घरातील लग्नसोहळा उरकून येताना शिक्षकाचा अपघातात जागीच मृत्यू, कारने २० फूट फरफरटत नेलं, बुलढाण्यात हळहळ.

बुलढाणा जिल्ह्यातील साखरखेर्डा-लव्हाळा रस्त्यावर भीषण अपघात झाला. एका लग्न समारंभातून परतत असताना, भरधाव कारने दुचाकीला धडक दिल्याने वैभव टाले नावाच्या एका तरुण शिक्षकाचा जागीच मृत्यू झाला. ही घटना रात्री साडे अकराच्या सुमारास घडली. वैभव देऊळगाव राजा पंचायत समितीमधील जांभोरा शाळेत शिक्षक म्हणून कार्यरत होते. त्यांच्या पश्चात आई, पत्नी, दोन भाऊ आणि मुलगी असा परिवार आहे.सध्या सर्वत्र लग्नसराईची धामधूम धडाका सुरू आहे. लग्नाचं शुभकार्य उरकून घरी जाताना एका तरूण शिक्षकाचा कारच्या धडकेत दुर्दैवी मृत्यू झाला आहे. बुलढाणा जिल्ह्यातील साखरखेर्डा लव्हाळा रस्त्यावर रात्री साडेअकरा वाजता च्या सुमारास मोटरसायकल आणि कारची समोरसमोर धडक झाल्याने एका युवक शिक्षकाचा जागीच मृत्यू झाल्याची दुर्दैवी घटना घडली.मृतकाचे नाव वैभव दामोदर टाले वय वर्ष 27 वर्ष राहणार मलकापूर पांगरा. लग्न तिथी दाट असल्याने प्रत्येक व्यक्ती लग्न सोहळ्यात सहभाग घेण्यासाठी बाहेरगावी लग्न असलेल्या ठिकाणी जाऊन पुन्हा परत काही गडबडीत फिरत असतात.

त्यामुळे ग्रामीण भागातील रस्त्यासह इतर रस्त्यावर वर्दळ वाढलेली आहे. गोरेगाव येथील शेळके कुटुंबातील लग्न सोहळा साखरखेर्डा येथील एका मंगल कार्यालयात आयोजित करण्यात आला होता .मावशीच्या मुलीचे लग्न असल्यामुळे मलकापूर पांगरा येथील टाले कुटुंबातील सर्व सदस्य लग्न करतात हजर होते. यासाठी मलकापूर पांगरा येथील वैभव दामोदर टाले वय वर्ष 27 वर्ष हाही कुटुंबास हजार होता . लग्न लागल्यानंतर वैभव हा सारशीव गावा कडे निघाला. साखरखेर्डा ते लव्हाळा रस्त्यावर मोहखेड शिवारातील पंजाबराव ताठे यांच्या शेताजवळ हा भीषण अपघात झाला.लव्हाळा येथून साखरखेडा येथे MH 38 AD 3803 या भरधाव वेगाने आलेल्या कारने जबर धडक दिली. तब्बल वीस फूट मोटरसायकल फरफटत कारने नेली. तर वैभवच्या डोक्याला जबर मार लागल्याने रक्तस्त्राव झाला. याचवेळी अशोक इंगळे आणि सरपंच नितीन ठोसरे हे चिखली येथून एक लग्न सोहळा करून साखरखेडा येथे येत होते. त्यांनी वैभवला रस्त्याच्या कडेला पडलेले पाहिले. तात्काळ याची माहिती साखरखेडा पोलीस स्टेशनला देण्यात आली.

ठाणेदार गजानन करेवाड यांनी बीतजमादार रामदास वैराळे यांना घटनास्थळी पाठविले. यावेळी वरोडी येथील सुमेध गवई,कृषी उत्पन्न बाजार समितीचे संचालक दिलीप बेंडमाळी घटनास्थळी मदतसाठी धावून आले. हा अपघात एवढा भीषण होता की वैभव टाले याचा जागीच मृत्यू झाला.वैभव हा देऊळगाव राजा पंचायत समितीमधील जांभोरा येथील जिल्हा परिषद प्राथमिक शाळेवर शिक्षक म्हणून कार्यरत होता. वडिलांचे छत्र लहानपणी हरवल्याने तीन भावांना आई शिक्षण देत मोठे केले. तिघेही शासकीय सेवेत कार्यरत आहेत. वडील हे जिल्हा परिषद प्राथमिक शिक्षक होते. त्यांच्या अकस्मित मृत्यू झाल्याने अनुकंपा तत्त्वावर वैभव हा शिक्षक म्हणून लागला होता. परंतु त्याचा असा दुर्दैव मृत्यू झाल्याने हळहळ करण्यात येत आहे. त्याच्यामागे आई दोन भाऊ, पत्नी आणि एक मुलगी असा परिवार आहे.