पहलगामच्या आरू, अम्युझमेंट पार्क, बेताब व्हॅलीची रेकी; 2 दिवसांपूर्वी बदलला हल्ल्याचा प्लॅन, कारण काय?

पहलगाम हल्ल्यातील दहशतवादी हे सात दिवसांपासून पहलगाममध्ये होते. त्यांनी बऱ्याच ठिकाणांची रेकी केली. त्यांना सुरुवातीला आरू, अम्युझमेंट पार्क, बेताब व्हॅलीला लक्ष करायचं होतं. पण दोन दिवसांपूर्वी प्लॅन बदलला.पहलगामच्या बैसरनमध्ये दहशतवाद्यांनी भ्याड हल्ला केला. या हल्ल्यात २६ जणांचा बळी गेला. परंतू, बैसरन ही दहशतवाद्यांचा पहिला पर्याय नव्हता. त्यांना पहलगाम भागातील अरु व्हॅली, अ‍ॅम्युझमेंट पार्क किंवा बेताब व्हॅलीमध्ये ही रक्तरंजित खेळ खेळायचा होता. परंतु सुरक्षा दलांची उपस्थिती, सुरक्षित सुटकेचे कमी पर्याय आणि कमी गर्दी असल्यामुळे त्यांनी आपला विचार बदलला, अशी माहिती आहे.हे दहशतवादी पहलगाम आणि त्याच्या आसपासच्या भागात सात दिवसांपासून फिरत होते. हल्ल्याच्या फक्त दोन दिवस आधी त्यांनी बैसरनची निवड केली. बैसरन हल्ला प्रकरणाच्या तपासादरम्यान मिळालेल्या सुगावांच्या आधारे आणि दहशतवाद्यांच्या ओव्हरग्राउंड वर्कर्सच्या चौकशीच्या आधारे ही माहिती समोर आली आहे.

यादरम्यान, एनआयएच्या पथकाने बैसरनमधील हत्याकांड स्थळाला भेट दिली आणि ड्रोनद्वारे संपूर्ण फुटेज गोळा केले. याशिवाय, त्यांनी हल्ल्यानंतर लगेचच तिथे पोहोचलेल्या सुरक्षा अधिकाऱ्यांशी आणि काही घोडेस्वारांशीही चर्चा केली. तपासाशी संबंधित सूत्रांनी दिलेल्या माहितीनुसार, बैसरन हल्ल्यात सहभागी असलेले दहशतवादी सुमारे एक आठवडा त्यांच्या स्थानिक साथीदारांसह पहलगाम आणि आसपासच्या भागात फिरत होते. ते १५ एप्रिलला पहलगामला पोहोचले होते, अशी माहिती आहे.या सात दिवसांत दहशतवाद्यांनी अरु व्हॅलीची रेकी केली, परंतु सुरक्षा दलांचा कॅम्प जवळ असल्याने त्यांनी तो निर्णय बदलला. यानंतर, दहशतवाद्यांनी अरु व्हॅली रस्त्यावरील लिद्दर नदीच्या काठावर असलेल्या अम्युझमेंट पार्कला निवडले होते. परंतु, तेथे गर्दी नसल्याने आणि सुरक्षा दलांच्या उपस्थितीमुळे तसेच जवळील सीसीटीव्ही कॅमेऱ्यांच्या भीतीमुळे त्यांनी आपला विचार बदलला. त्यांनी बेताब खोऱ्याची रेकी देखील केली परंतु सुरक्षा दलांच्या उपस्थितीमुळे आणि सुटकेचे पुरेसे मार्ग नसल्यामुळे तोही प्लॅन रद्द केला.

सूत्रांनी दिलेल्या माहितीनुसार, दहशतवादी त्यांच्या ओव्हरग्राउंड वर्कर्ससोबत १९ एप्रिल रोजी बैसरन येथे पोहोचले होते. त्यांनी बैसरन पार्क आणि आजूबाजूच्या परिसराची रेकी केली. हल्ल्याच्या एक दिवस आधी दहशतवाद्यांनी त्यांच्या ओव्हरग्राउंड वर्करशी संपर्क साधला आणि त्यांना २२ एप्रिल रोजी दुपारी बैसरनला पोहोचण्यास सांगितले.सूत्रांनी दिलेल्या माहितीनुसार, पहलगाम हल्ल्याच्या दहशतवाद्यांना पकडण्यासाठी सुरक्षा दलांची शोध मोहीम सुरू आहे. सुरक्षा दलांनी हल्ला करणाऱ्या दहशतवाद्यांच्या संपर्कात असलेल्या सुमारे २० ओव्हरग्राउंड वर्कर्सची ओळख पटवली आहे. त्यापैकी काही तुरुंगात आहेत. चौघांनी पाकिस्तानी दहशतवाद्यांसाठी मार्गदर्शक म्हणून काम केल्याचा आरोप आहे. हल्ल्याच्या वेळी पहलगाम आणि बैसरनच्या परिसरात पाच ओव्हरग्राउंड वर्कर होते आणि ते फोनवरून दहशतवाद्यांच्या संपर्कात होते.हल्ल्यानंतर त्यांना कुठे पोहोचायचे आहे याची माहिती दहशतवाद्यांच्या एका ओव्हरग्राउंड वर्करने फोनवरून दिली होती. या तपासणीत एका अल्ट्रा-स्टेट कम्युनिकेशन डिव्हाइसमधून दोन सिग्नल देखील आढळले. या उपकरणांद्वारे, ऑडिओ किंवा व्हिडिओ कॉलसाठी सिम कार्डशिवाय मोबाईल फोन कनेक्ट करता येतो आणि संदेश पाठवता येतात. ज्या भागात हे सिग्नल आढळले त्या भागाची कसून तपासणी करण्यात आली आहे आणि तपास सुरू आहे.