लेक शेततळ्यात पडला, वडिलांनी पोहता येत नसतानाही मुलाला वाचवलं; पण स्वत: बाहेर येऊ शकले नाही, कुटुंबावर शोककळा.

शेततळ्यात काम करताना लेक पाण्यात पडला, वडिलांना पोहता येत नसतानाही त्यांनी मुलाला वाचवलं. पण ते स्वत:ला पोहता येत नसल्याने वाचवू शकले नाहीत.शेततळ्यातून पाईप काढताना मुलगा पाय घसरून शेततळ्यात पडला. लेकाला वाचवण्यासाठी पोहता येत नसताना देखील वडिलांनी शेततळ्यात उडी मारली. अथक प्रयत्नांनी त्यांनी मुलाला वाचवलं. मात्र मुलाला वाचवताना पोहता न आल्याने वडिलांचा मृत्यू झाला. ही घटना फुलंब्री तालुक्यातील पाल शिवारात गट क्रमांक ५२ मध्ये घडली. याप्रकरणी फुलंब्री पोलीस स्टेशनमध्ये आकस्मित मृत्यूची नोंद करण्यात आली आहे.किशोर तेजराव जाधव, वय ४२ रा. पाल तालुका फुलंब्री जिल्हा छत्रपती संभाजीनगर असं मृत व्यक्तीचं नाव आहे. या प्रकरणी अधिक माहिती अशी की, फुलंब्री तालुक्यातील पाल शिवारात गट क्रमांक ५२ मध्ये किशोर जाधव यांची पाच एकर शेती आहे. शेतीला पाणी मिळावं यासाठी जाधव यांनी एक एकरमध्ये शेततळं तयार केलं. शेततळे तुडुंब भरलं आहे. किशोर जाधव यांचा मुलगा शेततळ्यातून पाईप बाहेर काढत असताना पाय घसरून तळ्यात पडला.

मुलगा पडल्याचं किशोर यांनी पाहिलं. मुलाला वाचवण्यासाठी पोहता येत नसतानाही किशोर यांनी शेततळ्यात उडी घेतली. अथक परिश्रमानंतर कसंबसं मुलाला कठड्यापर्यंत आणलं. यावेळी भाच्याने मामेभावाला हात देऊन बाहेर काढलं.मात्र पोहता येत नसल्यामुळे किशोर जाधव हे बाहेर येऊ शकले नाही. किशोर हे पाण्यात बुडत असताना मुलगा आणि भाच्याने मदतीसाठी प्रयत्न केले, मात्र त्यांना यश आलं नाही. त्यांनी आरडाओरड करत गावात जाऊन ही माहिती दिली. घटनेचे गांभीर्य लक्षात घेताच ग्रामस्थांनी तातडीने अग्निशामक विभागाला पाचारण केलं. तब्बल एक तासानंतर अग्निशामक दलाची गाडी आली, तोपर्यंत मात्र किशोर जाधव यांचा मृत्यू झाला होता.

अग्निशामक विभागाच्या कर्मचाऱ्यांच्या मदतीने मृतदेह बाहेर काढून फुलंब्री येथील ग्रामीण रुग्णालयात शवविच्छेदन करण्यासाठी पाठवण्यात आला आहे. मृत किशोर जाधव यांच्या पश्चात पत्नी, दोन मुलं, आई – वडील असं कुटुंब आहे. या घटनेमुळे गावात हळहळ व्यक्त करण्यात आली आहे. या प्रकरणी फुलंब्री पोलीस ठाण्यामध्ये आकस्मित मृत्यूची नोंद करण्यात आली असून पुढील तपास जमादार कैलास राठोड करत आहे.