‘चुकीच्या बिळात हात घातला तर दंश महागात पडेल’, सुषमा अंधारे यांचा अंजली दमानिया यांना इशारा.

“दमानिया तुम्ही आडनाव बघून अजेंडे चालवता हे वास्तव आहे. ठाकरे–पवार यांना लक्ष्य करताना नागपूर आणि परिसरातील फडणवीस, बावनकुळे, मुनगुंटीवार यांच्यावर तुमची वक्रदृष्टी का नसेल?”, असा सवाल सुषमा अंधारे यांनी केला.मुंबई : शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे या सामाजिक कार्यकर्त्या अंजली दमानिया यांच्या ब्रॉडकास्ट ग्रुपमध्ये टाकण्यात आलेल्या एका प्रश्नावरुन चांगल्याच संतापल्या. अंजली दमानिया यांनी व्हाटसअ‍ॅपला त्यांच्या ब्रॉडकास्ट ग्रुपमध्ये सुषमा अंधारे उपमुख्यमंत्री अजित पवार यांच्या राष्ट्रवादी काँग्रेस पक्षात जाणार? असा प्रश्न अंजली दमानिया यांनी केला. संबंधित मेसेजचा स्क्रिनशॉट ‘एक्स’वर शेअर करत सुषमा अंधारे यांनी अंजली दमानिया यांच्यावर निशाणा साधला. “अहो दमानिया, जरा दमानं घ्या की.. किती तो प्रसिद्धीझोतात राहण्याचा सोस. कधीतरी पूर्ण, महत्त्वाचं म्हणजे अधिकृत माहिती घेत चला. ब्रॉडकास्टिंगवर टाकलेल्या मेसेजचा अर्थ काय घ्यायचा? तुम्ही माझ्या PR म्हणून काम करत आहात”, अशी खोचक टीका सुषमा अंधारे यांनी केली. यानंतर अंजली दमानिया यांनी आपल्या त्या मेसेजवर सविस्तर स्पष्टीकरण दिलं.

अंजली दमानिया नेमकं काय म्हणाल्या?”केवळ आडनावाने तुम्ही मला संबोधता? छान. असो.. मला तर ते पण करता येणार नाही. कारण केवळ अंधार आहे. खरंतर अशी भाषा वापरायला मला आवडत नाही, पण तुम्ही जे शब्द वापरले, त्यावर वाईट वाटले. मला खात्रीशीर माहिती अगदी, फेब्रुवारी महिन्यात मिळाली होती की तुम्ही अजित पवारांना त्यांच्या घरी जाऊन भेटल्या होतात, आणि त्यांच्या पक्षात जाणार होतात. हे खरे आहे की नाही ह्यावर खरं उत्तर द्याल का?”, असा सवाल अंजली दमानिया यांनी केला. “बातमी करायची असती तर तेव्हाच केली असती. पण तुम्ही कुठेही गेलात तरी मला काय फरक पडतो, म्हणून बोलले नाही.

तुम्ही कुठल्याही पक्षात जाणार असाल तर नक्कीच जा, तो तुमचा वैयक्तिक निर्णय आहे, तुम्हाला त्यासाठी शुभेच्छा. आणि हो प्रकाश झोतात यायची मला गरज नाही. प्रकाश झोतात ज्यांना यायचं असत ते वाट्टेल ते करतात… त्यासाठी एखाद्या पक्षाच्या अध्यक्षांबद्दल वाट्टेल ते बोलतात आणि मग त्याच पक्षात जाऊन नेत्या बनतात, हे मला ह्या जन्मी जमणार नाही”, असा टोला अंजली दमानिया यांनी लगावला.”तुमच्या माहितीसाठी, काल एका चॅनलने बातमी ट्वीट केली की, ठाकरे गटातील कोणीतरी अजित पवार गटात जाणार, ह्यावर मी फक्त माझ्या वैयक्तिक मीडिया ब्रॉडकास्टच्या व्हॉट्सअप ग्रुपवर लिहिलेला हा एक प्रश्न होता. तो तुम्हाला कोणीतरी पाठवला”, असं स्पष्टीकरण अंजली दमानिया यांनी दिलं.अंजली दमानिया यांनी दिलेल्या स्पष्टीकरणानंतर सुषमा अंधारे यांनी खोचक शब्दांत प्रत्युत्तर दिलं. तसेच अंजली दमानिया यांना इशारा देखील दिला. “दमानिया तुम्ही आडनाव बघून अजेंडे चालवता हे वास्तव आहे. ठाकरे–पवार यांना लक्ष्य करताना नागपूर आणि परिसरातील फडणवीस, बावनकुळे, मुनगुंटीवार यांच्यावर तुमची वक्रदृष्टी का नसेल? असो, ज्यांच्या पे रोलवर काम करता त्यांच्याकडून माहिती नीट घ्या. चुकीच्या बिळात हात घातला तर दंश महागात पडेल”, असा इशाराच सुषमा अंधारे यांनी दिला.