दिवसभर वाट पाहत बसलेलो, पण…; संजय राऊतांनी तुरुंगातील अस्वस्थ करणारा दिवस सांगितला.

शिवसेना उबाठाचे खासदार संजय राऊत यांच्या नरकातला स्वर्ग पुस्तकाचं प्रकाशन आज होत आहे. पत्रा चाळ कथित घोटाळा प्रकरणात संजय राऊत यांनी फेब्रुवारी २०२२ मध्ये सक्तवसुली संचलनालयानं अटक केली.मुंबई: शिवसेना उबाठाचे खासदार संजय राऊत यांच्या नरकातला स्वर्ग पुस्तकाचं प्रकाशन आज होत आहे. पत्रा चाळ कथित घोटाळा प्रकरणात संजय राऊत यांनी फेब्रुवारी २०२२ मध्ये सक्तवसुली संचलनालयानं अटक केली. नोव्हेंबरमध्ये त्यांची सुटका झाली. तुरुंगातील दिवसातील अनुभवांवर आधारित पुस्तकाचा प्रकाशन सोहळा रविंद्र नाट्य मंदिरात संपन्न होणार आहे. या पुस्तकात गृहमंत्री अमित शहांबद्दल अनेक स्फोटक दावे करण्यात आलेले आहेत.पुस्तक प्रकाशनाच्या आधी संजय राऊत यांनी दिलेल्या मुलाखतीत आर्थर रोड तुरुंगातील दिवसांवर भाष्य केलं. तुरुंगात असताना कधी अस्वस्थ वाटलं नाही का, राजकारण सोडून निवृत्ती घ्यावी असा विचार मनात आला का, असे प्रश्न राऊत यांना विचारण्यात आला. त्यावर तसा विचार मनात कधीच आला नाही. कारण मला अडकवण्यासाठी सगळं कुभांड रचण्यात आल्याची खात्री होती, असं उत्तर राऊत यांनी दिली.

‘सगळं प्रकरण खोटं, बनावट असल्याचं मला माहीत होतं. माझ्या अटकेसाठी ते रचण्यात आलं असल्याची खात्री होती. कधी तरी मी यामधून बाहेर पडणार आहे याबद्दल मनात कोणतीही शंका नव्हती. दोन वर्षांत सुटेन असं मला वाटलं होतं. पण न्यायालयानं मला लवकर सोडलं. न्यायालयासमोर जेव्हा कागदपत्रं आली, तेव्हा त्यांनाच धक्का बसला,’ असा किस्सा राऊत यांनी सांगितला.तुरुंगात असताना अस्वस्थ कधी वाटलं, या प्रश्नालादेखील राऊत यांनी उत्तर दिलं. ‘आठ दिवसातून एकदा घरातून कोणीतरी मला तुरुंगात भेटायला यायचं. माझा भाऊ सुनील, माझ्या दोन लेकी विधिता आणि पूर्वश्री, जावई मल्हार हे मला तुरुंगात भेटायला यायचे. एकदा ते आले नाहीत. मी सकाळपासून आपल्या माणसांची वाट पाहत होतो. पण सुनील आला नाही. त्याच्यासोबत हे सगळे कुटुंबीय यायचे. ते आले नाहीत. तेव्हा मी अस्वस्थ झालो. हे आले का नाहीत, असा प्रश्न पडला. तुरुंगात असताना आपल्याला बाहेरचं काही समजत नाही, काही कळत नाही. ते का आले नसावेत, असा प्रश्न पडला. बाहेर काही समस्या निर्माण झाली आहे का? घरी काही झालं आहे का? अशा विचारांनी मी त्या दिवशी खूप अस्वस्थ झालो होतो,’ असा किस्सा राऊत यांनी सांगितला.’तो गुरुवारचा दिवस होता. सगळ्या कैद्यांचे कुटुंबीय त्यांना भेटायला आले होते आणि माझं कोणी आलं नाही. त्याबद्दल माझ्या मनात अस्वस्थता होती. पण संध्याकाळी मला निरोप आला की सुनील कायदेशीर कामासाठी दिल्लीला गेलेला आहे. त्यामुळे तो आला नाही. घरातील कोणी येऊ शकलं नाही, असा निरोप मला संध्याकाळी मिळाला आणि हायसं वाटलं,’ अशा शब्दांत राऊत यांनी तुरुंगातील आठवण कथन केली.