दोन एसी लोकलमध्ये आधीच तासाहून जास्त अंतर, त्यातच ट्रेन रद्द; मध्य रेल्वेचे प्रवासी भडकले.

मध्य रेल्वेचे अधिकृत यात्री ॲपमधील लोकल वेळापत्रकानुसार, २४ तासांपैकी पाच तास असे आहेत, ज्यात एकही वातानुकूलित लोकल उपलब्ध नाही. त्यादरम्यान तिकीटविक्री कशी होते, असा प्रश्न राजू माने या प्रवाशाने उपस्थित केला आहे. उन्हाळ्यात उपनगरी रेल्वेतील वातानुकूलित (एसी) फेऱ्यांमुळे प्रवाशांना दिलासा मिळत असला तरी त्याचा त्रास त्याहून जास्त सहन करावा लागत आहे. मध्य रेल्वेवर दोन एसी लोकल फेऱ्यांमध्ये एका तासाहून अधिक अंतर आहे. अशात ही लोकल रद्द झाल्यास त्याचा फटका प्रवाशांना बसतो.पश्चिम रेल्वेवर सलग एसी लोकल असतात. त्यामुळे सामान्य लोकलमधील प्रवाशांना साध्या लोकलसाठी प्रतीक्षा करण्याशिवाय पर्याय उरत नाही. मध्य आणि पश्चिम रेल्वेवरील एसी लोकल म्हणजे ‘असून अडचण, नसून खोळंबा’ असा नाराजीचा सूर रेल्वे प्रवाशांचा आहे.

मध्य रेल्वेचे अधिकृत यात्री ॲपमधील लोकल वेळापत्रकानुसार, २४ तासांपैकी पाच तास असे आहेत, ज्यात एकही वातानुकूलित लोकल उपलब्ध नाही. त्यादरम्यान तिकीटविक्री कशी होते, असा प्रश्न राजू माने या प्रवाशाने उपस्थित केला आहे.नियमानुसार रेल्वेचे तिकीट एक तास चालत असेल आणि त्यावेळेत गाडी नसेल तर तिकिटे का विकतात, अशी विचारणा करत त्यांनी ठाणे स्थानकातून धावणाऱ्या एसी लोकल फेऱ्यांचा तपशीलच दिला. ठाण्याहून पहाटे ५.२४ नंतर सकाळी ६.५५, सकाळी ९.२२ नंतर सकाळी १०.२३, दुपारी ३.४६ नंतर सायंकाळी ५.१९, सायंकाळी ५.५६ नंतर सायंकाळी ६.५७, रात्री १०.०८ नंतर ११.२८ या लोकल फेऱ्यांमध्ये एक तासांहून अधिकचे अंतर आहे.दुसरीकडे, मध्य रेल्वेने भिवपुरी रोड आणि कर्जतदरम्यान विद्यूतवाहिनी संबंधित कामे करण्यासाठी रात्रकालीन ब्लॉक घोषित केला आहे.

मंगळवार २९ एप्रिल ते ४ मेच्या मध्यरात्रीपर्यंत हा ब्लॉक असणार आहे. मध्यरात्रीनंतर २ ते ३.३० अशा दीड तासांत हा ब्लॉक असेल. ब्लॉक वेळेत काही मेल-एक्स्प्रेसला पनवेल आणि ठाणे स्थानकात थांबा देण्यात येणार आहे.छत्रपती शिवाजी महाराज टर्मिनस (सीएसएमटी) येथून कर्जतसाठी मध्यरात्रीनंतर ००.१२ वाजता सुटणारी लोकल बदलापूर स्थानकापर्यंतच चालवण्यात येणार आहे. बदलापूर ते कर्जतदरम्यान ही लोकल रद्द राहणार आहे. ब्लॉक कालावधीत रात्री ११.३० सीएसएमटी-कर्जत ही कर्जत स्थानकात पोहोचणारी शेवटची लोकल असणार आहे. कर्जत येथून सीएसएमटीसाठी मध्यरात्रीनंतर २.३० वाजता सुटणारी लोकल बदलापूर स्थानकातून चालवण्यात येणार आहे.ब्लॉकमुळे आठ मेल-एक्स्प्रेस कर्जत – पनवेल – दिवा मार्गे धावणार आहेत. यामुळे मेल-एक्स्प्रेस २०-३० मिनिटे विलंबाने धावतील, अशी माहिती देण्यात आली. गाडी क्रमांक ११०२० भुवनेश्वर – छत्रपती शिवाजी महाराज टर्मिनस, १८५१९ विशाखपट्टणम – लोकमान्य टिळक टर्मिनस, १२७०२ हैदराबाद – छत्रपती शिवाजी महाराज टर्मिनस, १११४० होस्पेट – छत्रपती शिवाजी महाराज टर्मिनस, २२७१८ सिकंदराबाद – राजकोट, १६६१४ कोयंबतूर-राजकोट, २०९६७ सिकंदराबाद-पोरबंदर, १२७५५ काकिनाडा फोर्ट-भावनगर या एक्स्प्रेसचा समावेश आहे.