भारदस्त आवाजाची देणगी लाभलेला उत्कृष्ट अभिनेता मराठी सिनेइंडस्ट्रीनं गमावला.

चार दिवस सासूचे, दामिनी आणि वादळवाट सारख्या टीव्ही मालिकांमधून आपल्या अभिनयाची छाप सोडणारे लोकप्रिय अभिनेते डॉ. विलास उजवणे यांचं निधन झालं आहे.मुंबई: मूळ नागपूरकर आणि मराठी नाट्य, दूरचित्रवाणी व चित्रपट अभिनेते डॉ. विलास उजवणे यांचं शुक्रवारी दुपारी मुंबई इथं निधन झालं. आज शनिवारी त्यांच्या पार्थिवावर अंत्यसंस्कार करण्यात येणार आहेत. डॉ. उजवणे यांच्या पश्चात पत्नी अंजली आणि मुलगा कपिल आहे. डॉ. उजवणे यांनी बोरिवली येथील ओम हॉस्पिटल इथं अखेरचा श्वास घेतला.भारदस्त आवाजाची देणगी लाभलेला उत्कृष्ट अभिनेता म्हणून डॉ. उजवणे यांनी आपली ओळख निर्माण केली होती. ‘वादळवाट’ या गाजलेल्या मालिकेसह अनेक नाटके, दूरचित्रवाणीच्या मालिका आणि विविध चित्रपटांमध्ये त्यांनी दमदार भूमिका केल्या होत्या.

डॉ. विलास उजवणे यांनी ‘चार दिवस सासूचे’, ‘दामिनी’, ‘वादळवाट’ यांसारख्या लोकप्रिय मालिकांमधील भूमिकांतून प्रेक्षकांच्या मनात विशेष स्थान निर्माण केले होते. मराठी आणि हिंदी चित्रपटसृष्टीतही त्यांनी आपल्या अभिनयाचा ठसा उमटवला होता.गेली काही वर्षे विलास उजवणे यांची अनेक आजारांशी झुंज सुरू होती. वर्षांपूर्वी त्यांना ब्रेन स्ट्रोक आला होता, ज्यामुळं त्यांच्या आरोग्यावर गंभीर परिणाम झाला.सहा वर्षांपासून त्यांनी ब्रेन स्ट्रोकशी झुंज दिली या आजाराशी दोन हात करता करता त्यांची संपूर्ण जमा पूंजी खर्च झाली होती. त्यातच त्यांना हृदयाचा त्रासही सुरु झाला होता. या सर्व गोष्टींना विलास तोंड देत असतानाच दोन वर्षांपूर्वी त्यांना कावीळ झाली होती. या काळात त्यांना आर्थिक मदतीची गरज होती. त्यांचं तात्काळ ऑपरेशन करणं गरजेचं होतं, उपचारांसाठी विलास यांना आर्थिक मदतीची गरज असल्याचं समोर आली होती.

इतकं होऊनही त्यांच्यात जगण्याची एक जिद्द होती. या आजारपणातून सावरत असतानाच, त्यांना हृदयविकाराचा त्रास जाणवू लागला अन् त्यांची प्राणज्योत मालवली.विलास यांचे मित्र राजू कुलकर्णी यांनी दोन वर्षांपूर्वी शेअर केलेली पोस्ट चांगलीच व्हायरल झाली होती. ‘हा राजा माणूस म्हणजे आमचा लाडका डॉक्टर मोठ्या अडचणीत सापडला आहे. गेली सहा वर्ष ब्रेन स्ट्रोकशी झुंज देणाऱ्या हा वाघ थोडा थकला आहे. अत्यंत साध्या सदनिकेत राहणारा हा कलाकार आपल्या आयुष्याची सर्व पुंजी या आजारांमध्ये खर्च करून बसला आणि ती रक्कम थोडी थोडकी नाही. चांगली सुधारणा होत आहे असं वाटत होचं, बाहेर पडत होता, कुठे परीक्षक तर प्रमुख अतिथी म्हणून उपस्थित राहून चाहत्यांना दिलासा देत होते. लवकरच आपली सेकंड इनिंग चालू करणार असं वाटत असताना नियती त्यांच्या पुढे दोन मोठ्या आजारांचे निष्ठुर दान टाकून निघून गेली.’