खडवली परिसरातील ‘पसायदान विकास संस्था’ या अवैध वसतिगृहात बालकांना मारहाण करण्यात आल्याची तसेच लैंगिक अत्याचार होत असल्याची धक्कादायक बाब उजेडात आली आहे.खडवली परिसरातील ‘पसायदान विकास संस्था’ या अवैध वसतिगृहात बालकांना मारहाण करण्यात आल्याची तसेच लैंगिक अत्याचार होत असल्याची धक्कादायक बाब उजेडात आली आहे. जिल्हा प्रशासनाने कारवाई करत २९ बालकांची सुटका केली आहे. याप्रकरणी संस्थेचा संचालक बबन शिंदे याच्यासह अन्य चौघांना बाल न्याय अधिनियम २०१५ आणि पोक्सोअंतर्गत गुन्हा दाखल करत अटक करण्यात आली आहे.जिल्हाधिकारी कार्यालयाने दिलेल्या माहितीनुसार, चाइल्ड हेल्पलाइनवर खडवली येथील ‘पसायदान विकास संस्थे’बाबत तक्रार आली होती. जिल्हा महिला व बाल विकास अधिकारी कार्यालयाच्या पथकाने तातडीने ११ एप्रिल रोजी पोलिसांना सोबत घेऊन संस्थेची पाहणी केली. या दरम्यान बालकांच्या शरीरावर मारहाणीच्या जखमा आढळून आल्या, तसेच लहान बालिकांवर लैंगिक अत्याचार झाल्याचे दिसून आले. या गंभीर प्रकाराची दखल घेत पोलिसांनी तत्काळ कारवाई करत संस्थेत असलेल्या २९ बालकांची सुटका केली.

यामध्ये २० मुली आणि नऊ मुलांचा समावेश आहे. सुटका केलेल्या सर्व बालकांना बाल कल्याण समितीसमोर सादर करत, बालकांच्या देखरेखीबाबत निर्णय घेण्यात आला.या प्रकरणी, संस्था संचालक बबन नारायण शिंदे, त्याची पत्नी आशा शिंदे, संचालक मुलगा प्रसन्न शिंदे, त्यांना मदत करणारे प्रकाश सुरेश गुप्ता आणि दर्शना लक्ष्मण पंडित या पाच जणांविरोधात गुन्हा दाखल करण्यात आला. टिटवाळा पोलिसांनी त्यांना अटक केली आहे. हे पाचही जण खडवली परिसरात राहणारे आहेत.सुटका करण्यात आलेली मुले शाळेत शिक्षण घेत असून त्यांची परीक्षा लक्षात घेता त्या दृष्टीने व्यवस्था करण्याच्या सूचना देण्यात आल्या आहेत.

या मुलांची वैद्यकीय तपासणी करून त्यांना उल्हासनगर येथील मुलींचे विशेषगृह/बालगृह तसेच कनिष्ठ व वरिष्ठ मुलांचे शासकीय बालगृह येथे सुरक्षित दाखल करण्यात आल्याची माहिती महिला व बाल विकास अधिकारी संतोष भोसले यांनी दिली.चार दिवसांच्या कोठडीत रवानगी अटक केलेल्या सर्व आरोपींना कल्याण न्यायालयाने चार दिवसांची पोलिस कोठडी सुनावल्याची माहिती टिटवाळा पोलिस ठाण्याचे वरिष्ठ पोलिस निरीक्षक सुरेश कदम यांनी दिली.