पिंक ऑटो योजनेस सशक्त चालना : रोटरी क्लब जळगाव तर्फे सहा महिलांना अर्थसहाय्याचे धनादेश वितरण..

जळगाव, दि. १ मे – महाराष्ट्र दिनाचे औचित्य साधून रोटरी क्लब जळगाव आणि मराठी प्रतिष्ठान यांच्या संयुक्त उपक्रमातून शहरात महिला सबलीकरणासाठी एक महत्त्वाचा टप्पा गाठण्यात आला. पिंक ऑटो योजनेच्या अंतर्गत नव्या सहा महिलांना अर्थसहाय्याचे प्रति महिला तीस हजार रुपयांचे (डाऊन पेमेंट) धनादेश आज रोटरी हॉल, गणपती नगर,जळगाव येथे प्रदान करण्यात आले.रोटरी क्लबच्या आर्थिक मदतीमुळे रेश्मा पाटील, मनीषा ढाके, अनिता अहिरे, योगिता पाटील, प्रतीक्षा राणे आणि बेबी बारी या सहा महिला नव्याने पिंक ऑटो रिक्षा चालक मालक होणार आहेत. दरम्यान या महिलांना पंजाब नॅशनल बँकेच्या सहकार्याने कर्जाची सुविधाही उपलब्ध करून देण्यात आली आहे.

मराठी प्रतिष्ठान ही संस्था गेल्या पाच वर्षांपासून शहरात पिंक ऑटो संकल्पना यशस्वीपणे राबवत आहे. विविध सामाजिक संस्था, उद्योजक, आणि दानशूर व्यक्तींच्या सहकार्याने आतापर्यंत २२ पिंक ऑटो रिक्षा रस्त्यावर धावत असून, आता या सहा नव्या रिक्षा यामध्ये समाविष्ट होणार आहेत.महिलांना आर्थिकदृष्ट्या सक्षम करण्याचा आणि त्यांना आत्मनिर्भर बनवण्याचा उद्देश या उपक्रमामागे आहे. महिलांचे स्वावलंबन हेच समाजाच्या प्रगतीचे खरे द्योतक असल्याची भावना यावेळी व्यक्त करण्यात आली.रोटरी क्लब आणि मराठी प्रतिष्ठानच्या या स्तुत्य उपक्रमाचे सर्वत्र कौतुक होत असून, यामुळे शहरात महिलांच्या सुरक्षित आणि विश्वासार्ह प्रवासासह त्यांना नवा आर्थिक आधारही मिळणार आहे.या छोटेखानी कार्यक्रमाच्या अध्यक्षस्थानी रोटरी क्लब जळगावचे अध्यक्ष रोटरीयन ॲड. सागर चित्रे हे होते. यावेळी सचिव रोटरीयन पराग अग्रवाल, असिस्टंट गव्हर्नर रोटरीयन पी पी जितेंद्र ढाके, रोटरीयन गिरीश कुलकर्णी, रोटरीयन रितेश जैन, रोटरीयन असीफ मेमन, रोटरीयन सुनील सोनार, मराठी प्रतिष्ठान चे अध्यक्ष ॲड. जमील देशपांडे तसेच पंजाब नॅशनल बँकेचे कर्ज अधिकारी धीरज वर्मा उपस्थित होते.या प्रसंगी मराठी प्रतिष्ठानचे अध्यक्ष ॲड जमील देशपांडे यांनी रोटरी परिवाराचे आभार मानले.