नगरकरांचे ‘काका’ हरपले, संग्राम जगताप यांना पितृशोक, माजी आमदार अरुण जगताप यांचे पुण्यात निधन.

नगरच्या राजकारणातील एक मोठं नावं म्हणून अरुण जगताप यांच्याकडे पाहिलं जायचं. युवक काँग्रेसच्या अध्यक्षपदापासून अरुण काकांनी आपल्या राजकारणाची सुरुवात केली.अहिल्यानगरचे आमदार संग्राम जगताप यांचे वडील आणि माजी आमदार अरुणकाका जगताप यांचे निधन झाले. आज पहाटे 2 वाजता पुण्यातील एका खासगी रुग्णालयात त्यांनी अखेरचा श्वास घेतला. ते 68 वर्षांचे होते. 5 एप्रिल रोजी अस्वस्थ वाटू लागल्याने त्यांना नगरहून पुण्यातील एका खाजगी रुग्णालयात दाखल करण्यात आले होते. तब्बल एक महिना मृत्यूशी झुंज दिल्यानंतर त्यांची प्राणज्योत मालवली.नगरच्या राजकारणातील एक मोठं नावं म्हणून अरुण जगताप यांच्याकडे पाहिलं जायचं. युवक काँग्रेसच्या अध्यक्षपदापासून अरुण काकांनी आपल्या राजकारणाची सुरुवात केली. आधी ते नगरपालिकेत नगरसेवक झाले, नंतर 5 वर्ष तत्कालीन अहमदनगर नगरपालिकेचे अध्यक्ष देखील राहिले.

त्यांनी दोन वेळा अहिल्यानगर शहर मतदारसंघातून विधानसभा निवडणूक लढवली, मात्र त्यांना पराभव स्वीकारावा लागला. परंतु पुढे ते दोन वेळेस विधान परिषदेवर निवडून येऊन आमदार झाले.जिल्हा क्रिकेट संघटनेचे ते अध्यक्ष राहिले आहेत. महाराष्ट्र क्रिकेट संघटनेचे कार्यकारी सदस्यपद त्यांनी भूषवले आहे. गुणे आयुर्वेद शैक्षणिक संस्थेचे ते अध्यक्ष राहिले आहेत. आमदार शिवाजीराव कर्डिले आणि भानुदास कोतकर यांचे ते व्याही होते.मूळचे काँग्रेसचे विचाराचे असणारे अरुण जगताप यांनी मनोहर जोशी मुख्यमंत्री असताना शिवसेनेमध्ये प्रवेश केला होता. मात्र शिवसेनेत काही त्यांचं मन रमलं नाही. अवघ्या सहा महिन्यात ते पुन्हा एकदा स्वगृही आले. अजित पवार यांचे अत्यंत विश्वासू म्हणून अरुण जगताप यांची ओळख राज्याला होती.

पाच एप्रिल रोजी त्यांना अत्यावस्थ वाटू लागल्याने त्यांना उपचारासाठी पुणे येथील एका खासगी रुग्णालयात दाखल करण्यात आले होते. त्यावेळी उपमुख्यमंत्री अजित पवार, जिल्ह्याचे पालकमंत्री राधाकृष्ण विखे पाटील आदींनी रुग्णालयात जाऊन माजी आमदार जगताप यांच्या तब्ब्येतील बाबत आमदार संग्राम जगताप यांच्याकडून माहिती घेतली होती. परंतु उपचारादरम्यान अरुणकाका जगताप यांचे निधन झाले.आज दुपारी दोन वाजल्यापासून त्यांचे पार्थिव भवानीनगर येथील निवासस्थानी अंत्यदर्शनासाठी ठेवण्यात येणार आहे. तर चार वाजता अहिल्यानगर येथील अमरधाम येथे त्यांच्यावर अंत्यसंस्कार केले जातील.