न्यायबंद्याची तुरुंगात पोलिसाला ठोश्या बुक्क्यांनी मारहाण, कल्याणच्या आधारवाडी तुरुंगातील घटना.

 कल्याणच्या आधारवाडी तुरुंगात न्यायालयीन कोठडीतील आरोपी सूरज सिंगने पोलीस हवालदार सुनील पाटील यांना मारहाण केली. न्यायालयात सुनावणीदरम्यान न्यायदंडाधिकाऱ्यांशी वाद घातल्यानंतर, सूरजला तुरुंगात आणल्यावर त्याने हवालदार पाटील यांना ठोसे मारले. या प्रकरणी खडकपाडा पोलीस ठाण्यात मारहाण आणि सरकारी कामात अडथळा आणल्याचा गुन्हा दाखल करण्यात आला आहे.कल्याणमधील आधारवाडी तुरुंगात एका न्यायबंदीने (न्यायालयीन कोठडीतला आरोपी) रागाच्या भरात एका पोलीस हवालदाराला ठोश्या बुक्क्यांनी बेदम मारहाण केल्याची घटना सोमवारी घडली. या न्यायबंदीला कल्याण जिल्हा आणि सत्र न्यायालयात एका गुन्ह्यातील सुनावणीच्या कामासाठी पोलीस बंदोबस्तात नेण्यात आले होते. सुनावणीच्या वेळीही या न्यायबंदीने न्यायालयात न्यायदंडाधिकारी यांच्याशी वाद घालण्याचा प्रयत्न केला होता, असे खडकपाडा पोलीस ठाण्यातील तक्रारीत म्हटले आहे. सुरज शंकर सिंग उर्फ विरेंद्र शंकर मिश्रा (वय 29) असे न्यायबंदीचे नाव आहे.तर सुनील लोटन पाटील (वय 57) असे मारहाण झालेल्या पोलीस हवालदाराचे नाव आहे.

पोलीस हवालदार सुनील लोटन पाटील यांनी खडकपाडा पोलीस ठाण्यात दिलेल्या तक्रारीनुसार, गुन्हा दाखल न्यायबंदी सुरज सिंग हा भिवंडी तालुक्यातील सोनाळे गावाचा रहिवासी आहे. सोमवारी दुपारी बारा वाजता सुरज याच्यासह इतर चार न्यायबंदी यांना कल्याण जिल्हा व सत्र न्यायालयात त्यांच्या गुन्ह्यातील सुनावणीसाठी पोलीस बंदोबस्तात पोलीस वाहनातून आणण्यात आले होते. न्यायालय सुरू झाल्यानंतर सुरज आणि इतर न्यायबंदी यांना न्यायालयाच्या सूचनेप्रमाणे न्यायादंडाधिकारी यांच्या समोर हजर करण्यात आले.सुनावणी सुरू असताना न्यायबंदी सुरज हा त्याच्या खटल्यासंदर्भात न्यायदंडाधिकारी यांच्याशी वाद घालू लागला. न्यायालयाने त्याला शांत राहण्याची सूचना केली. बंदोबस्तावरील पोलीस त्याला शांत राहण्यास सांगत होते. पण सुरज ऐकण्यास तयार नव्हता. शेवटी न्यायालयाने आरोपी सुरज याला न्यायदान कक्षाच्या बाहेर नेण्याची सूचना केली. पोलिसांनी सुरजला न्यायदंडाधिकारी यांच्या समोरून हटवून त्याला न्यायदान कक्षाच्या बाहेर आणले.

या गोष्टीचा सुरजला राग आला.न्यायालयातील या प्रकारानंतर सुरज आणि इतर न्यायबंदी यांना आधारवाडी तुरुंगात पुन्हा पोलीस बंदोबस्तात आणण्यात आले.न्यायबंदी सुरजला तुरुंगात आणल्यानंतर त्याला त्याच्या कोठडीत हवालदार पाटील जमा करण्यास चालले होते. त्यावेळी अचानक सुरजने हवालदार पाटील यांच्या कानशिलात मारली. काही क्षणात सुरजने आक्रमक रूप धारण करून रागाच्या भरात हवालदार पाटील यांना छातीवर, पोटावर ठोशाबुक्क्यांनी बेदम मारहाण केली. हा प्रकार सुरू असताना इतर पोलीस कर्मचारी धाऊन आले. त्यांनी सुरजच्या तावडीतून हवालदाल पाटील यांची सुटका केली. सुरजच्या या कृत्याबद्दल त्याच्या विरुद्ध मारहाण आणि सरकारी कामात अडथळा आणल्याची तक्रार खडकपाडा पोलीस ठाण्यात दाखल करण्यात आली आहे.