ज्यांच्यामुळे तनिषाची ‘हत्या’, त्यांच्यावर २४ तासात कारवाई व्हावी; सुप्रिया सुळे कडाडल्या.

पुण्यातील तनिषा भिसे मृत्यू प्रकरणाने संपूर्ण राज्यात खळबळ माजली आहे. राष्ट्रवादी शरद पवार गटाच्या खासदार सुप्रिया सुळे यांनी आज भिसे कुटुंबाची भेट घेतली. यावेळी त्यांनी तात्काळ संबंधित डॉक्टरांवर कारवाईची मागणी केली आहे.पुण्याच्या नामांकित दीनानाथ मंगेशकर रुग्णालयात उपचार नाकारल्याने तनिषा भिसेंचा प्रसूतीवेळी मृत्यू झाला. त्यांनी जुळ्यांना जन्म दिला आणि त्यानंतर त्यांचा मृत्यू झाला. याप्रकरणात दीनानाथ रुग्णालयावर मोठे आरोप करण्यात आले आहेत. तर, रुग्णालयातील डॉ. सुश्रूत घैसास यांनी प्रसूतीसाठी २० लाख मागितल्याचा आरोप आहे. यादरम्यान डॉ. सुश्रूत घैसास यांनी आज स्वत:हून राजीनामा दिला.

याप्रकरणी राष्ट्रवादी शरद पवार गटाच्या खासदार सुप्रिया सुळे यांनी आज भिसे कुटुंबाची भेट घेतली. त्यानंतर त्यांनी माध्यमांशी संवाद साधताना तनिषा भिसे यांच्या मृत्यूचा हत्या असा उल्लेख केला. ही हत्या असल्याचं त्या म्हणाल्या.”याप्रकरणाचा अहवाल आला आहे. त्यात दिसतंय की रुग्णालयाची चूक आहे. त्यामुळे त्यांच्यावर गुन्हा दाखल झाला पाहिजे. २४ तासांच्या आत आम्हाला त्या डॉक्टर आणि त्या सगळ्या ज्या लोकांमुळे ही हत्या झाली आहे, त्यांच्यावर कारवाई झालेली पाहिजे. एका समितीचा अहवाल आला आहे. आता काय. दहा समित्यांच्या अहवालाची वाट बघणार का सरकार? वाट कुणाची बघताय, जीव गेला आहे कुणाचातरी, लेक आहे, बायको आहे, आई आहे, बहीण आहे. कधीतरी या सरकारने थोडासा संवेदनशीलपणा दाखवावा”.”त्या दोन मुली आता आयसीयूमध्ये आहेत. त्यांची प्रकृती गंभीर आहे. ते वडील आणि ते कुटुंब कुठल्या दु:खातून जातंय, हे सहन करणं अशक्य आहे. देव त्यांना या अडचणीच्या काळात ताकद देवो”.”ज्या पद्धतीने तिच्यावर अन्याय झाला तिची हत्या झाली, त्यांची लेक आम्ही आणू शकत नाही, पण त्यांना थोडासा आधार देण्यासाठी आम्ही इथे आलो होतो. या कुटुंबावर जो घात झाला आहे, त्या मुलीची हत्या झाली आहे, या महाराष्ट्रातील कुठल्याही लेकीवर हा दिवस येऊ नये यासाठी मी इथे आले आहे. या हत्येसाठी प्रत्यक्ष-अप्रत्यक्षपणे जो कोणी जबाबदार असेल त्याच्यावर कारवाई झाली पाहिजे”, असं म्हणत सुप्रिया सुळे यांनी संताप व्यक्त केला.