रायगड आणि नाशिकच्या पालकमंत्रिपदाचा तिढा अद्याप कायम आहे. केंद्रीय गृहमंत्री अमित शहा नुकतेच रायगडचा दौरा करुन गेले. पण तरीही पालकमंत्रिपदाचा तिढा सुटलेला नाही.रायगड आणि नाशिकच्या पालकमंत्रिपदाचा तिढा अद्याप कायम आहे. केंद्रीय गृहमंत्री अमित शहा नुकतेच रायगडचा दौरा करुन गेले. पण तरीही पालकमंत्रिपदाचा तिढा सुटलेला नाही. शहा यांनी रायगडमध्ये जाऊन राष्ट्रवादी काँग्रेसचे प्रदेशाध्यक्ष आणि खासदार सुनील तटकरेंची भेट घेतली. मात्र त्यानंतरही पालकमंत्रिपदाचा पेच कायम आहे.रायगडच्या पालकमंत्रिपदामुळे नाशिकचं पालकमंत्रिपद अडल्याची नवी माहिती समोर आली आहे. नाशिकच्या पालकमंत्रिपदी गिरीश महाजन आणि रायगडच्या पालकमंत्रिपदी अदिती तटकरेंची वर्णी लागली होती. पण शिवसेनेनं आक्षेप घेत आक्रमक पवित्रा घेतला. दोन्ही जिल्ह्यांच्या पालकमंत्रिपदावर सेनेनं दावा सांगितल्यानं मुख्यमंत्री देवेंद्र फडणवीस यांनी दोन्ही जिल्ह्यांच्या पालकमंत्र्यांच्या नियुक्त्यांना स्थगिती दिली. त्या घडामोडीला आता जवळपास तीन महिने होत आले आहेत.

आता रायगडमुळे नाशिकचं पालकमंत्रिपद लटकलं आहे. अमित शहा नुकतेच रायगडला येऊन सुनील तटकरेंच्या घरी येऊन गेले. या सगळ्या घडामोडी पाहता रायगडचं पालकमंत्रिपद पुन्हा एकदा अदिती तटकरेंकडे जाण्याची शक्यता आहे. सेनेचे भरत गोगावले रायगडच्या पालकमंत्रिदासाठी उत्सुक आहेत. जिल्ह्यात सेनेचे तीन आमदार आहेत. गोगावलेंच्या नावाला त्यांचा पाठिंबा आहे. तर जिल्ह्यात राष्ट्रवादीच्या केवळ १ आमदार आहेत. त्या खुद्द अदिती तटकरेच आहेत.रायगडचं पालकमंत्रिपद पुन्हा तटकरेंकडे गेल्यास नाशिकच्या पालकमंत्रिदावर दावा सांगायचा अशी रणनिती उपमुख्यमंत्री एकनाथ शिंदे यांच्या शिवसेनेनं आखली आहे. नाशिकचं पालकमंत्रिपद आधी भाजपच्या गिरीश महाजनांना देण्यात आलं होतं. २०२७ मध्ये नाशकात कुंभमेळा होणार आहे. कुंभमेळा मंत्री असलेले महाजन नाशिकचं पालकमंत्रिपददेखील स्वत:कडे राखण्यास उत्सुक आहेत.

 

पण शिवसेनाही नाशिकसाठी आग्रही आहे.रायगडचं पालकमंत्रिपद देणार नसाल तर मग नाशिकचं द्या, अशी भूमिका सेनेनं घेतली आहे. नाक दाबलं की तोंड उघडतं, असा सेनेचा प्लान दिसतो. नाशिकच्या पालकमंत्रिपदासाठी राष्ट्रवादी काँग्रेसचे छगन भुजबळ, माणिकराव कोकाटे, शिवसेनेचे दादा भुसे आणि भाजपचे गिरीश महाजन स्पर्धेत होते. पैकी भुजबळांना मंत्रिमंडळात संधीच मिळाली नाही. त्यामुळे त्यांचं नाव स्पर्धेतून बाद झालं. कृषिमंत्री असलेले माणिकराव कोकाटे वादग्रस्त विधानं आणि शासनाच्या सदनिका घोटाळ्यावरुन सुरु असलेली न्यायालयीन प्रक्रिया यांच्यामुळे अडचणीत आहेत.राष्ट्रवादी काँग्रेस नाशिकच्या पालकमंत्रिपदावरुन मागे पडलेली असताना रायगडचं नुकसान नाशिकमध्ये भरुन काढण्याची तयारी सेनेनं सुरु केली आहे. मागील सरकारमध्ये नाशिकचं पालकमंत्रिपद दादा भुसे यांच्याकडे होतं. ते आता शिक्षणमंत्री आहेत. त्यांना पालकमंत्रिपद मिळावं यासाठी शिवसेना आग्रही आहे. तर कुंभमेळ्याच्या पार्श्वभूमीवर भाजपला नाशिकचं पालकमंत्रिपद हवं आहे. त्यामुळे तिढा कायम आहे.रायगडचं पालकमंत्रिपद शिवसेनेकडे गेल्यास नाशिकचं पालकमंत्रिपद भाजपकडेच राहील. या पदावर महाजन यांचीच वर्णी लागेल. पण जर रायगडचं पालकमंत्रिपद राष्ट्रवादीला गेलं तर शिवसेना नाशिकच्या पालकमंत्रिपदासाठी आग्रही असेल. दोनपैकी एक पालकमंत्रिपद आम्हाला हवं, ही सेनेची भूमिका आहे. रायगडचं पालकमंत्रिपद अदिती तटकरेंकडे गेल्यास नाशकात तिढा निर्माण होईल आणि भाजपला आपल्या कोट्यातील एक पालकमंत्रिपद सोडावं लागेल.