सकाळी खरेदीसाठी गेले, संध्याकाळी नवरदेवाचं टोकाचं पाऊल; लग्नाच्या १२ दिवस आधी काय घडलं? कुटुंबावर शोककळा.

जालन्यात तरुण शेतकऱ्याने लग्नाच्या १२ दिवस आधी टोकाचं पाऊल उचलल्याने दोन्ही कुटुंबावर शोककळा पसरली आहे. या घटनेने परिसरात हळहळ व्यक्त होत आहे.जालन्यातून अतिशय धक्कादायक बातमी समोर आली आहे. अंबड तालुक्यातील डोमेगाव या गावातील अत्यंत हृदयद्रावक घटना घडली आहे. डोमेगाव या गावातील राम पांडुरंग धाईत, २७ वर्ष, या तरुण शेतकऱ्याने आपल्या शेतामध्ये झाडाला गळफास घेतला आहे. त्याचं काही दिवसांवर लग्न येऊन ठेपलं होतं. घरात लग्नाची तयारी सुरू होती. पण तरुणाच्या मनात नेमकं काय सुरू आहे, याची कोणालाही कल्पना नव्हती. कुटुंबात लग्न होणार असल्याचा आनंद असताना दुसरीकडे मात्र लग्नाच्या काही दिवस आधी तरुणाने आयुष्य संपवलं.अंबड तालुक्यातील डोमेगाव येथील राम पांडुरंग येथे शेतकरी कुटुंबातील तरुणाने बीएपर्यंत शिक्षण घेतलं होतं. नुकतंच त्याचं लग्न जमलं होतं. मंठा तालुक्यातील तळणी येथील एका मुलीशी मंगळवारी, १५ एप्रिल रोजी त्याचं लग्नसोहळा पार पडणार होता. दोन्ही कुटुंब लग्नाच्या तयारीमध्ये होते.

लग्नाच्या खरेदीसाठी तरुणाच्या घरचे कुटुंबीय आणि नवरीकडील कुटुंब अशी दोन्हीकडील मंडळी जालना येथील एका दुकानामध्ये लग्नाचा बस्ता बांधण्यासाठी आले होते. दोन्ही कुटुंबांनी लग्नाची खरेदी केली आणि आपापल्या घरी परतले. खरेदीवेळी रामदेखील उपस्थित होता.राम आणि त्याचे कुटुंबीय खरेदी करुन सायंकाळी आपल्या गावी डोमेगाव येथे परतले. घरी आल्यानंतर संध्याकाळी सात वाजण्याच्या सुमारास रामने बाहेर चक्कर मारुन येतो असं सांगितलं आणि तो घराबाहेर पडला. संध्याकाळी बाहेर पडलेला राम बराच वेळ झाला तरी घरी परतला नाही. त्यामुळे त्याच्या भावाने त्याला अनेक कॉल केले. फोनची रिंग वाजत होती, पण राम काही फोन उचलत नव्हता.

त्यामुळे त्यांनी आजूबाजूला त्याचा शोध घेण्यास सुरुवात केली. त्याच्या जवळच्या मित्रांना फोन करुन विचारलं असता त्यांच्याकडेही रामचा पत्ता लागला नाही.अखेर कुटुंबातील एका व्यक्तीने गावाजवळच असलेल्या गट नंबर १७३ मधील शेतात जाऊन पाहिलं. तिथे एका लिंबाच्या झाडाला राम दोरीने गळफास घेतलेल्या अवस्थेत दिसून आला. या घटनेने कुटुंबीयांच्या पायाखालची जमिनच सरकली. त्यानंतर कुटुंबीयांनी तात्काळ घटनेची माहिती पोलिसांना दिली. पोलीस घटनास्थळी दाखल झाले आणि रामला ग्रामस्थ आणि नातलगांच्या मदतीने अंबड येथील ग्रामीण रुग्णालयांमध्ये दाखल केलं. तपासणी करुन डॉक्टरांनी त्याला मृत घोषित केलं. लग्न अवघ्या १० दिवसांवर येऊन ठेवलं असताना रामने आत्महत्येचं टोकाचं पाऊल का उचललं असं प्रश्न उपस्थित झाला आहे.