‘मुसळधार’ ठरला काळ! नाशिक जिल्ह्यात पावसाचे चार बळी, २१ मिलिमीटरची नोंद, आजही यलो अलर्ट.

भरदुपारी कोसळलेल्या पावसामुळे नागरिकांची तारांबळ उडून सलग दुसऱ्या दिवशी शहरासह उपनगरांतील जनजीवन विस्कळीत झाले. दरम्यान, अवकाळीचे हे संकट अजून दोन दिवस राहण्याचा हवामान विभागाचा अंदाज आहे. जिल्ह्यात विजांच्या कडकडाटासह सुरू असलेल्या अवकाळी पावसाने सोमवारी चार जणांचा बळी घेतला. शहरात पडून दोन दुचाकीस्वार तरुण, तर सुरगाण्यात विजेचा शॉक लागून एकजण ठार झाला. इगतपुरीत वीज अंगावर पडून तरुणीचा मृत्यू झाला. ग्रामीण भागात पाच जनावरेही दगावली.झाड अंगावर सातपूर परिसरात सोमवारी दुपारी सव्वातीनच्या सुमारास दुचाकीवर झाड कोसळल्याने गौरव भास्कर रिपोटे (वय २१, रा. गुलाबवाडी, नाशिकरोड) आणि पाठीमागे बसलेला त्याचा मित्र सम्यक नीलेश भोसले (१९) हे दोघे ठार झाले. सुरगाणा तालुक्यातील खडकी दिगर येथे विजेचा शॉक लागून देवीदास सीताराम भोये यांचा मृत्यू झाला. इगतपुरी तालुक्यातील उंबरकोण येथील पूजा त्र्यंबक भांगरे (वय २३) हिचा वीज अंगावर पडून मृत्यू झाला. गेल्या दोन दिवसांत पाच जनावरांचा वीज पडून मृत्यू झाल्याची माहिती जिल्हा प्रशासनाने दिली.

सोसाट्याच्या वाऱ्यासह मुसळधार पावसाने रविवारी शहराला झोडपल्यानंतर सलग दुसऱ्या दिवशी सोमवारी दुपारीदेखील शहराला वादळी तडाखा बसला. जोरदार वाऱ्यासह बसरलेल्या मुसळधारेमुळे शहरभरात ठिकठिकाणी झाडे, फांद्या कोसळून दोन दुचाकीस्वार ठार होण्यासह असंख्य वाहने, आस्थापनांचे नुकसान झाले. सातपूर पोलिस ठाण्याकडून महिंद्रा सिग्नलकडे जाणाऱ्या रस्त्यावरील धावत्या दुचाकीवर अचानक गुलमोहोराचे झाड कोसळल्याने दुचाकीस्वार गौरव आणि सम्यक ठार झाले. ते दोघेही सातपूर औद्योगिक वसाहती मध्ये एका कंपनीत कामाला होते. नियमितपणे सोमवारी कंपनीतून ते घराकडे जाण्यासाठी निघाले. पण, दुर्दैवाने नेहमीच्या रस्त्यावर ‘काळ’ आडवा आला. दरम्यान, सन २०२२ मध्ये गुलमोहोराचे वृक्ष कोसळून पाच जणांचा मृत्यू झाला होता. सातपूर-त्र्यंबकेश्वर रस्त्यावरील आयटीआय सिग्नलजवळ गुलमोहोराची अनेक झाडे आहेत. ही झाडे एका बाजूला झुकली असून, सर्व झाडांचे खोड ठिसूळ झालेले आहे.

सोमवारी दुपारी तीन वाजेच्या सुमारास गौरव आणि सम्यक या झाडांखालून जात होते. त्यावेळी गुलमोहोराच्या झाडाचे खोड मुळासकट दुचाकीवर कोसळले. त्याखाली दोघेही दबले गेले. घटनेची माहिती मिळताच अग्निशमन यंत्रणेसह पोलिस व रुग्णवाहिका घटनास्थळी दाखल झाली. या दुर्घटनेमुळे शहरात हळहळ व्यक्त होत असून, नागरिकांनी धोकादायक वृक्षासंदर्भात संताप व्यक्त केला आहे. दरम्यान, शहरात दिवसभरात २१ मिलिमीटर पावसाची नोंद झाली असून, दिवसभरात दोनशेपेक्षा जास्त झाडांच्या फांद्या, तर पन्नासहून अधिक धोकादायक वृक्ष उन्मळून पडले. भरदुपारी कोसळलेल्या पावसामुळे नागरिकांची तारांबळ उडून सलग दुसऱ्या दिवशी शहरासह उपनगरांतील जनजीवन विस्कळीत झाले. दरम्यान, अवकाळीचे हे संकट अजून दोन दिवस राहण्याचा हवामान विभागाचा अंदाज आहे. आज, मंगळवारीदेखील ‘यलो अलर्ट’ असल्याने नागरिकांना सतर्कतेचा इशारा देण्यात आला आहे.नाशिकरोड : गौरव आणि सम्यक या दोन जीवलग मित्रांच्या बुद्धपौर्णिमेच्या दिवशीच झालेल्या मृत्यूने मालधक्का येथे शोककळा पसरली होती. गौरवच्या मागे आईवडील व विवाहित बहीण आहे. सम्यकच्या मागे आईवडील आहेत. दोघांच्या मृत्यूने त्यांच्या आई-वडिलांची म्हतारपणाची काठीच हिरावली गेली आहे. दोघांचे वडील रेल्वे मालधक्का येथे हमाली काम करातात, तर आई धुणीभांडीची कामे करतात. त्यामुळे घर चालविण्यासाठी हातभार लागावा म्हणून बारावीपर्यंत शिकलेले हे दोघे चार महिन्यांपासून सातपूरच्या कंपनीत कामास जाऊ लागले होते. प्रवासाचा खर्च वाचावा म्हणून दोघे एकाच दुचाकीवर जात असत. आपत्ती व्यवस्थापन आणि मुख्यमंत्री निधीतून या दोघांच्या कुटुंबीयांना मदत करण्याची मागणी मालधक्का येथील रहिवाशांनी केली आहे.