अचानक चक्कर येऊन कोसळल्या अन् क्षणात सारं संपलं, साताऱ्यात महिला पोलिसाचा हार्ट अटॅकने मृत्यू.

साताऱ्यात एका महिला पोलिसाचा हार्ट अटॅकने मृत्यू झाला आहे. या महिला पोलिसाला चक्कर आल्याने तिला रुग्णालयात नेण्यात आले मात्र तिथे तिचा मृत्यू झाल्याचं डॉक्टरांनी सांगितलं.साताऱ्यात एका महिला पोलिसाचा हृदयविकाराच्या धक्क्याने मृत्यू झाल्याची धक्कादायक घटना घडली आहे. येथे कोयना बिनतारी संदेश यंत्रणा विभागात कार्यरत असणाऱ्या सत्वशीला सुहास पवार (वय ३७, रा. सातारा) या महिला पोलिस कर्मचाऱ्याचा हृदयविकाराने मृत्यू झाला. ही घटना साताऱ्यातील मलकापुरात गुरुवारी (३ एप्रिल) घडल्याची माहिती आहे.
गुरुवारी सकाळी सातच्या सुमारास सत्वशीला पवार यांना चक्कर आली. त्यामुळे त्यांना तात्काळ खासगी रुग्णालयात उपचारासाठी दाखल केले. मात्र, उपचारापूर्वीच त्यांचा मृत्यू झाल्याचे वैद्यकीय सूत्रांनी सांगितले आहे.

कऱ्हाड तालुक्यातील शहापूर हे माहेर आणि सातारा हे सासर असलेल्या सत्वशीला पवार या गेल्या वर्षीपासून कराड शहर पोलिस ठाण्यात कार्यरत होत्या.सद्यस्थितीत त्या कोयना बिनतारी संदेश यंत्रणा विभागात प्रतिनियुक्तीवर कर्तव्य बजावत होत्या, अशी माहिती आहे.यापूर्वी त्यांनी उपअधीक्षक कार्यालयात प्रतिनियुक्तीवर कर्तव्य बजावले होते. त्या मलकापूरमध्ये वास्तव्यास होत्या. आज सकाळी सातच्या सुमारास याच ठिकाणी त्यांना अचानक चक्कर आली. त्यानंतर त्यांना तातडीने एका खासगी रुग्णालयात उपचारासाठी दाखल करण्यात आले. मात्र, उपचारापूर्वीच त्यांचा मृत्यू झाल्याचे रुग्णालयात जाहीर करण्यात आले.

या दुर्दैवी घटनेनंतर त्यांची उत्तरीय तपासणी येथील वेणूताई चव्हाण उपजिल्हा रुग्णालयात करण्यात आली.त्यानंतर मृतदेह नातेवाइकांच्या ताब्यात देण्यात आला. साताऱ्यातील संगममाहुली येथे त्यांच्यावर शासकीय इतमामात अंत्यसंस्कार करण्यात आले. शहर पोलिस ठाण्याच्या पोलिस निरीक्षक वंदना श्रीसुंदर, सहायक पोलिस निरीक्षक श्रद्धा आमले, तब्बसुम शादीवान, सरिता जाधव यांच्यासह पोलिस अधिकारी, कर्मचारी उपस्थित होते. त्यांच्या मागे पती, मुलगा, मुलगी असा परिवार आहे. साताऱ्यातील क्षेत्र माहुली येथील स्मशानभूमीत पवार यांच्यावर अंत्यसंस्कार करण्यात आले.