नवले पुलाजवळ पुन्हा भीषण अपघात, आलिशान मर्सिडीजची स्प्लेंडरला जोरदार धडक, बाईकस्वाराचा मृत्यू, पुणे हादरलं.

बाईकला धडक दिल्यानंतर मर्सिडीज कार नवले पुलावरील बॅरिकेड तोडून थेट सर्व्हिस रोडवर कोसळली. पुण्यातील गजबजलेल्या नवले पुलाजवळ पहाटेच्या सुमारास भीषण अपघात झाला. आलिशान मर्सिडीज कारने स्प्लेंडरला जबरदस्त धडक दिली. यात बाईकस्वाराचा जागीच मृत्यू झाला, तर एक जण जखमी आहे. कारमधील प्रवाशांचे प्राण एअरबॅग्जमुळे बचावले.पुण्यातील वडगाव येथील बंगळुरु पुणे महामार्गावरील नवले ब्रिजजवळ शनिवारी पहाटे सुमारे 4.30 वाजताच्या सुमारास भीषण अपघात घडला. विशाल हॉटेलजवळ एक मर्सिडीज कार आणि स्प्लेंडर दुचाकी यांची जोरदार धडक झाली. या अपघातात दुचाकीस्वाराचा मृत्यू झाला आहे, तर पाठीमागे बसलेली व्यक्ती जखमी झाली आहे.बाईकला धडक दिल्यानंतर मर्सिडीज कार नवले पुलावरील बॅरिकेड तोडून थेट सर्व्हिस रोडवर कोसळली. एअरबॅग्समुळे अपघातग्रस्त कारमधील चालक आणि अन्य प्रवाशांना किरकोळ दुखापत झाली,

मात्र गाडीचे मोठे नुकसान झाले आहे.या प्रकरणी भारतीय दंड संहिता कलम 105 अंतर्गत सदोष मनुष्यवधाचा गुन्हा दाखल करण्यात आला आहे. नवले पूल प्रकरणी संबंधित आरोपींची वैद्यकीय तपासणी पूर्ण करण्यात आली असून दोघांना पोलिसांनी ताब्यात घेतले आहे.अन्य दोघे आरोपी जखमी असून त्यांच्यावर रुग्णालयात उपचार सुरु आहेत. दरम्यान, अपघातावेळी चालक मद्यधुंद अवस्थेत असल्याचा आरोप मृताच्या नातेवाईकांनी केला आहे. या घटनेनंतर पोलिसांनी तात्काळ कारवाई केली असून तपास सुरु आहे.दुसरीकडे, कारने दोन लहान बहि‍णींना दिलेल्या धडकेत एकीचा मृत्यू झाल्याची घटना शुक्रवारी ठाण्यात घडली. तर, तिची बहीण जखमी झाली असून हा अपघात नौपाड्यातील गणेशवाडीमधील तुळजाभवानी मंदिराच्या येथे घडला.

कार चालकाविरुद्ध नौपाडा पोलिस ठाण्यात गुन्हा नोंदवण्यात आला.गणेशवाडीतील तुळजा भवानी मंदिरात 30 एप्रिलला देवीच्या मूर्तीचा प्राणप्रतिष्ठा सोहळा असल्याने मोठ्या प्रमाणावर भाविक दर्शनासाठी येणार असल्याने बेलदाबाई पवार आणि तिचा पती हे तेथे पदपथावर बसून वस्तूंची विक्री करत होते. त्यांची मुलगी आणि नाती (मुलीच्या मुली) लक्ष्मी काळे (5 वर्ष), गंगुबाई काळे (3 वर्ष) ह्याही आल्या होत्या.दिवसभर वस्तूंची विक्री केल्यानंतर रात्री 9.45 वाजता सर्वजण घरी जाण्यासाठी मालाची आवराआवरी करत होते. तितक्यात लक्ष्मी आणि गंगुबाई या बहि‍णींना भूक लागल्याने त्यांनी आजीकडून दहा रुपये घेतले. मंदिराजवळच असलेल्या स्टॉलवर पापड आणण्यासाठी गेल्या. त्यावेळी हा अपघात झाला.