खेळताना लहान भावाशी वाद, मोठा भाऊ जाब विचारायला गेला आणि भयंकर घडलं; अल्पवयीन मुलाचा नाहक बळी.

पिंपरी-चिंचवडमध्ये धक्कादायक घटना घडली. खेळताना झालेल्या वादातून सोळा वर्षांच्या मुलाचा जीव गेला. पोलिसांनी सोहेब शेख नावाच्या आरोपीला अटक केली आहे. खेळताना संयम राखण्याचं आवाहन पोलिसांनी केले आहे. या घटनेमुळे शहरात खळबळ उडाली आहे.पिंपरी – चिंचवड शहरातून एक धक्कादायक घटना समोर आली आहे. ऑफलाईन गेममध्ये खेळण्याच्या नादात वाद झाला. याचा जाब विचारण्यासाठी गेलेल्या एका १६ वर्षीय मुलाचा यात नाहक बळी गेला आहे. या घटनेने शहरात एकच खळबळ उडाली आहे.गणेश कुऱ्हाडे (वय १६) असं मृत्यू झालेल्या तरुणाचं नाव असून या प्रकरणी १९ वर्षीय सोहेब शेख याला पोलिसांनी अटक केली आहे. रविवारी ४ मे रोजी ही घटना पिंपरी – चिंचवडमध्ये उडकीस आली.याबाबत पोलिसांनी दिलेल्या माहितीनुसार, गणेशचा भाऊ कार्तिक आणि सोहेब एका मित्राच्या टेरेसवर कॅरम आणि नंतर ‘नवा व्यापार’ हा बोर्ड गेम खेळत होते. खेळादरम्यान कार्तिक आणि सोहेब यांच्यात वाद झाला. ज्यामुळे सोहेबने कार्तिकला मारहाण केली. खेळ अर्धवट सोडून सर्वजण घरी परतले.

घरी पोहोचल्यावर कार्तिकने मोठा भाऊ गणेशला ही घटना सांगितली. संतापलेल्या गणेशने सोहेबला जाब विचारण्यासाठी त्याच्याकडे धाव घेतली. याचा राग आल्याने सोहेबने गणेशच्या पायात पाय अडकवून त्याला सिमेंटच्या रस्त्यावर पाडले आणि लाथांनी मारहाण केली. यात गणेशच्या डोक्याला गंभीर दुखापत झाली.गणेशला तातडीने रुग्णालयात नेण्याचा प्रयत्न करण्यात आला, मात्र तोपर्यंत त्याचा मृत्यू झाला होता. विशेष म्हणजे, गणेश आणि सोहेब यांच्यात कोणताही वैयक्तिक वाद नव्हता. केवळ भावाला झालेल्या मारहाणीचा जाब विचारण्यासाठी गणेशने पुढाकार घेतला, हाच जाब विचारल्याने दोघांमध्ये वाद झाला झाला आणि नंतर त्याचा जीव गेला. पोलिसांनी सोहेबवर खुनाचा गुन्हा दाखल करून तपास सुरू केला आहे. ही घटना परिसरातील तरुणांमध्ये खेळादरम्यान संयम आणि शांतता राखणं गरजेचं असल्याचं पोलिसांकडून सांगण्यात आलं आहे.दरम्यान, पुण्यासह राज्यभरातच गुन्हेगारीच्या घटनांमध्ये वाढ झाली आहे. हत्या, मारामारी, चोरीच्या घटना वारंवार समोर येत असून गुन्हेगारांना पोलिसांचा धाक उरला आहे की नाही असाच प्रश्न उपस्थित होतो आहे.