चिमुरडीच्या आईचे छत्र हरपले, दारुड्या बापाने छळले; मुलीला गाईच्या गोठ्यात बांधले अन् फळांच्या साली खायला…

जन्मताच गतिमंद असलेल्या ५ वर्षीय चिमुकली आपल्या आईच्या मायेला मुकली. त्यानंतर मात्र दारुड्या बापाने चिमुकलीला गोठ्यात बांधून तिचा छळ सुरू केला.जन्मताच गतिमंद असलेल्या ५ वर्षीय चिमुकली आपल्या आईच्या मायेला मुकली. त्यानंतर मात्र दारुड्या बापाने चिमुकलीला गोठ्यात बांधून तिचा छळ सुरू केला. खाण्यासाठी अक्षरशः केळी, टरबुजाच्या साली खायला दिल्या. हा छळ बघून एक मायेचा पाझर फुटल्याने चिमुकलीची नरकयातनेतून सुटका झाली आहे. छत्रपती संभाजीनगर येथील दामिनी पथकाच्या माध्यमातून सहा महिन्यानंतर मुलीचे पुनर्वसन करण्यात आले आहे.दामिनी पथकाच्या माहितीनुसार, बीड जिल्ह्यातील गेवराई येथील ५ वर्षीय सानिया (नाव काल्पनिक आहे) गतिमंद आहे. तिच्या आईचे निधन झाले. व्यसनाधीन वडिलांना सानिया डोईजड झाली. यामुळे तिचा नैसर्गिक मृत्यू व्हावा या उद्देशाने निर्दयी वडिलांनी सानियाचा छळ सुरू केला.

यासाठी सानियाला गाईच्या गोठ्यात पायाला बांधून ठेवले. तिला खाण्यासाठी अक्षरशः खाऊन टाकलेल्या केळी, टरबूजच्या साली दिल्या जात होत्या. दरम्यान पैठण येथील हिना या माहेरी गेल्या होत्या. त्यावेळी त्यांना लहान मुलीचा रडण्याचा आवाज येत होता. हा आवाज कुणाचा आहे याची माहिती घेतली असता सानिया गतिमंद असल्यामुळे वडील तिचा छळ करतात ही माहिती त्यांना समजली.सानियाची अवस्था त्यांना बघवली नाही. त्यांनी तिच्या वडिलांना का छळ करत असे विचारले. यावर तो बाप म्हणाला मग काय करणार, असा प्रश्न उपस्थित केला. आतोनात छळ बघून हिना यांना मायेचा पाझर फुटला. मी मुलीला दत्तक घेते, असं सांगून हिना यांनी बाँड करून दत्तक घेतल्याने मुलीची नरकयातनेतून सुटका झाली आहे. मानवी सहवास न लाभल्याने त्या चिमुरडीची शारीरिक आणि बौद्धिक वाढ झाली नाही.

यामुळे सुटकेनंतर हिना यांच्या घरी आलेल्या सनियाच्या वागण्यात मोठा बदल झाला. सानिया घरात कुणालाही मारहाण करत व आदळआपट करत होती. यामुळे हिना यांनी सानियाला हज हाऊसजवळील खालील अहमद यांच्या अनाथाश्रमात नेऊन सोडले. मुलीची अवस्था पाहून खालील यांनी तिच्यावर योग्य ते उपचार केले. मात्र खालीद त्यांच्या आश्रमात फक्त मुलेच असल्यामुळे त्यांनी ही माहिती दामिनी पथकाला दिली.दामिनी पथकाला घटनेची माहिती मिळताच उपनिरीक्षक कांचन मिरधे, अंमलदार निर्मला निंभोरे, लता जाधव सरिता कुंडारे, अंबिका दारुंटे, प्रियंका भिवसने, मनीषा बनसोडे, पूजा जाधव हे सर्व पथक आश्रमात पोहोचले. कायदेशीर बाजू तपासून दामिनी पथकाने सानिया हिचे पुनर्वसन केले आहे.