डोंगर चढताना वादळ आलं, बड्या अधिकाऱ्याचा पाय घसरला, 400 फूट दरीत कोसळून मृत्यू.

अमेरिकेत एका भारतीय वंशाच्या बड्या अधिकाऱ्याचा मृत्यू झाला आहे. विष्णू इरिगिरेड्डी असं त्यांचं नाव असून ते गिर्यारोहण करत असताना त्यांचा अपघात होऊन ते 400 फूट खोल दरीत कोसळले आणि त्यात त्यांचा मृत्यू झाला आहे.वॉशिंग्टनमधील नॉर्थ कॅस्केड्स पर्वतरांगेत झालेल्या एका भीषण दु्र्घटनेत तीन गिर्यारोहकांचा मृत्यू झाला आहे. यात भारतीय वंशाचे विष्णू इरिगिरेड्डी (Vishnu Irigireddy) यांचाही समावेश आहे. ते 48 वर्षांचे होते आणि सिएटल येथे राहत होते. ही दुर्घटना मे महिन्याच्या 11 तारखेला घडल्याची माहिती आहे.वृत्तसंस्था पीटीआयनुसार, इरिगिरेड्डी हे ग्रेटर सिएटल क्षेत्रातील चाचणी उपकरण निर्मिती कंपनी फ्लूक कॉर्पोरेशनमध्ये अभियांत्रिकीचे उपाध्यक्ष होते.विष्णू आणि त्यांच्या सोबतच्या इतर दोघांचा सुमारे 400 फूट उंचीवरून पडून मृत्यू झाला आहे. त्यांची नावं 38 वर्षीय टिम गुयेन आणि 36 वर्षीय ऑलेक्झांडर मार्टिनेंको असल्याची माहिती आहे. तर, सुदैवाने त्यांच्या गटातील अँटोन त्सेलीख (Anton Tselykh 38) नावाची व्यक्ती या दुर्घटनेत बचावली आहे. तो शुद्धीवर आल्यानंतर त्याने स्वतः 64 किलोमीटर गाडी चालवत मदत मागितली.

विष्णू इरिगिरेड्डीसह चार गिर्यारोहक नॉर्थ अर्ली विंटर्स स्पायर भागात चढाई करत होते. हा भाग गिर्यारोहकांसाठी खूप प्रसिद्ध आहे. ते खाली उतरत असताना, त्यांच्या दोरखंडाला काहीतरी अडथळा आला आणि ते सुमारे 200 फूट खाली पडले. त्यानंतर ते आणखी 200 फूट खोल दरीत कोसळले. चढाई करत असताना त्यांना वादळ येताना दिसले. त्यामुळे त्यांनी परत जाण्याचा निर्णय घेतला. ते परत खाली येऊ लागले. परंतु खाली उतरताना, ते वापरत असलेल्या अँकरमध्ये अडथळा निर्माण झाला, ज्यामुळे ते खाली पडले.अँटोन त्सेलीख नावाचा गिर्यारोहक या दुर्घटनेतून चमत्कारिकरित्या बचावला. तो शुद्धीवर आल्यानंतर त्याने स्वतःची गाडी चालवत 64 किलोमीटर अंतर पार करून या घटनेची माहिती दिली आणि मदत मागितली. त्याला डोक्याला मार लागला होता आणि अंतर्गत रक्तस्त्राव झाला होता. सध्या त्याच्यावर रुग्णालयात उपचार सुरू आहेत. यूडब्ल्यू मेडसिनच्या मीडिया रिलेशन डायरेक्टर सुझेन ग्रेग यांनी सांगितले की, “त्यांची प्रकृती स्थिर आहे, त्यांना अतिदक्षता विभागातून दुसऱ्या विभागात शिफ्ट करण्यात आले आहे.”विष्णू इरिगिरेड्डी यांच्या कुटुंबाने सांगितलं की, ते एक अनुभवी गिर्यारोहक होते, त्यांना निसर्गात आनंद मिळायचा. “त्यांच्या साहसी वृत्ती आणि जगाबद्दलच्या खोल कुतूहलासाठी ते ओळखला जायचे. विष्णू एक अनुभवी गिर्यारोहक होते ज्यांना निसर्गात आनंद आणि जगण्याचा उद्देश सापडला होता. पर्वत चढणे असो, नवीन उंच ठिकाणं एक्सप्लोर करणे असो किंवा इतरांना त्यांच्या स्वतःच्या प्रवासात प्रोत्साहित करणे असो, त्यांनी प्रत्येक आव्हानाला लक्ष केंद्रित करून तोंड दिले,” असे विष्णू यांच्या कुटुंबाने बुधवारी remembr.com वेबसाइटवर जारी केलेल्या निवेदनात म्हटले आहे, जे एक ऑनलाइन प्लॅटफॉर्म आहे.