नागपुरातील भाजप कार्यालयासाठी गडकरी अन् फडणवीसांकडून ‘इतक्या’ लाखांची मदत; बावनकुळेंकडून गुप्त देणगी.

भारतीय जनता पक्षाच्या स्थापनादिनी पक्ष कार्यालयाचा मुहूर्त निघाला आणि उपराजधानीत नेत्यांनी सढळ हस्ते दातृत्वाचा परिचय करून दिला.कार्यालयाच्या बांधकामावर देखरेख आणि निधी संकलनासाठी एक समिती स्थापन करण्यात येईल. या माध्यमातून प्रकल्प उभारण्यात येणार आहे, असे कोषाध्यक्ष राजेश बागडी यांनी सांगितले.भारतीय जनता पक्षाच्या स्थापनादिनी पक्ष कार्यालयाचा मुहूर्त निघाला आणि उपराजधानीत नेत्यांनी सढळ हस्ते दातृत्वाचा परिचय करून दिला. केंद्रीय मंत्री नितीन गडकरी यांनी २५ लाख तर, मुख्यमंत्री देवेंद्र फडणवीस यांनी पाच लाख रुपयांची देणगी जाहीर केली. महसूल व नागपूरचे पालकमंत्री आणि प्रदेशाध्यक्ष चंद्रशेखर बावनकुळे यांचे ‘दान’ सद्यस्थितीत गुप्त आहे.भाजपच्या शहर, जिल्हा व विदर्भ विभागीय कार्यालयाचे भूमिपूजन या तिन्ही नेत्यांच्या हस्ते पक्षाचा स्थापनादिन आणि रामनवमीचा मुहूर्त साधून करण्यात आले.

यावेळी देणगीची घोषणा नेत्यांनी केली. अतिशय प्रतिकूल परिस्थितीपासून ग्रामीण कार्यालयाची जबाबदारी आनंदराव ठवरे यांनी एक लाख रुपयांची घोषणा करून सुरुवात केली. यानंतर नेतेही सरसावले. आमदार कृष्णा खोपडे, जिल्हाध्यक्ष सुधाकर कोहळे, शहराध्यक्ष बंटी कुकडे, माजी आमदार टेकचंद सावरकर, बच्छराज व्यास ट्रस्टच्यावतीने माजी आमदार गिरीश व्यास व संजय भेंडे, प्रभाकरराव दटके ट्रस्टच्यावतीने आमदार प्रवीण दटके यांनी प्रत्येकी एक लाख रुपयांची घोषणा केली. उपराजधानीतील आघाडीचे बिल्डर व स्थायी समितीचे माजी अध्यक्ष विक्की कुकरेजा यांना अकरा लाख रुपयांची देणगी जाहीर केली.

व्यापारी मोर्चाचे विनय जैन यांनी ५१ हजार रुपये देणगी दिली.प्रदेशाध्यक्ष चंद्रशेखर बावनकुळे यांनी सर्व जिल्ह्यातील कार्यालयाचे बांधकाम करण्यात येत असल्याचे जाहीर केले. उपराजधानीतील कार्यालय सुमारे ४० कोटी रुपयांचे आहे. दोन मजली पार्किंग राहणार असून त्यावर नऊ मजले राहतील. दिल्लीतील वरिष्ठांच्या सूचनेनुसार कार्यालयाची रचना करण्यात आली आहे. आर्किटेक्टदेखील राजधानीतील असल्याचे समजते. सुमारे ४० हजार चौरस फूट परिसरात पावणे दोन लाख चौरस फुटाचे बांधकाम करण्यात येणार आहे. येत्या दोन वर्षात हा प्रकल्प पूर्ण करण्याचे नियोजन आहे.कार्यालयाच्या बांधकामावर देखरेख आणि निधी संकलनासाठी एक समिती स्थापन करण्यात येईल. या माध्यमातून प्रकल्प उभारण्यात येणार आहे, असे कोषाध्यक्ष राजेश बागडी यांनी सांगितले