‘सगळा आनंद हिरावून घेतला ताई, आता…’; सुप्रिया सुळे यांच्या अभिनंदनाच्या फोनवर वैभवीकडून दु:ख व्यक्त.

मस्साजोग गावचे सरपंचं संतोष देशमुख यांची कन्या वैभवी देशमुख हिने इयत्ता बारावीच्या परीक्षेत 85.13 टक्के गुण संपादीत करत घवघवीत यश मिळवलं आहे. यामुळे खासदार सुप्रिया सुळे यांनी वैभवीला अभिनंदनासाठी फोन केला. यावेळी फोनवर बोलताना वैभवी भावूक झाली. मस्साजोग गावचे सरपंच संतोष देशमुख यांची अतिशय निर्घृणपणे हत्या करण्यात आली. या घटनेमुळे संपूर्ण राज्य हादरलं. ही घटना घडल्यानंतर संतोष देशमुख यांची इयत्ता बारावीत शिक्षण घेत असणारी मुलगी वैभवी देशमुख ही न्यायासाठी राज्यभरात मूक मोर्चांमध्ये सहभागी झाली. आपल्या वडिलांना न्याय मिळाला यासाठी तिने संघर्ष केला. वडिलांच्या मृत्यूचं मोठं संकट असताना वैभवी परिस्थितीला संयमाने सामोरे गेली. तिने या संकट काळात धीराने इयत्ता बारावीची विज्ञान शाखेतून परीक्षा दिली. या परीक्षेत तिला तब्बल 85.13 टक्के गुण मिळाले आहेत. त्यामुळे वैभवीचं राज्यभरात कौतुक होत आहे.

राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी माध्यमांसमोर वैभवी देशमुखला फोन करत तिच्यासोबत बातचित केली. सुप्रिया ताईंनी वैभवीचं अभिनंदन केलं. यावेळी वैभवीने आपल्या वडिलांसोबत झालेल्या घटनेबाबत दु:ख व्यक्त केलं. यावेळी वैभवीने व्यक्त केलेली खंत सुन्न करणारी आहे. सुप्रिया सुळे यांनी तिला सावरण्याचा प्रयत्न केला. तसेच पुढच्या शैक्षणिक शिक्षणासाठी मदत करण्याचं देखील आश्वासन दिलं.

‘ताई, आनंदच हिरावून घेतला’ “मॅडम पेढे कुठे आहेत?”, असं सुप्रिया सुळे यांनी विचारलं. त्यावर वैभवी आहेत ना? असं म्हणते. सुप्रिया सुळे यांनी यावेळी वैभवीला अभिनंदन असं म्हटलं. त्यावर वैभवीचे शब्द खूप भावनिक होते. “ताई, आनंदच हिरावून घेतला आहे. कशाचे पढे आणि काय?”, असं वैभवी म्हणाली. त्यावर सुप्रिया सुळे वैभवीला धीर देतात.”खरंच आहे गं, काय करु मी? मलाही तेच वाटत होतं. काय तू संघर्ष केला आहेस? एवढे मार्क मिळवले आहेत. तुझे कितीही कौतुक केलं तरी थोडं आहे. मला तुझा खूप सार्थ अभिमान वाटतो. जे काही घडलं त्याबद्दल वेरी सॉरी”, असं सुप्रिया सुळे म्हणाल्या.”आई, आजी कसे आहेत?”, असं सुप्रिया सुळे विचारतात. त्यावर वैभवी ठिक आहे म्हणाली. त्यावर सुप्रिया सुळे यांनी त्यांची आणखी विचारपूस केली. इतक्या दिवसांनी काहीतरी गोड बातमी आली. तर आता थोडे आनंदी असतील ना? असा प्रश्न सुप्रिया सुळे विचारता. त्यावर वैभवी आपल्याला आधी न्याय हवाय, असं म्हणाली. त्यावर सुप्रिया सुळे यांनी न्याय मिळणार, असं आश्वासन दिलं. मी आजीला प्रोमिस केलंय. तू काळजी करु नकोस, असं सुप्रिया सुळे म्हणाल्या.पुढचं काय बेटा? असं सुप्रिया सुळे विचारतात. त्यावर वैभवीने आणखी काही ठरवलं नाही, असं उत्तर देते. यानंतर काका आणि तुम्ही सर्व बसून पुढे काय करायचं आहे याबाबत निर्णय घ्या आणि मला सांगा, असं सुप्रिया सुळे वैभवीला सांगतात. हो ताई, चालेल, असं वैभवी सांगते. अर्ज भरायचे ते भरुन घ्या. विद्या प्रतिष्ठानला येणार असशील तर तिथे, पुणे किंवा बीड, जिथे शिक्षण करायचं आहे तिथे कर, मला तुझा खूप अभिमान वाटला. आई आणि आजीला सांग मी फोन केला, असं सुप्रिया सुळे वैभवीला म्हणाल्या.