अचानक टायर फुटला, गाडी डिव्हायडरवर धडकली, कार २०० फूट लांब जाऊन पलटी; नागपुरात अंगावर काटा आणणारा अपघात.

नागपुरात एक भीषण अपघात घडला आहे. धावत्या कारचा टायर फुटल्याने चालकाचं कारवरील नियंत्रण सुटलं आणि कार थेट डिव्हायडरवर जाऊन धडकली. त्यानंतर ही कार २०० फूट लांब जाऊन पलटी झाली.नागपूर-अमरावती राष्ट्रीय महामार्गावरील धामणा उड्डाणपुलावर रविवारी रात्री एका कारचा भीषण अपघात झाला. कारचा पुढील टायर अचानक फुटला आणि कार पलटी होऊन २०० फूट दूर गेली. या अपघातात कार चालक गंभीर जखमी झाला असून त्याच्यावर रुग्णालयात उपचार सुरू आहेत. या अपघातात कार चालक अक्षय कठाणे (वय २७, रा. बडनेरा, अमरावती) हा गंभीर जखमी झाला असल्याची माहिती आहे. सुदैवाची बाब म्हणजे पुलावर लावलेल्या लोखंडी बॅरिकेडिंगमुळे गाडी पुलाखाली पडली नाही आणि मोठा अपघात टळला. अन्यथा मोठी दुर्घटना होऊ शकली असती.अक्षय कठाणे हे त्यांच्या कारने बडनेराहून नागपूरला येत होते. प्रवासादरम्यान धामणा उड्डाणपुलावर पोहोचताच त्यांच्या कारचा पुढील टायर अचानक फुटला.

त्यामुळे गाडीवरील त्यांचा ताबा सुटला आणि कार जाऊन डिव्हायडरला जोरदार धडकली. या धडकेनंतर कारचे आणखी दोन टायर फुटले आणि कार रस्त्याच्या दुसऱ्या बाजूला २०० फूट दूर जाऊन पडली. अपघात होताच आसपासच्या नागरिकांनी घटनास्थळी धाव घेतली आणि मदतकार्याला सुरूवात केली. माहिती मिळताच पोलिसांनी तातडीने घटनास्थळी पोहोचून परिस्थिती नियंत्रणात आणली. तसेच, गंभीर जखमी झालेल्या अक्षय यांना तत्काळ नागपूरच्या खासगी रुग्णालयात दाखल करण्यात आले.अपघाताच्या वेळी महामार्गावर इतर कोणतेही वाहन नसल्याने मोठी जीवितहानी टळली.

विशेष म्हणजे, उड्डाणपुलावर असलेल्या भक्कम लोखंडी बॅरिकेड्समुळे गाडी पुलाखाली येण्यापासून बचावली. बॅरिकेड्स नसते तर मोठी दुर्घटना घडली असती, असे घटनास्थळी उपस्थित नागरिकांनी सांगितले. अपघात होताच घटनास्थळी मोठी गर्दी झाली होती. त्यानंतर गंभीर जखमी झालेल्या अक्षयला नागपूर येथील खासगी रुग्णालयात दाखल करण्यात आले आहे. या अपघातामुळे महामार्गावरून प्रवास करणाऱ्या वाहनचालकांनी अधिक सतर्क राहण्याची गरज अधोरेखित झाली आहे. टायरच्या योग्य देखभालीसह वेगावर नियंत्रण ठेवणे आणि सुरक्षित अंतर राखणे अत्यंत महत्त्वाचे आहे, असे तज्ज्ञ सांगत आहेत.