१२वीचा निकाल लागला, आनंदात प्रेयसीला भेटायला गेला अन् घात झाला; नातेवाईकांकडून तरुणाचा खून.

मुलीचा नातेवाईक योगेश यशवंत दूटे याच्याविरोधात अकोले पोलीस ठाण्यात गुन्हा दाखल करण्यात आला आहे.१२ वीच्या परीक्षेत उत्तीर्ण झाल्याचा आनंद व्यक्त करण्यासाठी प्रेयसीला भेटायला गेलेल्या तरुणाची हत्या करण्यात आली आहे. नवनाथ तुकाराम पडवळे (रा.पांगरी, अकोले) असं हत्या झालेल्या १९ वर्षीय तरुणाचं नाव आहे. नवनाथ पडवळे हा अहिल्यानगर जिल्ह्यातील अकोले तालुक्यातील पळसुंदे गावात राहणाऱ्या आपल्या प्रेयसीला भेटण्यासाठी गेला होता. मात्र केवळ प्रेमसंबंधामुळे त्याला निर्दयपणे लाकडी दांडक्याने मारहाण करत खून करण्यात आल्याची घटना मंगळवारी समोर आली आहे.नुकताच बारावी उत्तीर्ण झालेला आणि नव्या आयुष्याला सुरुवात करू पाहणारा नवनाथ, त्याच्या प्रेयसीला भेटण्यासाठी गेला असता, तिच्याच नातेवाईकाने नवनाथवर प्राणघातक हल्ला करत त्याचा जीव घेतला. याप्रकरणी मुलीचा नातेवाईक योगेश यशवंत दूटे याच्याविरोधात अकोले पोलीस ठाण्यात गुन्हा दाखल करण्यात आला आहे.

या घटनेनंतर अकोले तालुक्यात एकच खळबळ उडाली आहे. मयत नवनाथ पडवळे याचे वडील तुकाराम भावका पडवळे, (वय-48-रा.पांगरी, ता.अकोले) यांनी अकोले पोलिसांत फिर्याद दिली असून त्यात म्हटले आहे की, त्यांचा मुलगा नवनाथ हा मॉर्डन हॉयस्कूल, अकोले येथे इयत्ता बारावीच्या वर्गात शिक्षण घेत होता. मुलगा नवनाथ याची पळसुंदे येथील योगेश यशवंत दुटे याच्या नातेवाईक असलेल्या मुलीसोबत प्रेम प्रकरण सुरू असल्याचे मला दोन महिन्यांपूर्वी समजले होते. तेव्हा मी त्याला तू शाळा शिक, दुसरे कुटाने करू नको, असे समजावून सांगितले होते. त्यानंतर दिनांक ५ मे रोजी माझे मेव्हणे भागा महादु दिघे यांच्या मुलाचा साखरपुडा व हळदीचा कार्यक्रम नागमळा सातेवाडी येथे असल्याने आम्ही सर्वजण कार्यक्रमाला गेलो होतो. यावेळी हळदीचा कार्यक्रम संपल्यानंतर मुलगा नवनाथ मला म्हणाला की, मी आपल्या घरी जातो, मला मोटार सायकल द्या. तुम्ही व आई येथेच मुक्कामी थांबा असे सांगून रात्री ११.३० वाजता घरी जातो, असे सांगून तो गाडीवर गेला. मात्र त्यानंतर तो ५ मे रोजी रात्री ११.३० ते ६ मे रोजी पहाटे ५.३० वाजताच्या सुमारास त्याचे प्रेम संबंध असलेल्या मुलीला भेटण्यासाठी पळसुंदे येथे गेला असता तिथे त्याला तिचा नातेवाईक योगेश यशवंत दुटे याने पाहिले व मुलगा नवनाथ यासला पकडून लाकडी दांडक्याने जबर मारहाण करुन त्याचा खुन केला दरम्यान, मृत नवनाथ पडवळे याच्या वडिलांच्या फिर्यादीवरुन अकोले पोलिसांत गुन्हा दाखल करण्यात आला आहे. सदर घटनेनं तालुक्यात खळबळ उडाली असून पुढील तपास पोलीस निरीक्षक मोहन बोरसे यांच्या मार्गदर्शनाखाली स.पो.नि. संदिप हजारे करत आहेत.