संजय राऊतांच्या पुस्तक प्रकाशनापूर्वीच राजकारण तापलं; कार्यक्रमातून पुन्हा करणार मोठा गौप्यस्फोट?

 शिवसेना नेते संजय राऊत यांच्या ‘नरकातला स्वर्ग’ या पुस्तकाचा प्रकाशन सोहळा आज मुंबईत आहे. या कार्यक्रमाआधीच राजकीय वातावरण तापले असून मनसे नेते संदीप देशपांडे यांनी राऊतांवर टीका केली आहे.मुंबई: शिवसेना (उद्धव बाळासाहेब ठाकरे) पक्षाचे खासदार संजय राऊत यांच्या ‘नरकातला स्वर्ग’ या पुस्तकाच्या प्रकाशन सोहळ्याचं आयोजन आज करण्यात आलं आहे. मुंबईतील रवींद्र नाट्य मंदिर सभागृहामध्ये हा प्रकाशन सोहळा पार पडणार आहे. मात्र प्रकाशनापूर्वीच संजय राऊत यांच्या ‘नरकातला स्वर्ग’ या पुस्तक प्रकाशनाच्या निमित्ताने राजकारण तापलेलं पाहायला मिळत आहे. ‘संजय राऊत हे पाकिस्तान सारखे आहेत, गुन्हे करायचे आणि विक्टिम कार्ड खेळायचं ..अरे, तुम्ही काय स्वातंत्र्यसैनिक म्हणून जेलमध्ये नव्हता गेलात, तर आर्थिक घोटाळ्याच्या आरोपाखाली गेला होता,” अशी टीका मनसेचे नेते संदीप देशपांडे यांनी केली आहे.

संजय राऊत यांनी 9 नोव्हेंबर 2022 या रोजी मुंबईतल्या ऑर्थर रोड तुरुंगातून बाहेर आल्यानंतर पहिल्यांदाच त्यावेळी पुस्तक प्रकाशनाच्या कार्यक्रमाला हजेरी लावलेली होती. निमित्त होतं ते महेश केळुसकर यांच्या ‘हसरगुंडी’ आणि ‘झेंडूची झुले’ या दोन पुस्तकांच्या प्रकाशन सोहळ्याचं. 19 नोव्हेंबर 2022 रोजी सायंकाळी दादर माटुंगा सांस्कृतिक केंद्रात या पुस्तक प्रकाशनाच्या कार्यक्रमाचे आयोजन करण्यात आलं होतं. यावेळी खासदार संजय राऊत आणि हास्य कवी अशोक नायगावकर यांची प्रमुख उपस्थिती लाभलेली होती.या पुस्तक प्रकाशन सोहळ्यातही संजय राऊत यांनी आर्थर रोड कारागृहात आलेले अनुभव कथन केलेले पाहायला मिळालेले होते. राजकीय, सामाजिक,सांस्कृतिक वर्तन विसंगतीवर भाष्य करणारा हसरगुंडी हा लेख संग्रह आहे. आर्थर रोड कारागृहामध्ये आलेले अनुभव तसेच तत्कालीन राजकीय परिस्थितीवर संजय राऊत यांनी या कार्यक्रमात आसूड ओढलेला पाहायला मिळालेला होता.
दरम्यान, खासदार संजय राऊत यांच्या ‘नरकातला स्वर्ग’ या पुस्तकाच्या प्रकाशनापूर्वीच फार मोठी चर्चा होताना दिसून येत आहे. ईडीच्या कारवाईनंतर ऑर्थर रोड कारागृहात काढलेले शंभर दिवसांचे अनुभव पाहता आजच्या पुस्तक प्रकाशन कार्यक्रमात संजय राऊत नेमके काय बोलतात? याकडे महाराष्ट्राच्या जनतेचं लक्ष लागलं आहे.