या समर्थकांमध्ये सत्तासंघर्ष होणार आहे. मनपावर सत्ता प्रस्थापित करण्यासाठी यावेळी मोठी चढाओढ असून, त्यासाठी मोर्चेबांधणीला सुरुवात झाली आहे.

२६ जून २०२२ रोजी मालेगाव महापालिकेची मुदत संपुष्टात आली. तब्बल ३४ महिने महापालिकेवर प्रशासकराज आहे . चार वेळा प्रभाग रचना होऊन रद्द झाली. आता सर्वोच्च न्यायालयाने निवडणुका घेण्याचे आदेश दिल्यामुळे प्रभागातील राजकारण ढवळून निघाले आहे.२०१७ मध्ये चार सदस्यीय प्रभाग पद्धतीने निवडणूक झाली होती. यात २१ प्रभागातून ८४ सदस्य निवडून गेले होते . गेल्या निवडणुकीत चार सदस्यीय प्रभाग रचनेचा फायदा शिवसेना व भाजपला पश्चिम भागात झाला, तर पूर्व भागात काँग्रेस व महागठबंधन आघाडीचे विक्रमी सदस्य निवडून आले होते. ‘ एमआयएम’ला केवळ सात जागांवरच समाधान मानावे लागले.

पूर्व भागात आता माजी आमदार असिफ शेख, समाजवादी पार्टीचे मुस्तकींम डिग्निटी या निवडणुकीत एकत्र येण्याची शक्यता आहे . आमदार मौलाना मुफ्ती इस्माईल यांच्या नेतृत्वाखाली नगरसेवक पदासाठी इच्छुक रिंगणात उतरणार आहेत, तर पश्चिम भागात शिक्षणमंत्री दादा भुसे व भाजपचे नेते व मनपाचे माजी गटनेते सुनील गायकवाड यांच्या समर्थकांत चुरशीचा सामना होईल .स्त्री मतदार —१,१९,३२०,पुरुष मतदार —२,०६,१३०,एकूण मतदार —३,११,३२१,एकूण बूथ संख्या —५१६,मालेगाव क्षेत्रफळ ६४ चौरस किमीकाँग्रेस — २८,महागठबंधन — २६,शिवसेना — १३भाजप — ९,एमआयएम — ७,अपक्ष — १