पहलगाममध्ये मानेला गोळी चाटून गेली, सुबोध पाटील मृत्यूशी झुंज जिंकले.; म्हणाले बेशुद्ध झालेलो, सद्गुरु कृपेने वाचलो.

तीन-चार मिनिटातच गोळीबाराचा आवाज आला, आम्ही मागे पाहिलं, तर लोकं पळताना दिसली, त्यामुळे आम्हीही धावत सुटलो.” असं सुबोध पाटील सांगत होते.नवी मुंबई : जम्मू काश्मीर येथील पहलगाममध्ये दहशतवाद्यांच्या गोळीबारात जखमी झालेले नवी मुंबईमधील खारघर येथील सुबोध पाटील सुखरुप घरी परत आले आहेत. त्यांच्या मानेला गोळी चाटून गेल्यामुळे मिलिट्री रुग्णालयात उपचार करण्यात आले. कोण कोण हिंदू आहेत, असं विचारुन आम्हाला बाजूला केलं. भारतीय लष्कर, केंद्रीय गृहमंत्री अमित शाह आणि उपमुख्यमंत्री एकनाथ शिंदे यांची मदत झाल्याचं पाटील यांनी सांगितलं.नवी मुंबईतील खारघर येथे राहणारे सुबोध पाटील हे निसर्ग पर्यटन कंपनीसोबत सपत्नीक जम्मू काश्मीर टूरवर गेले होते. “आम्ही दुपारी साडेबारा वाजता पहलगामला पोहोचलो. घोड्यावर बसून आम्ही वरती गेलो. एक फोटोवाला आमच्या जवळ आला, त्याने काश्मिरी पेहरावात फोटो काढायचंय का विचारलं, आम्ही तयार झालो, तीन-चार मिनिटातच गोळीबाराचा आवाज आला, आम्ही मागे पाहिलं, तर लोकं पळताना दिसली, त्यामुळे आम्हीही धावत सुटलो.” असं सुबोध पाटील सांगत होते.

“तारेचं कुंपण असल्याने बाहेर जायला मार्ग नव्हता, काही जण बसले, काही जण झोपले, आम्हीही तिथे बसलो, तेवढ्यात एक अतिरेकी आमच्या जवळ आला, म्हणाला की हिंदू कोण आहेत, त्यांनी बाजूला उभे राहा, सगळे घाबरले होते, हात जोडून होते, जो कोणी बोलायला जाईल, त्याला शूट करायचे.” असं सुबोध पाटील म्हणाले.”आम्हीही घाबरलो होतो, सद्गुरु कृपेने वाचलो” असं सांगताना सुबोध पाटील यांना अश्रू अनावर झाले. “त्याने माझ्या दिशेने गोळी झाडली, ती माझ्या मानेला लागून गेली, मी बेशुद्ध पडलो” असं सुबोध पाटील यांनी ‘एबीपी माझा’शी बोलताना सांगितलं.सुबोध पाटील यांच्या पत्नीने सांगितलं की, “अतिरेकी गोळी मारुन पळून गेले, गोळी लागल्याने आमचे हे बेशुद्ध पडले होते, मीही खूप घाबरले होते, लढायचं की काय करायचं, हे कळत नव्हतं. पण मी उठले आणि घोडेवाले आहेत का मदतीला, हे बघायला गेले. घोडे नव्हते पण घोडेवाले होते. मी त्यांना म्हटलं, की माझ्या नवऱ्याच्या मानेला गोळी लागलेय, जरा मदत करता का? ते म्हणाले की तुम्ही पुढे जा, मी काकांना घेऊन येतो.””दोघांनी मला उचलून थोडं खाली नेलं, मग म्हणाले की तुम्ही घोड्यावर बसा, मी म्हटलं की घोड्यावर बसायची माझ्यात ताकदच नाही, मी गळून गेलेय, त्यांनी मला कसंबसं खाली नेलं. पुढे एका पोलीस चौकीजवळ रुग्णवाहिन्या होत्या, त्यांनी आम्हाला हॉस्पिटलला नेलं. बराच वेळ आमचे हे दिसले नाहीत, पण एका क्षणी जॅकेटवरुन मी त्यांना लांबून ओळखलं. मी हॉस्पिटल नर्सला म्हटलं की हा आमचा माणूस आहे. तेव्हा हे थोडे बोलत होते. माझ्या जीवात जीव आला.” असा थरार आठवून सांगताना सुबोध पाटील यांच्या पत्नीचा आवाज कातर झाला होता.