सुतासारखे सरळ करणार, अजित पवारांचा बीडमध्ये थेट इशारा, मराठा आणि वंजारी वादावरही मोठे भाष्य.

 बीडच्या दौऱ्यावर असलेल्या अजित पवारांनी कार्यकर्त्यांसोबत संवाद साधून बीडमधील विविध गँगना सुतासारखे सरळ करण्याचा इशारा दिला. त्यांनी मराठा आणि वंजारी वादावर भाष्य केले. अजित पवार हे आज बीड दाैऱ्यावर असून अनेक बैठका ते यावेळी घेणार आहेत.उपमुख्यमंत्री आणि बीड जिल्हाचे पालकमंत्री अजित पवार हे बीडच्या दाैऱ्यावर असून ते अॅक्शन मोडवर दिसत आहेत. पक्षाच्या कार्यालयात जाऊन त्यांनी कार्यकर्त्यांसोबत संवाद साधला. बीडच्या पालकमंत्रिपदाची सूत्रे हातात घेतल्यानंतर दुसऱ्यांदा ते बीडमध्ये आहेत. अजित पवार हे बीडच्या दाैऱ्यावर असताना धनंजय मुंडे मात्र मुंबईतच आहेत. वैद्यकीय कारणामुळे आपण बीडमध्ये नसल्याचे सांगत त्यांनी सोशल मीडियावर एक पोस्ट शेअर केली. संतोष देशमुख हत्या प्रकरणानंतर धनंजय मुंडे यांनी मंत्रिपदाची राजीनामा दिला. अजित पवारांच्या खांद्यावर बीडच्या पालकमंत्रिपदाची जबाबदारी आहे.

अजित पवारांनी युवा संवाद मेळाव्यातून अनेकांवर निशाणा साधला. अजित पवार म्हणाले की, माझ्या कामाच्या पद्धतीत आणि इथल्या कामामध्ये खूप फरक आहे. बीडमध्ये वाळूची गँग, राखेची गँग अशा अनेक गँग आहेत. आता इथल्या या सगळ्या गँगला सुतासारखे सरळ करणार आहे, असे अजित पवारांनी म्हटले. एकप्रकारे त्यांनी बीडमधील सर्वच गँगला मोठा इशारा दिल्याचे बघायला मिळाले. यासोबतच बीडमधील मराठा आणि वंजारी वादावरही त्यांनी भाष्य केले.अजित पवार म्हणाले की, बीडकरांची बदनामी होणाऱ्या गोष्टी थांबल्या पाहिजेत. बीडमध्ये मराठा आणि वंजारी यांच्यात अनेकदा वाद दिसून आले आहेत.

जाती जातीतील दुरावा संपवायचा आहे. आपल्यालाच हा दुरावा संपवायचा असल्याचे दादांनी म्हटले. यासोबत कार्यकर्त्यांना आपले चरित्र स्वच्छ ठेवण्याचा सल्लाही अजित पवारांनी दिला. कार्यकर्ता घेत असताना त्याचे रेकॉर्ड बघा. सोशल मीडियावर तेढ निर्माण होईल, असा पोस्ट शेअर करू नका.अजित पवार म्हणाले, कोणत्याही परिस्थितीमध्ये दादागिरी खपवून घेतली जाणार नाहीये. समाजात एकोपा राहील असे काम झाले पाहिजे. अजित पवार हे बीडमध्ये दाखल होताच त्यांनी एसपींना धारेवर धरले. कार्यकर्ते हे मोठ्या संख्येने हेलिपॅडवर आल्याने अजित पवार संतापल्याचे बघायला मिळाले. तुम्ही यांना काहीच बोलत नसल्याचे म्हणत नाराज होऊन अजित पवार आपल्या गाडीमध्ये बसताना दिसले. अजित पवारांना पाहून कार्यकर्त्यांनी हॅलिपॅडवर गर्दी केली होती.