मुंबईत 40 वर्ष रुग्णसेवा, गंगोत्रीचा योग जुळला, पण… हेलिकॉप्टर अपघातात डॉक्टर महिलेचा दुर्दैवी अंत.

अपघातामध्ये प्राण गमावलेल्या डॉ. कला सोनी या मुलुंडमध्ये मागील ४० वर्षांपासून फिजीओथेरपिस्ट म्हणून रुग्णसेवा देत होत्या. गेल्या वर्षी त्यांनी गंगोत्री येथे जाण्याचे नियोजन केले होते.चारधामपैकी एक असणाऱ्या गंगोत्री येथे गुरुवारी सकाळी निघालेले हेलिकॉप्टर कोसळून झालेल्या अपघातात कॅप्टनसह सहा जण मृत्युमुखी पडले. या अपघातात एक जण गंभीर जखमी झाला आहे. मृत यात्रेकरूंमधील पाचही महिला आहेत. यातील तीन जण मुंबईचे असून उर्वरित यात्रेकरू आंध्र प्रदेश, उत्तर प्रदेश आणि गुजरातचे आहेत. या अपघाताचे नेमके कारण अद्याप स्पष्ट झालेले नाही. खासगी कंपनीच्या या हेलिकॉप्टरने देहराडून येथील खारसली हेलिपॅडवरून गंगोत्रीच्या दिशेने उड्डाण केले होते. यामध्ये कॅप्टनसह एकूण सात जण होते.ऋषिकेश-गंगोत्री राष्ट्रीय महामार्गावर गुरुवारी सकाळी पावणेनऊच्या सुमारास ते दोनशे ते अडीचशे मीटर खोल दरीत कोसळले, अशी माहिती राज्य आपत्ती निवारण बलाच्या अधिकाऱ्यांनी दिली. कला सोनी (६१), विजया रेड्डी (५७), रुची अगरवाल (५६), राधा अगरवाल (७९), वेदवती कुमारी (४८) आणि कॅप्टन रॉबिन सिंग (६०) हे सहा जण जागीच गतप्राण झाले. एम. भास्कर (५१) हा प्रवासी यातून बचावला, मात्र ते गंभीर जखमी झाले आहेत. त्यांना विमानाद्वारे ऋषिकेश येथे उपचारासाठी नेण्यात आले. उत्तराखंडचे मुख्यमंत्री पुष्कर सिंह धामी यांनी या अपघाताबाबत शोक व्यक्त केला.

या अपघाताची चौकशी करण्यात येईल, असे अधिकाऱ्यांनी सांगितले.या अपघातामध्ये प्राण गमावलेल्या डॉ. कला सोनी या मुलुंडमध्ये मागील ४० वर्षांपासून फिजीओथेरपिस्ट म्हणून रुग्णसेवा देत होत्या. गेल्या वर्षी त्यांनी गंगोत्री येथे जाण्याचे नियोजन केले होते. मात्र खराब हवामानमुळे ते शक्य झाले नव्हते. यंदा त्यांनी हा अर्धवट राहिलेला संकल्प पूर्ण करण्याचे ठरवले. मात्र नियतीला ते मान्य झाले नाही.डॉ. कला यांच्यासह हिरानंदानी येथे राहणाऱ्या विजया रेड्डी (५७), रुची अगरवाल (५६) या मंगळवारी यात्रेसाठी निघाल्या. देहराडून येथे त्यांनी राधा अगरवाल (७९) यांना सोबत घेत यात्रेचा पुढील प्रवास सुरू केला, अशी माहिती त्यांच्या भावाने, डॉ. अभिजित सोनी यांनी दिली. गुरुवारी सकाळी सव्वा अकरा वाजता त्यांना या दुर्घटनेची माहिती देण्यासाठी दूरध्वनी येताच त्यांना धक्का बसला. डॉ. कला सोनी या अविवाहित होत्या.

रितसर वैद्यकीय प्रक्रिया पूर्ण करून त्यांचा मृतदेह कुटुंबीयाकडे सुपूर्द करण्यात येणार आहे.कला सोनी आणि विजया रेड्डी या यंग एन्व्हायर्न्मेंट लिस्ट प्रोग्राम या संस्थेच्या संस्थापक सदस्य होत्या. पर्यावरणाविषयक जागरुकतेसाठी वेगवेगळे उपक्रम राबविण्यात त्या कायम पुढे असत. इको फ्रेंडली गणेश मूर्ती कार्यशाळा असो वा वृक्षारोपण अनेक उपक्रम त्यांनी संस्थेच्या माध्यमातून हाती घेतले. रेड्डी या योग प्रशिक्षकही होत्या.करोना काळात त्यांनी अनेक रुग्णांना वेगवेगळ्या माध्यमातून योगासनांचे धडे दिले. आईसोबत यात्रेला गेलेल्या रुची अगरवाल यादेखील अनेक समाजोपयोगी कार्यक्रमात आघाडीवर होत्या. एकाच परिसरातील तीन महिलांचा मृत्यू झाल्याने पवईवर शोककळा पसरली आहे. विजया रेड्डी प्रथमच या यात्रेला गेल्या होत्या. त्यांना धार्मिक पर्यटनाची आवड होती. या दुर्घटनेची माहिती कळताच त्यांचे पुत्र डॉ. हर्षवर्धन रेड्डी त्वरित देहराडूनला निघाले. ‘या दुर्घटनेवर अजूनही माझा विश्वास बसत नाही,’ या शब्दांत डॉ. हर्षवर्धन रेड्डी दुःख व्यक्त केले.