परंपरागत विरोधकाला नेतृत्व सोपवलं, छत्रपतीच्या नथीतून बारामतीचे राजकारण सेफ करण्याचा अजित पवारांचा चंग.

प्रतिष्ठा पणाला लागलेल्या या घरच्या पिचवर अजित पवारांनी अत्यंत संयमाने या निवडणुकीतील क्लिष्टता सोडवली.इंदापूर तालुक्यातील छत्रपती सहकारी साखर कारखान्याच्या संचालक मंडळाची पंचवार्षिक निवडणूक येत्या 18 मे रोजी होणार असून 19 मे रोजी मतमोजणी होणार आहे. थेट परंपरागत विरोधकालाच नेतृत्व सोपवून राजकारणाच्या बेरजेचे अजब गणित खेळलेल्या अजित पवारांनी या निवडणुकीच्या माध्यमातून नवा राजकीय अध्याय उभारला आहे. या निवडणुकीत त्यांच्या पॅनेलचे तब्बल 8 उमेदवार अगोदरच निवडून आल्यात जमा आहेत. विजयाची औपचारिकता शिल्लक असलेल्या या निवडणूकीतून अजित पवार राज्याला मोठा संदेश देतील.
प्रतिष्ठा पणाला लागलेल्या या घरच्या पिचवर अजित पवारांनी अत्यंत संयमाने या निवडणुकीतील क्लिष्टता सोडवली. छत्रपती कारखान्याची यंदाची निवडणूक पूर्ण अवघड असून यामध्ये विरोधकांशी शरद पवार गटाने हातमिळवणी केली, तर आपल्याला मोठा धक्का बसणार याची कल्पना अजित पवारांना आली होती. त्यामुळेच त्यांनी परंपरागत व बलाढ्य ताकद असलेल्या पृथ्वीराज जाचक यांना सोबतीला घेतले.केवळ सोबतीला नाही, तर जाचक यांनी लढाईची तयारी करायला आयोजित केलेल्या मेळाव्यात स्वतःहून हजेरी लावत याच मेळाव्यात आपल्या नेतृत्वाखालील संचालक मंडळाचेच वाभाडे काढले आणि पुढील पाच वर्षे तुम्हीच अध्यक्ष, असा निर्णय जाहीर करीत सर्वांनाच धक्का दिला.

अर्थात त्यानंतर मात्र यथावकाश आपल्याच राजकारणाचे पत्ते उघड करीत आपले वर्चस्व या संचालक मंडळात राहील असेही राजकारण खेळण्यात अजितदादा यशस्वी ठरले. त्यांच्या या अनाकलनीय राजकारणात त्यांच्या पथ्यावर पडलेल्या गोष्टी म्हणजे लोकसभेत फॉर्मात आलेल्या शरद पवारांच्या राष्ट्रवादी पक्षाला उमेदवारीत स्थान सोडा, मैदानच सोडावे लागले, कारण सुप्रिया सुळे यांनी कोणताही पुढील विचार न करता जाचक यांना थेट पाठिंबा दिल्याने त्यांच्या कार्यकर्त्यांची ऐनवेळी मोठी गोची झाली. लढावे की शस्त्र टाकावे हेच त्यांना कळेना. त्यांनी उमेदवार यादीत एकालाही स्थान न मिळाल्याने थेट माघार घेतली.ना विरोध ना समर्थन अशी संदिग्ध भूमिका घेत त्यांनी मैदान सोडले. इकडे या बिनविरोध करण्याच्या प्रक्रियेत समोरील पॅनेलला उमेदवार मिळू नयेत याची तजवीज केली. यात परंपरागत वर्चस्व असलेल्या दुसऱ्या घोलप गटालाही वाऱ्यावर सोडले, त्यांनी आयत्या वेळी विरोधकांच्या तंबूत धाव घेतली खरी, मात्र तोपर्यंत खेळ खल्लास झाला होता.

छत्रपती कारखान्याची अवस्था अत्यंत अडचणीत आहे, गेल्या पंधरा वर्षात या कारखान्याची आर्थिक स्थिती दयनीय झाली आहे, याची जबाबदारी अर्थातच अजित पवार व त्यांचे सहकारी दत्तात्रेय भरणे यांचीच आहे, त्यामुळे या निवडणुकीत सभासदांची कमालीची नाराजी होती. या नाराजीचा परिणाम येणाऱ्या माळेगाव व सोमेश्वर कारखान्यातही होईल हे आधीच जाणून अजित पवार यांनी हे माघारीचे राजकारण खेळण्याचा निर्णय घेतला आणि त्यात ते यशस्वीदेखील झाले.येत्या 18 मे रोजी या कारखान्याच्या संचालक मंडळासाठी मतदान होणार आहे. 21 जागांसाठी मतमोजणी दुसऱ्या दिवशी म्हणजे 19 मे रोजी होणार आहे. प्रचाराच्या अंतिम टप्प्यात अजित पवार सांगता सभेसह चार सभा घेणार आहेत. पृथ्वीराज जाचक यांच्यावर धुरा सोपवल्याने अजित पवारही निर्धास्त झाले आहेत. त्यांची होणारी दमछाक त्यांनी टाळली आहे. मात्र स्वपक्षातील कार्यकर्त्यांची नाराजी मात्र ओढवून घेतली असून गेल्या दोन दिवसांपासून अजित पवार आपल्या पक्षातील कार्यकर्ते, नेत्यांची समजूत स्वतः काढत आहेत. कारखान्यासाठी भावनिक आवाहन हेच सध्याच्या कारखान्याच्या निवडणुकीतील महत्वाचे अस्त्र ठरले आहे.अजित पवारांना आव्हान देण्याचे काम भाजप नेते तानाजी थोरात यांनी कारखान्याचे माजी अध्यक्ष अविनाश घोलप व शिक्षण संस्थेचे माजी अध्यक्ष मुरलीधर निंबाळकर यांना बरोबर घेऊन केले खरे, मात्र पॅनेलमध्ये स्थान मिळालेले उमेदवारच जेव्हा प्रचार सोडून अजित पवारांना पाठिंबा देऊ लागले, तेव्हा त्यांचा आत्मविश्वास डळमळीत झाला. आता विरोधक किती मतांची बेगमी करतात यावर अजित पवार व दत्तात्रेय भरणे यांच्या नेतृत्वाखालील पॅनेलचा किती मतांनी विजय हे गणित ठरेल.