पुण्यातील ४६ वर्षीय कॅब चालक ब्रेन डेड, जाता-जाता तिघांना जीवदान; दोन तासांत हृदय मुंबईला

पुण्यातील वडगाव शेरी येथील ४६ वर्षीय कॅब चालकावर केईएम रुग्णालयात उपचार सुरू होते. उपचारादरम्यान रक्तस्राव झाल्याने डॉक्टरांनी रुग्णाला आठ मार्चला मेंदूमृत घोषित केले.पुण्यातील ४६ वर्षीय कॅब चालकाला उपचारादरम्यान डॉक्टरांनी मेंदूमृत (ब्रेन डेड) घोषित केले. या मेंदूमृत कॅब चालकाच्या अवयवदानामुळे मूत्रपिंड, यकृत आणि हृदयविकाराच्या रुग्णांना जीवनदान मिळाले आहे. मूत्रपिंड, यकृत पुण्यातील रुग्णांना देण्यात आले आहे. मुंबईतील रुग्णासाठी ग्रीन कॉरिडॉरद्वारे दोन तासांमध्ये हृदय पाठविण्यात यश आले आहे.पुण्यातील वडगाव शेरी येथील ४६ वर्षीय कॅब चालकावर केईएम रुग्णालयात उपचार सुरू होते. उपचारादरम्यान रक्तस्राव झाल्याने डॉक्टरांनी रुग्णाला आठ तारखेला मेंदूमृत घोषित केले. या रुग्णाच्या पश्चात वडील, पत्नी, दोन मुलगे असा परिवार आहे.परिवारातील कुटुंबीयांनी अवयवदानाला संमती दिल्याने अवयवदानाचा निर्णय घेण्यात आला. केईएम रुग्णालयातच अवयवदान करण्यात आले.

पुणे विभागीय प्रत्यारोपण समन्वय समितीच्या (झेडटीसीसी) नियमानुसार आणि प्रतीक्षा यादीनुसार रुग्णांना अवयव देण्यात आले.एक किडनी पुण्यातील केईएम हॉस्पिटलमध्ये ४१ वर्षांच्या महिलेला देण्यात आली. दुसरी किडनी पुण्यातील सिम्बायोसिस हॉस्पिटलमधील ५६ वर्षांच्या महिलेला देण्यात आली. सह्याद्री सुपर स्पेशालिटी हॉस्पिटलमधील ५७ वर्षांच्या महिलेला यकृत देण्यात आले.मुंबईतील जसलोक हॉस्पिटल येथील ५४ वर्षीय रुग्णाला हृदय देण्यात आले. झेडटीसीसी मुंबईच्या समन्यवयाने हृदय पाठविण्यात आले. वाहतूक पोलिसांच्या मदतीने बुधवारी ग्रीन कॉरिडॉरद्वारे अवघ्या दोन तासांत हृदय मुंबईला पोहचिविण्यात यश आले.मेंदूमृत व्यक्तीचे अवयवदान सर्वसाधारणपणे नेहमीच होते, मात्र अपघातानंतर उपचार घेत असलेल्या तरुणाचे हृदय बंद पडल्यानंतर करण्यात आलेल्या अवयवदानाने गेल्याच महिन्यातही दोघांना नवे आयुष्य मिळाले. विठ्ठल काटोले (वय ३२) रा. पारडसिंगा मध्य प्रदेश असे अवयवदात्या तरुणाचे नाव आहे.हातमजुरीचे काम करणाऱ्या विठ्ठलच्या मागे आई दुर्गा आहे.

२८ फेब्रुवारी रोजी दुचाकी घसरून झालेल्या अपघातात विठ्ठल गंभीर जखमी झाला. १ मार्च रोजी त्याला एम्स नागपूर येथे दाखल करण्यात आले. मात्र प्रकृतीत सुधारणा होत नव्हती. ७ मार्च रोजी त्याचे हृदय बंद पडले. त्यामुळे डॉ. मनीष श्रीगिरीवार, डॉ. अमोल भवाने, डॉ. चंद्रकांत मुंजेवार या तज्ज्ञांच्या चमूने त्याला मृत घोषित केले. मात्र हृदय बंद पडले तरी अवयवदान करता येते, त्यामुळे एम्समधील समन्वयक प्रीतम त्रिवेदी, गजानन गित्ते आणि पूजा सुलानिया यांनी त्याची आई दुर्गा यांना अवयवदानाचे महत्त्व समजावून सांगितले. त्यांनी संमती दिल्यावर झेडटीसीसीला कळविण्यात आले. तेथील समन्वयक दिनेश मंडपे यांनी प्रतीक्षा यादीनुसार अवयव वाटप निश्चित केले.एम्समध्ये दाखल एका ४७ वर्षाच्या महिलेवर आणि ३२ वर्षाच्या पुरुष रुग्णावर त्याच्या किडन्यांचे प्रत्यारोपण करण्यात आले. तेथीलच नेत्रपेढीला नेत्रदान करण्यात आले. झेडटीसीसीचे अध्यक्ष डॉ. संजय कोलते, सचिव डॉ. राहुल सक्सेना यांनी या अवयवदानासाठी पुढाकार घेतला.