‘ती’ कृती शोभणारी नाही; दीनानाथ रुग्णालय प्रकरणावरुन मेधा कुलकर्णींचा भाजपला घरचा आहेर.

नुकसानभरपाई दिल्यास पदाची व पक्षाची प्रतिष्ठा वाढेल, अशा शब्दांत राज्यसभा खासदार प्रा. डॉ. मेधा कुलकर्णी यांनी भारतीय जनता पक्षाला घरचा आहेर दिला.‘दीनानाथ मंगेशकर रुग्णालयाशी संबंधित तनिषा भिसे यांच्या दुर्दैवी मृत्यूनंतर आवश्यक माहिती न घेताच भारतीय जनता पक्षाच्या महिला मोर्चा सदस्यांनी केलेले वर्तन आणि कृती पक्षाला निश्चितच शोभणारी नाही. त्यामुळे शहराध्यक्षांनी संबंधितांना समज द्यावी. यासोबत दिलगिरी व्यक्त करून नुकसानभरपाई दिल्यास पदाची व पक्षाची प्रतिष्ठा वाढेल,’ अशा शब्दांत राज्यसभा खासदार प्रा. डॉ. मेधा कुलकर्णी यांनी भारतीय जनता पक्षाला घरचा आहेर दिला.या प्रकरणासंदर्भात प्रा. डॉ. कुलकर्णी यांनी भाजपचे शहराध्यक्ष धीरज घाटे यांना खरमरीत पत्र लिहून संबंधितांना योग्य समज देण्याची मागणी केली आहे. ‘इतरांचे वर्तन हा आपला विषय नाही. मात्र, डॉ. सुश्रुत घैसास यांच्या वडिलांचे क्लिनिक फोडणे हे भाजपच्या महिला मोर्चाच्या अध्यक्षा व अन्य पदाधिकाऱ्यांना निश्चितच शोभले नाही.

कार्यकर्त्यांनी कायदा हातात घेऊन करण्याचे हे काम नाही. घैसास यांच्या क्लिनिकचा या घटनेशी काहीही संबंध नसताना केलेले तोडफोडीचे कृत्य अनेकांच्या जिव्हारी लागले आहे,’ असे या पत्रात म्हटले आहे.या कृत्याबाबत मोठी नाराजी आहे. पक्षाची, व्यक्तीची राजकीय प्रतिमा बनवण्यासाठी वेळ लागतो; परंतु अशा काही गोष्टींमुळे प्रतिमा डागाळते. विनाकारण एखाद्या व्यक्तीचे, समूहाचे व विशिष्ट समाजाचेही कायमस्वरूपी नुकसान होऊ शकते, याकडे प्रा. डॉ. कुलकर्णी यांनी लक्ष वेधले आहे.

गर्भवतीचा मृत्यू अत्यंत दुर्दैवी आहे. असा प्रसंग कोणावरही येऊ नये. दीनानाथ मंगेशकर रुग्णालयाने याबाबत खुलासा केल्याचेही कुलकर्णी यांनी सांगितले.‘आंदोलनाच्या इतर सभ्य पद्धती आहेत. त्याचा अवलंब करणे विचारधारेला धरून ठरले असते. वैद्यकीय क्षेत्रात बऱ्यावाईट गोष्टी असल्या, तरी समाजात चांगले डॉक्टरही आहेत. सवंग प्रसिद्धीच्या मागे लागून पुढे जाण्याचे किंवा इतर अनेक सोपे मार्ग निवडण्याचे मोह कार्यकर्त्यांनी टाळले पाहिजेत, हे शहराध्यक्ष म्हणून आपण समजावून सांगाल आणि महिला मोर्चा पदाधिकाऱ्यांना समज देऊन आपल्या पदाचा समजदारपणे व विनम्रतेने वापर करण्यास सांगाल, अशी मला आशा आहे. त्यालाच नुकसानभरपाई व दिलगिरीची जोड दिल्यास पदाची आणि पक्षाची प्रतिष्ठा वाढेल,’ असे निरीक्षण कुलकर्णी यांनी नोंदविले आहे.