दारुपार्टी, एकत्र जेवले अन् मग पाच जणांनी मिळून तरुणाला संपवलं, ‘त्या’ एका कृत्याने केला घात, पुणे हादरलं.

पिंपरी- चिंचवड परिसर हत्येच्या गुन्ह्याने पुन्हा एकदा हादरला आहे. येथे पाच जणांनी मिळून एकाची हत्या केली आहे. पैशांच्या वादातून ही हत्या झाल्याची माहिती आहे. सध्या पोलीस या प्रकरणाचा तपास करत आहेत. पिंपरी- चिंचवड पुन्हा एकदा हत्येच्या घटनेने हादरलं आहे. पिंपरी- चिंचवड परिसरातील मोशी येथील ग्रँड हॉटेलसमोर आज शनिवार (17 मे) पहाटे तीन वाजताच्या सुमारास आर्थिक वादातून एका तरुणाची हत्या झाल्याची घटना समोर आली आहे. या तरुणाची धारधार शस्त्रने वार करून हत्या करण्यात आली आहे. याप्रकरणी पोलिसांनी पाच जणांवर गुन्हा दाखल करत त्यांना ताब्यात घेतलं आहे.ज्ञानेश्वर बर्गे असं खून झालेल्या व्यक्तीचं नावं असल्याची माहिती समोर आली आहे.

या प्रकरणी अशोक म्हाळसकर, रोहन म्हाळसकर, प्रसाद म्हाळसकर, अमोल निळे आणि संकेत जैद या पाच जणांवर गुन्हा दाखल करण्यात आला असून, त्यांना भोसरी एमआयडीसी पोलिसांनी ताब्यात घेतल्याची माहिती आहे. सध्या या प्रकरणाचा तपास सुरु आहे.याबाबत भोसरी एमआयडीसी पोलिसांनी दिलेल्या अधिक माहितीनुसार, अशोक म्हाळसकरकडे ज्ञानेश्वरच्या मानलेल्या दाजीचे पैसे होते. या पैशांसाठी ज्ञानेश्वर सातत्याने तगादा लावत होता. मध्यरात्री अशोक आणि ज्ञानेश्वर यांनी एकत्र मद्यपान आणि जेवण केले. यावेळी पैशांवरून त्यांच्यात किरकोळ वाद झाला. या वादादरम्यान, ज्ञानेश्वरने अशोकच्या कानशिलात लगावली, जे अशोकला सहन झालं नाही. रागाच्या भरात त्याने आपल्या भावांना आणि इतर साथीदारांना फोन करून बोलावून घेतले. त्यानंतर पहाटे तीनच्या सुमारास म्हाळसकर बंधूंसह इतर दोघांनी मिळून ज्ञानेश्वरवर कोयत्याने सपासप वार करून ज्ञानेश्वरची हत्या केली.ही संपूर्ण घटना परिसरातील सीसीटीव्ही कॅमेऱ्यात कैद झाली आहे. ज्यामुळे पोलिसांना तपासात मदत झाली. घटनास्थळावरून पोलिसांनी हत्येत वापरलेले कोयते आणि इतर पुरावेही जप्त केले आहेत. भोसरी एमआयडीसी पोलीस या प्रकरणाचा सखोल तपास करत असून, आरोपींची कसून चौकशी सुरू असल्याची माहिती आहे. या घटनेमुळे मोशी परिसरात खळबळ उडाली असून, स्थानिकांमध्ये भीतीचे वातावरण पसरले आहे.