जिगरबाज आर्यची ‘असाध्य’ यशाला गवसणी; दुर्मीळ आजाराशी सामना करीत दहावीत मिळविले ९६ टक्के.

वयाच्या दीड वर्षापासून स्पायनल मस्क्युलर अ‍ॅट्रॉफी या अशाच असाध्य आजाराशी दोन हात करणाऱ्या आर्य ठोके या जिगरबाज विद्यार्थ्यांने दहावीत ९६ टक्के गुण मिळवून ‘असाध्य’ यशाला गवसणी घालत कौतुकास्पद कामगिरी केली आहे.आपला आजार कधीच बरा होणार नाही याची पूर्ण जाणीव असणाऱ्या आणि आपली आयुर्मर्यादा नेमकी किती याचा कोणताच अंदाज नसणाऱ्या व्यक्तीसाठी आयुष्य हीच मोठी परीक्षा असते! वयाच्या दीड वर्षापासून स्पायनल मस्क्युलर अ‍ॅट्रॉफी या अशाच असाध्य आजाराशी दोन हात करणाऱ्या आर्य ठोके या जिगरबाज विद्यार्थ्यांने दहावीत ९६ टक्के गुण मिळवून ‘असाध्य’ यशाला गवसणी घालत कौतुकास्पद कामगिरी केली आहे.
‘माझ्या क्षमता मला माहिती आहेत. त्या वाया जाऊ नयेत, यासाठी मी नेहमीच प्रयत्न करतो. तसाच प्रयत्न मी दहावीच्या परीक्षेसाठी केला,’ असा दृष्टिकोन असणारा आर्य ठोके आज त्याच्या कुटुंबासह शाळेचाही अभिमान बनला आहे. दुसरीपासून कधीही शाळेत न जाता केवळ स्वयंअध्ययनाद्वारे आर्यने दहावीत ९६ टक्के मिळविले आहेत.

उत्तरानगर परिसरात राहणाऱ्या योगेश आणि सुप्रिया ठोके यांचा तो मुलगा असून, वडील व्यावसायिक आहेत, तर आई गृहिणी आहे.स्पायनल मस्क्युलर अ‍ॅट्रॉफी हा आजार आपल्या मुलाला असल्याचे समजल्यानंतर आर्यच्या कुटुंबीयांनी त्याच्या उपचारांसाठी अनेक प्रयत्न केले. पण, या आजारावर जगभरात कोणतेही उपचार नसल्याचे समजल्यानंतर त्याच्या कुटुंबाने आहे त्या परिस्थितीत आर्यची जडणघडण सुरू केली. त्याच्यात आत्मविश्वास निर्माण करण्यासह परिस्थितीला तोंड देत शंभर टक्के योगदान देण्याचा दृष्टिकोन विकसित केला. त्याच्याच जोरावर हे यश मिळविणारा आर्य अनेक विद्यार्थ्यांसाठी प्रेरणा बनला आहे.स्पायनल मस्क्युलर अ‍ॅट्रॉफी एक आनुवंशिक आजार आहे. यामध्ये मेंदूकडून शरीरातील स्नायूंना सूचना मिळणे हळूहळू बंद होते. त्यामुळे त्या अशा बहुतांश व्यक्तींचे स्नायू कमकुवत होताच. त्याचा परिणाम संबंधित व्यक्तीच्या शारीरिक हालचालींवर होतो.

हा आजार असलेल्या व्यक्तींना कालांतराने कोणतीही हालचाल करता येत नाही. शारीरिकदृष्ट्या ते पूर्णतः परावलंबी असतात. त्यांची आयुर्मर्यादाही सामान्य व्यक्तींपेक्षा कमी असते.इयत्ता दुसरीपासून शाळेत न जाता होम स्कूलिंगद्वारे आर्यने घरीच अभ्यास सुरू ठेवला. रवींद्रनाथ इंग्लिश मीडियम स्कूलच्या माध्यमातून त्याने दहावीची परीक्षा दिली. यामध्ये त्याला लेखनिक म्हणून सहाय्य मिळाले अनिता देवासे या नववीच्या विद्यार्थिनीचे. आपल्या क्षमतांची जाणीव असणाऱ्या आणि या क्षमता सिद्ध करण्यासाठी असाध्य आजाराचा अडथळा झुगारणाऱ्या आर्यने या यशाच्या जोरावर फिजिक्स विषयात संशोधन करण्याचा निर्णय घेतला आहे. आपले हे ध्येय आपण नक्कीच साध्य करू, असे तो आत्मविश्वासाने सांगतो.