परिचारिकाचे अनोखे मिशन! क्षयरोग जागृतीसाठी भारत-नेपाळ दुचाकीने भ्रमंती; १३ दिवसांत ३ हजारांवर किमी प्रवास.

तेरा दिवसांत तब्बल ३,३२७ किलोमीटरचे अंतर मोटरसायकलने पूर्ण करणारा आकाश नागपूरच्या इंदिरा गांधी शासकीय वैद्यकीय महाविद्यालय व रुग्णालयात (मेयो) पुरुष परिचारिका आहे.रुग्णालयात परिचारिका म्हणून काम करताना येणाऱ्या अनुभवाचा समाजासाठी काही उपयोग व्हावा, या उद्देशाने नागपूरच्या आकाश अभय साळवे याने क्षयरोग जनजागृतीसाठी भारत आणि नेपाळमध्ये मोटरसायकलने भ्रमंती करून निरोगी राहण्याचा संदेश दिला. तेरा दिवसांत तब्बल ३,३२७ किलोमीटरचे अंतर मोटरसायकलने पूर्ण करणारा आकाश नागपूरच्या इंदिरा गांधी शासकीय वैद्यकीय महाविद्यालय व रुग्णालयात (मेयो) पुरुष परिचारिका आहे.मेयो रुग्णालय क्षयरोग विभागात काम करणाऱ्या आकाशने या रुग्णांची स्थिती अनुभवली आहे. वेगाने वाढणारा हा गंभीर आजार असला तरी समाजात त्याबद्दल अजूनही जागृती नाही.

त्यामुळे सुरुवातीला त्याकडे दुर्लक्ष केले जाते आणि अखेरच्या टप्प्यात रुग्ण डॉक्टरांकडे येतात. मात्र, वेळेत निदान झाले तर यातून बरे होता येऊ शकते. मेयोतील वॉर्डात क्षयरुग्णांशी होणाऱ्या संवादातूनच त्याला या आजाराविषयी जनजागृती किती आवश्यक आहे हे ध्यानात आले व त्याने त्यासाठी मोटरसायकलने देशभर भ्रमंती करण्याचे ठरविले. त्यासाठी त्याने या आजाराची माहिती देणारी एक छोटी पुस्तिका तयार केली व वाटेत थांबून तो लोकांना त्याविषयी सांगत फिरला. नागपुरातून निघाल्यावर मध्य प्रदेश, उत्तर प्रदेश, बिहार, झारखंड, छत्तीसगड या राज्यांमधून मोटरसायकलने तो नेपाळमध्ये पोहोचला.

नेपाळमधील सोनौली, बुटवल, रामपूर, व्यास, बंदीपूर, बेसीसहर, चामे, मनांग व्हॅली, काठमांडू, ललितपूर, हेटौडा या सर्व ठिकाणी जाऊन लोकांना भेटत त्याने क्षयरोगासंबंधी काढलेली पुस्तिका वितरित केली तसेच लोकांना या आजाराविषयी सांगितले. आकाशने यापूर्वीही अशी मोटरसायकल भ्रमंती केली आहे. अलीकडेच, ट्रेंड नर्सेस असोसिएशन ऑफ इंडियाने त्याचा गौरव केला होता. सुरक्षित आणि शिस्तबद्ध सायकलिंग संस्कृती वाढण्यासाठी कार्य करणाऱ्या ऑरेंज सिटी रायडर्स क्लबचा आकाश हा अध्यक्ष आहे.या पुस्तिकेत क्षयरोगाची लक्षणे, तपासणी, निदान, उपचार, रुग्णालय, क्षयरोग नियंत्रण केंद्र टोल फ्री क्रमांक अशी सर्व माहिती दिली होती. रुग्णसेवेत असताना ज्यांचा आजवर मृत्यू झाला, अशा परिचारिकांना यानिमित्ताने आपण आदरांजली वाहिली असल्याचे आकाशने ‘मटा’ला सांगितले.