एकनाथ शिंदेंचा सतेज पाटलांना पुन्हा धक्का, काँग्रेसच्या नाराज शिलेदारांना शिवसेनेची खुली ऑफर.

नुकत्याच पार पडलेल्या विधानसभा निवडणुकीत कोल्हापुरात दहापैकी दहा जागा महायुतीला मिळाल्या. यामुळे जिल्ह्यात महायुतीची ताकद चांगलीच वाढली आहेस्थानिक स्वराज्य संस्थेच्या रखडलेल्या निवडणुकांबाबत सुप्रीम कोर्टाने महत्त्वपूर्ण आदेश दिले. तसेच येत्या चार महिन्यात निवडणुका घेण्यासही सांगितलं. त्यानंतर कोल्हापुरात आता राजकीय हालचालींना वेग यायला सुरुवात झाली आहे. बैठका आणि राजकीय जुळवाजुळव करताना फोडाफोडीला सुरुवात झाली आहे. विधानसभा निवडणुकीत एकनाथ शिंदे यांनी कोल्हापूर उत्तर निवडणुकीत राजेश क्षीरसागर यांना निवडून आणत सतेज पाटील यांना धक्का दिला होता. आता पुन्हा शिंदे सतेज पाटील यांना दुसऱ्यांदा धक्का देण्याच्या तयारीत आहेत.

नुकत्याच पार पडलेल्या विधानसभा निवडणुकीत कोल्हापूर उत्तरसाठी इच्छुक असलेले काँग्रेसमधील काही माजी नगरसेवक तिकीट न मिळाल्यामुळे नाराज आहेत, अशांना शिंदे गटाने हेरून आपल्याबरोबर येण्यासाठी खुली ऑफर दिली आहे.नुकत्याच पार पडलेल्या विधानसभा निवडणुकीत कोल्हापुरात दहापैकी दहा जागा महायुतीला मिळाल्या. यामुळे जिल्ह्यात महायुतीची ताकद चांगलीच वाढली आहे. कोल्हापूर उत्तर आणि दक्षिण या दोन विधानसभा मतदारसंघांमध्ये महानगरपालिकेचे एकूण 81 प्रभाग येतात. कोल्हापूर उत्तर मतदारसंघात 53, तर कोल्हापूर दक्षिणमध्ये 28 प्रभाग आहेत. सध्या या भागांचे विधानसभेतील प्रतिनिधित्व शिंदे गटाचे राजेश क्षीरसागर आणि भाजपचे अमल महाडिक यांच्याकडे आहे. यामुळे आगामी स्थानिक स्वराज्य संस्थांच्या निवडणुकीत सत्ताधारी पक्षासोबत जाण्यासाठी अनेक जण इच्छुक आहेत.विधानसभा निवडणुकीत कोल्हापूर उत्तर विधानसभा मतदारसंघातून काँग्रेसची उमेदवारी कोणाला द्यायची, यावरून माजी नगरसेवकांत चांगलाच वाद रंगला होता. अनेक नाट्यमय घडामोडीनंतर माजी नगरसेवक राजू लाटकर यांनी काँग्रेसचा पाठिंबा घेत अपक्ष म्हणून निवडणूक लढली, मात्र त्यांचा शिवसेना शिंदे गटाचे राजेश क्षीरसागर यांनी पराभव केला. मात्र यानंतर अद्याप देखील काँग्रेसमधील काही माजी नगरसेवकांमध्ये नाराजीचे सूर उमटत आहेत.

सध्या जिल्ह्यात महाविकास आघाडीत सतेज पाटील हे एकमेव भक्कम नेते आहेत. मात्र सतेज पाटील यांना दुसऱ्यांदा एकनाथ शिंदे धक्का देण्याच्या तयारीत आहेत. महानगरपालिकेतील सर्व कारभार काँग्रेस पक्षाचे गटनेते म्हणून शारंगधर देशमुख हे पाहत आले आहेत. मात्र विधानसभा निवडणुकीत तिकीट न मिळाल्याने ते नाराज आहेत. गेली अनेक महिने ते काँग्रेसमध्ये सक्रीय नाहीत आणि हीच नाराजी हेरून शिवसेना शिंदे गट, राष्ट्रवादी अजित पवार गटाचे नेते, कार्यकर्ते देशमुख यांच्याशी आपल्यासोबत येण्यासाठी बोलणी सुरू केले असून अनेक ऑफर देखील देण्यात आल्याचे समजते.काँग्रेसमध्ये देशमुख यांच्यासोबत तीसहून अधिक माजी नगरसेवकांमध्ये सध्या नाराजीचा सूर दिसत आहेत. यामध्ये माजी सभापती आणि माजी महापौर, उपमहापौर देखील आहेत. यामध्ये काही जणांनी शिंदे गटासोबत जाण्याचा विचार पक्का केला असून लवकरच पक्ष प्रवेशाची तारीख आणि वेळ यावर शिक्कामोर्तब होण्याची शक्यता आहे.गेल्या निवडणुकीत महानगरपालिकेवर पाच वर्ष आपली सत्ता राखून ठेवण्यात सतेज पाटील यांना यश आलं होतं. मात्र आता सतेज पाटलांचे शिलेदारच शिंदे गटाच्या वाटेवर असल्याने हा सतेज पाटलांना धक्का मानला जात आहे. यामुळेच सतेज पाटील यांच्यासमोर नाराजी दूर करण्याचा आवाहन आहे. यासाठी दोन-चार दिवसांत स्नेहभोजनाचे आयोजन केल जाणार असल्याची माहिती ही समोर येत आहे.यामुळे सतेज पाटील आपलं गड आणि शिलेदार राखण्यात यशस्वी होतात का हे पाहणं महत्त्वाचं असणार आहे.