लाडक्या बहिणींसाठी मागासवर्गीयांवर अन्याय; तब्बल ‘इतक्या’ कोटींच्या निधीला कात्री, कोणत्या खात्याला, किती फटका.

आदिवासी विकास खात्याला देण्यात आलेल्या ३ हजार ४२० कोटी रुपयांच्या सहाय्यक अनुदानातून ३३५ कोटी ७० लाख रुपयांचा निधी लाडकी बहीण योजनेसाठी वळविण्यात आला आहे. आर्थिक अडचणींचा सामना करणाऱ्या महायुती सरकारने लाडक्या बहिणींसाठी सामाजिक न्याय आणि आदिवासी विकास खात्याच्या निधीला हात लावला आहे. या दोन्ही खात्यांमधून अनुक्रमे ४१० कोटी ३० लाख आणि ३३५ कोटी ७० लाख रुपये महिला आणि बालविकास खात्याकडे वळविण्यात आले आहेत. निधी देण्यासाठी दोन्ही विभागांनी आडकाठी केली नसली तरी तो देताना महिला व बालविकास खात्याकडे लाभार्थ्यांची यादी मागितल्याचे समजते.गेल्या वर्षी विधानसभा निवडणुकीच्या तोंडावर महायुती सरकारने महिलांना दर महिना १ हजार ५०० रुपये देणारी मुख्यमंत्री माझी लाडकी बहीण योजना’ जाहीर केली. ही योजना प्रचंड लोकप्रिय ठरली. सरकारने निवडणुकीपूर्वी योजनेतील पात्र महिलांना पाच महिन्याचे हप्ते दिले. मात्र, विधानसभा निवडणुकीनंतर पुन्हा सत्तेत आलेल्या महायुती सरकारला नाजूक आर्थिक स्थिती पाहून २१०० रुपयांच्या मदतीचे आश्वासन लांबणीवर टाकावे लागले.

बहिणींच्या बँक खात्यात १५०० रुपये जमा करतानाही सरकारची आर्थिककोंडी होऊ लागल्याने सरकारला आता मागासवर्गीय आणि आदिवासी समाजासाठी कल्याणकारी योजना आखणाऱ्या सामाजिक न्याय तसेच आदिवासी विकास खात्याचा निधी वळवावा लागला आहे. महिला आणि बालविकास विभागाने शुक्रवारी याबाबतचा शासन निर्णय जारी केला. लाडक्या बहिणींसाठी निधी वळवला जाऊ नये, अशाप्रकारची विनंती सामाजिक न्याय मंत्री संजय शिरसाट यांनी मार्च महिन्यातच केली होती. मात्र त्यांच्या विनंतीचा विचार करण्यात आला नव्हता.राज्य सरकारने सन २०२५-२६ या वर्षीच्या अर्थसंकल्पात अनुसूचित जाती उपयोजनेसाठी २२ हजार ६५८ कोटी तर अनुसूचित जाती उपयोजनेसाठी २१ हजार ४९५ कोटी रुपयांची तरतूद केली आहे. यापैकी सामाजिक न्याय आणि विषेश सहाय्य विभागासाठी सहाय्यक अनुदान म्हणून ३ हजार ९६० कोटी रुपये उपलब्ध करून दिले आहेत.

यापैकी ४१० कोटी ३० लाख रुपयांचा निधी महिला आणि बालविकास विभागाला देण्यात आला आहे. आदिवासी विकास खात्याला देण्यात आलेल्या ३ हजार ४२० कोटी रुपयांच्या सहाय्यक अनुदानातून ३३५ कोटी ७० लाख रुपयांचा निधी लाडकी बहीण योजनेसाठी वळविण्यात आला आहे.मुख्यमंत्री माझी लाडकी बहीण योजनेच्या एप्रिल २०२५ या महिन्याचा हप्ता अजूनही बहिणींच्या बँक खात्यात जमा झालेला नाही. महिला आणि बालविकास विभागाच्या मंत्री अदिती तटकरे यांनी अक्षय तृतीयेच्या दिवशी लाडक्या बहिणांना एप्रिलचा हप्ता मिळेल, असे जाहीर केले होते. मात्र, निधीअभावी विभागाला अक्षय तृतीयेचा मुहूर्त गाठता आला नाही. आता सामाजिक न्याय आणि आदिवासी विकास खात्याचा निधी मिळाल्याने लाडक्या बहिणींना लवकरच एप्रिलचा हप्ता मिळेल, अशी अपेक्षा आहे.