महाकालचं दर्शन घेऊन घराकडे निघाले, वाटेत भीषण अपघात, इस्त्रोत शास्त्रज्ञ असलेल्या मुलासह आई-वडिलांचा मृत्यू.

बुलढाण्यात कार आणि ट्रकमध्ये भीषण अपघात झाला. या अपघातात इस्त्रोच्या एका शास्त्रज्ञाचा त्याच्या आई-वडिलांसह मृत्यू झाला आहे. हे कुटुंब नांदेडचं राहणारं असून ते महाकालच्या दर्शनावरुन परतत असताना हा अपघात झाला. मध्य प्रदेशातील उज्जैन येथून नांदेडला परतत असताना कार नादुरुस्त ट्रकवर धडकली. या भीषण अपघातात आई, वडील व मुलाचा मृत्यू झाला आहे. तर पाच जण गंभीर जखमी झाले. मुंबई-नागपूर राष्ट्रीय महामार्गावर नांदुरा तालुक्यात खातखेड फाट्याजवळ मंगळवारी पहाटे २ वाजताच्या सुमारास हा अपघात झाला.देवराव गंगाराम पवार (वय ६०), बबिता देवराव पवार (वय ५५), निकेतन देवराव पवार (वय २६) अशी मृतांची नावे आहेत. मोनिका देवराव पवार, प्रियंका देवराव पवार, भूमिका रामराव पवार, हितांशी जीवन राठोड व कारचालक संतोष भगवान कदम हे गंभीर जखमी झाले असून, त्यांच्यावर रुग्णालयात उपचार सुरू आहेत.

मिळालेल्या माहितीनुसार, निकेतन देवराव पवार हे भारतीय अंतराळ संशोधन संस्थेत (ISRO) शास्त्रज्ञ म्हणून कामाला होते. ते नुकतेच इस्त्रोमध्ये रुजू झाले होते. ते सुट्टीवर घरी आले होते आणि आपल्या कुटुंबासोबत महाकालच्या दर्शनाला उज्जैनला गेले होते. तेथून परतत असताना हा भीषण अपघात झाला.नांदेड जिल्ह्यातील माहूर तालुक्यात येणाऱ्या लोकरवाडीचे रहिवासी असलेले पवार कुटुंबीय देवदर्शनासाठी उज्जैन येथे गेले होते. परतीच्या प्रवासात असताना नांदुरा तालुक्यातील खातखेड फाट्याजवळ मंगळवारी पहाटे दोन वाजताच्या सुमारास भरधाव एमएच-२६-सीई-६२४५ क्रमांकाची इर्टिगा कार एमपी-०९-डीएम-१३६२ क्रमांकाच्या उभ्या ट्रकवर धडकली. या भीषण अपघातात तिघांचा बळी गेला.

तर एकाच कुटुंबातील चार महिलांसह चालकाची प्रकृती चिंताजनक आहे.अपघातप्रकरणी नीलेश आदुसिंग राठोड रा. नाईकनगर (हेटी, ता. आर्णी) यांच्या फिर्यादीवरून नांदुरा पोलिसांनी ट्रकचालकाविरुद्ध भारतीय न्याय संहिता २८१, १०६ (१), १२५ (अ) (३), ३२४(४), ३२३ (५) तसेच मोटार वाहन कायदा १८४, १३४/१७७, १२२/१७७ कलमान्वये गुन्हा दाखल केला आहे. घटनेचा अधिक तपास पोलिस निरीक्षक विलास पाटील करीत आहेत.टायर रिमोल्डींग पट्टा निघाल्याने चालकाने कोणत्याही प्रकारची सुरक्षितता न बाळगता दुसऱ्यांच्या जीवाला धोका होईल अशा पद्धतीने ट्रक रस्त्याच्या मध्यभागी उभा केला होता. वाहनाला कुठलेही इंडिकेटर चालू ठेवले नव्हते. त्यामुळे कारचालकाला समोरील वाहन दिसू शकले नाही. ट्रकचालकाच्या हलगर्जीने तिघांचा जीव गेल्याची माहिती सूत्रांनी दिली.