डोंबिवलीच्या आर्यन जोशीचं तिहेरी यश! अंधत्वावर मात करत वर्ग-१ अधिकारी पदापर्यंत मजल.

 बुद्धिबळ आणि जलतरण स्पर्धांमध्ये राष्ट्रीय आणि आंतरराष्ट्रीय स्तरावर कौशल्य सिद्ध करणाऱ्या या तरुणाने नुकतीच आयआयएम इंदूर येथून एमबीएची पदवी प्राप्त केली आहे.आपल्याकडे जे नाही त्याची खंत न बाळगता जे आहे, त्याचा सर्व क्षमतांसह वापर कल्यास कोणत्याही क्षेत्रात यशाचे शिखर गाठता येते, हे डोंबिवलीतील आर्यन जोशी या अंध तरुणाने स्वकर्तृत्वाने दाखवून दिले आहे. बुद्धिबळ आणि जलतरण स्पर्धांमध्ये राष्ट्रीय आणि आंतरराष्ट्रीय स्तरावर कौशल्य सिद्ध करणाऱ्या या तरुणाने नुकतीच आयआयएम इंदूर येथून एमबीएची पदवी प्राप्त केली आहे. त्याच्या बुद्धिबळ क्रीडा प्रकारातील आंतरराष्ट्रीय स्तरावरील उल्लेखनीय कामगिरीची दखल घेत महाराष्ट्र सरकारच्या क्रीडा विभागाने नुकताच शिवछत्रपती क्रीडा पुरस्कार देऊन त्याचा गौरव केला. त्याचप्रमाणे त्याची वर्ग १ अधिकारी पदावर नियुक्ती केली आहे. सध्या त्याचे प्रशिक्षण सुरू आहे.आर्यनने अंध असूनही सर्वसाधारण विद्यार्थ्यांसमवेत आपले शिक्षण पूर्ण केले.

त्याचप्रमाणे बुद्धिबळ आणि जलतरण स्पर्धांमध्येही त्याने कौशल्य दाखवले. चीनमध्ये झालेल्या आशियाई पॅरागेम्समध्ये बुद्धिबळ स्पर्धेत त्याने भारतासाठी कांस्य पदक मिळवले. तत्पूर्वी ग्रीसमध्ये झालेल्या वर्ल्ड ज्युनिअर चेस ऑलिंम्पियाडमध्येही त्याने बोर्ड-१ वर खेळत देशासाठी कांस्य पदक मिळवले. त्याच्या या कामगिरीची दखल घेत त्याला २०२३-२४ या वर्षासाठी शिवछत्रपती क्रीडा पुरस्कार प्रदान करण्यात आला. तसेच नुकतेच इंदूर येथील आयआयएम संस्थेतून त्याने एमबीए पूर्ण केले.गेल्या ११-१२ वर्षांपासून आर्यन राष्ट्रीय आणि आंतरराष्ट्रीय स्तरावर बुद्धिबळ खेळत आहे. आतापर्यंत त्याने ११ देशांमध्ये भारताचे प्रतिनिधित्व करत अनेक बुद्धिबळ स्पर्धांमध्ये भाग घेतला आहे. गेल्या आठ वर्षांपासून रघुनंदन गोखले त्याला मार्गदर्शन करीत आहेत. बुद्धिबळासोबतच तो एक राष्ट्रीय जलतरणपटूही आहे. या क्रीडा प्रकारात त्याने सुवर्ण, रौप्य आणि कांस्य अशी अनेक पदके पटकावली आहेत.आर्यनच्या त्याचे आई-वडिल, मोठा भाऊ, शाळा-महाविद्यालयातील शिक्षक-प्राध्यापक आणि मित्रांनी सहकार्य केले.

डोंबिवलीतील चंद्रकांत पाटकर शाळेतून त्याने दहावीपर्यंतचे शिक्षण घेतले. त्यानंतर माटुंग्याच्या पोद्दार महाविद्यालयातून वाणिज्य शाखेतील पदवी शिक्षण पूर्ण केले.आर्यनला ‘एमबीए’च्या शिक्षणासाठी सेवा सहयोग संस्थेच्या विद्यार्थी विकास योजनेतून आर्थिक मदत करण्यात आली.शालेय शिक्षणाबरोबरच गेली दहा वर्षे आर्यन बुद्धिबळ खेळत आहे. त्याच्या वडिलांनी त्याला हा खेळ शिकवला. बुद्धिबळाबरोबरच आर्यनने जलतरणातही उत्तम कामगिरी केली आहे. उदयपूर येथे २०१७ आणि २०२२ मध्ये झालेल्या राष्ट्रीय पॅरास्विमिंग स्पर्धेत त्याने उत्तम यश मिळवले. २०१७च्या स्पर्धेत त्याने एक सुवर्ण आणि दोन रौप्य तर २०२२ ला झालेल्या स्पर्धेत त्याने एक सुवर्ण आणि दोन कांस्य पदक मिळवले