लॉजवरचे फोटो आईला पाठवतो, शरीरसुखाची मागणी करत दहावीतील मुलीवर अत्याचार, बारामतीत खळबळ.

दहावीत शिक्षण घेत असताना अल्पवयीन मुलीवर शारीरिक अत्याचार आणि विनयभंग करण्यात आला. जबरदस्तीने तिच्याशी मैत्री केली आणि तिला धमकी देऊन अनेकदा शरीरसंबंध ठेवले. फोटो व्हायरल करण्याची धमकी देऊन तिच्या आई व बहिणीस फोटो पाठवले. पीडितेने पोलिसांत फिर्याद दाखल केली असून तपास सुरू आहे.दहावीत असल्यापासून एका अल्पवयीन मुलीवर शारीरिक अत्याचार करण्यात आले. त्यानंतर ती पुढील शिक्षणासाठी लातूर येथे गेली असताना शरीरसुखाची मागणी करण्यात आली. तिने याकरिता नकार दिला असता तिचे खासगी फोटो तिच्या आई आणि बहिणीला पाठवण्यात आले. या प्रकरणी बारामती तालुक्यातील वडगाव निंबाळकर पोलीस ठाण्यात विश्वराज प्रताप गायकवाड (रा. करंजे, ता. बारामती) याच्या विरोधात विनयभंग, शारिरिक अत्याचारासह पोस्कोअन्वये गुन्हा दाखल करण्यात आला आहे. सदर प्रकरणी पीडित मुलीने फिर्याद दिली आहे.

पोलिसांकडून मिळालेल्या फिर्यादीनुसार १० मार्च २०२२ ते ३० मार्च २०२५ या कालावधीत हा प्रकार घडला. फिर्यादी ही सन २०२२ मध्ये सोमेश्वरनगरला दहावीत शिक्षण घेत असताना गायकवाड याने तिच्याशी जबरदस्तीने मैत्री केली. ती शिकवणी वर्गाला जात असताना १० मार्च २०२२ रोजी सायंकाळी चारच्या सुमारास त्याने तिला अडवले. तु मला खुप आवडते, माझे तुझ्यावर खुप प्रेम आहे, असे तो म्हणाला. फिर्यादीने त्यास नकार दिला. १२ मार्च २०२२ रोजी त्याने तिला काॅफी पिण्यासाठी चल असे म्हणत जबरदस्तीने स्कूटीवर बसवले.निरा-लोणंद रस्त्यावरील एका लाॅजवर तिला नेत तेथे तिच्या इच्छेविरुद्ध दोनदा तिच्याशी शरीरसंबंध ठेवले. याबद्दलची वाच्यता करू नको अशी धमकी देत तिला करंजेपूल येथे आणून सोडले. त्यानंतर पुन्हा दोन दिवसांनी त्याच लाॅजवर तिला नेत तिच्याशी शरीरसंबंध प्रस्तापित केले. ती अकरावी विज्ञान शाखेत शिकत असताना महाविद्यालयाच्या स्नेहसंमेलनावेळी त्याने त्याच्या मोबाईलमध्ये दोघांचे एकत्रित फोटो काढले.२०२४-२५ मध्ये ती नीट परीक्षेच्या अभ्यासाठी लातूर येथे गेली असताना त्याने तिच्या मोबाईलवर संपर्क साधत शरीरसुखाची मागणी केली. फिर्यादीने त्याला नकार दिला. त्यावर त्याने आपण लाॅजवर गेलो असताना तुझे नग्न फोटो मी काढले असून तु मला भेटली नाहीस तर मी ते व्हायरल करेन अशी धमकी दिली. तिच्या खोलीत राहणाऱ्या मैत्रिणीकडेही त्याने चौकशी केली. त्यानंतर तिची बहिण व आई या दोघींच्या मोबाईलवर त्याने फोटो पाठवले. या प्रकाराबाबत पिडीतेने कुटुंबियांशी चर्चा करून गायकवाड याच्या विरोधात फिर्याद दिली. पोलिस उपनिरीक्षक राहूल साबळे अधिक तपास करत आहेत.