तबला पेटी वाजवण्याचा क्लाससाठी एक शाळकरी मुलगा गेला मात्र तो घरी उशीरापर्यंत आला नाही. त्यामुळे कुटुंबियांकडून शोधाशोध झाली. त्यानंतर जे आढळले ते सर्वांसाठी धक्कादायक होते.साताऱ्यात एका लहान मुलाचा मृतदेह शेततळ्यात आढळला त्यामुळे परिसरात खळबळ उडाली आहे. तबला पेटी वाजवण्याचा क्लाससाठी गेलेल्या एका शाळकरी मुलाचा मृतदेह शेततळ्यात आढळून आला. शंभुराज शशिकांत राजमाने (वय 9, रा. मार्डी) असे संबंधित मृत मुलाचे नाव आहे. दहिवडी पोलीस ठाण्यात आकस्मित मृत्यू म्हणून नोंद झाल्याची माहिती सहाय्यक पोलीस निरीक्षक दत्तात्रय दराडे यांनी दिली.
शशिकांत राजमाने यांचा एकुलता एक मुलगा शंभुराज मंगळवारी दुपारी साधारणपणे तीन वाजण्याच्या सुमारास सायकल घेऊन सुनिता चांदकिरण नलावडे यांच्याकडे तबला आणि पेटी वादनाच्या क्लासला गेला होता. रात्री उशिरापर्यंत घरी आला नाही म्हणून पालकांनी नलवडे व त्यांच्या मुलांना विचारणा केली.
त्यावेळी तो आज क्लासलाच आला नाही, असे सांगण्यात आले. त्यानंतर शंभूराजच्या पालकांनी शोधाशोध केली असता तो नलवडे यांच्या घरामागे असणाऱ्या शेततळ्यात त्याचा मृतदेह आढळला. शेततळ्यात पडून मृत्यू झाल्याची माहिती मिळत आहे. तेथे त्याचबरोबर त्याची सायकल आणि चप्पलदेखील शेजारी पडल्याची आढळून आली. या घटनेने राजमाने कुटुंबियांवर शोककळा पसरली आहे.शंभूराजचा क्लास घेणाऱ्या मॅडम या मोही येथील कदम वस्तीवर प्राथमिक शिक्षिका म्हणून कार्यरत आहेत. त्या नुकत्याच कीर्तनकार म्हणून नावारूपाला येत आहेत, त्या अनुषंगाने त्यांनी पेटी व तबला वादनाचा क्लास सुरू केला आहे. त्यांच्याकडे क्लासला ठराविकच मुले येत असतात. त्यात शंभूराज हा सायकल घेऊन आला असता त्यांना आणि त्यांच्या कुटुंबातील सदस्यांना तो दिसला नाही? याबाबत मार्डीमधील नागरिकांकडून शंका उपस्थित केली जात होती.या घटनेची माहिती मिळताच दहिवडी पोलीस घटनास्थळी दाखल झाले. सहाय्यक पोलीस निरीक्षक दत्तात्रय दराडे यांनी रात्रीची वेळ असूनही घटना घडलेल्या शेततळ्याच्या चारीही बाजूने कर्मचाऱ्यांच्या सहकार्याने पाहणी केली. त्याचबरोबर क्लास घेणाऱ्या मॅडमसह इतरांची ही कसून चौकशी केली. या घटनेची आकस्मित मृत्यूची नोंद केली असून अधिक तपास दहिवडी पोलीस करीत आहेत.
Post Views: 5,417
Rajendra Nikam
%20गांधी%20यांचे%20निधन.){kind=link}
