दोघे भाऊ एकत्र गेले, एक परत आलाच नाही, दुसरा गंभीर; नाशिकच्या हॉटेलमध्ये भयंकर घडलं.

नाशिकमध्ये दोन भावांवर मद्यपींकडून हल्ला करण्यात आल्याची घटना समोर आली आहे. यात हल्ल्यात एका भावाचा मृत्यू झाला आहे, तर एक गंभीर जखमी आहे.राज्यभरात मारहाण, चोरीच्या, हत्येच्या घटनांमध्ये मोठी वाढ झाली आहे. दररोज राज्यभरातील विविध भागातून लहान-मोठ्या कारणातून गुन्हेगारीच्या घटना वाढल्याचं चित्र आहे. अशीच एक भयंकर घटना नाशिकमध्ये समोर आली आहे. शहरातील पाथर्डी फाटा परिसरात असलेल्या फाळके स्मारकजवळील एका हॉटेलमध्ये मद्यपींच्या सहा जणांच्या टोळक्याकडून दोन चुलत भावांना मारहाण करण्यात आल्याची घटना रविवारी रात्री घडली आहे.या मारहाणीत राम बोराडे (२०) याचा मृत्यू झाला आहे. तर राजेश बोराडे हा गंभीर जखमी झाला आहे. या प्रकरणी नाशिकच्या इंदिरानगर पोलीस ठाण्यात गुन्हा दाखल करण्यात आला असून या प्रकरणी पोलिसांकडून सहा जणांना अटक करण्यात आली आहे.

पोलिसांनी दिलेल्या माहितीनुसार, हॉटेलमध्ये पाच ते सहा मद्यपी बसले होते. तिथेच दोघे चुलत भाऊदेखील बसले होते. तेथील मद्यपींकडून आमच्याकडे रागाने का बघतो म्हणून दोन चुलत भावांशी वाद घालण्याचा प्रयत्न झाला. हा वाद टोकाला पोहोचला. वाद इतका टोकाला पोहोचला, की त्याचं रूपांतर नंतर हाणामारीत झालं.पाच ते सहा मद्यपींच्या टोळक्याकडून कोयत्याने दोन भावांवर वार करण्यात आले. राम बोराडे आणि त्याचा चुलत भाऊ राजेश बोराडे या दोघांवर पाच ते सहा जणांनी कोयत्याने सपासप वार करण्यात केले. या हल्ल्यामध्ये राम बोराडे याचा जागीच मृत्यू झाला असून राजेश बोराडे हा गंभीर जखमी झाला आहेत. त्याच्यावर स्थानिक रुग्णालयात उपचार सुरू आहेत.दोन भावांवर हल्ला केल्यानंतर या टोळक्याने परिसरातील काही चारचाकी वाहनांची देखील तोडफोड करत दहशत माजवण्याचा प्रयत्न केला. त्यामुळे या घटनेची गंभीर दखल पोलिसांनी घेतली आहे. घटनेची माहिती मिळताच पोलीस उपायुक्त मोनिका राऊत, सहाय्यक पोलीस आयुक्त शेखर देशमुख यांच्यासह पोलीस कर्मचारी घटनास्थळी दाखल झाले होते. या प्रकरणी इंदिरानगर पोलीस ठाण्यात गुन्हा दाखल करण्यात आला आहे. सहा संशयितांना अटक करण्यात आल्याचा दावा केला आहे.