सर्वांची काळजी घे! विद्यार्थ्याचा आईला मेसेज; पाचव्या मजल्यावरुन उडी, वाढदिवशीच जीवनाची अखेर.

उत्तर प्रदेशच्या प्रयागराजमध्ये ट्रिपल आयटीमध्ये बीटेकच्या पहिल्या वर्षात शिकणाऱ्या मुलानं आत्महत्या केली आहे. पाचव्या मजल्यावरुन उडी मारत राहुल चैतन्य मडला नावाच्या तरुणानं जीव दिला. तो मुलांच्या वसतिगृहात वास्तव्यास होता.लखनऊ: उत्तर प्रदेशच्या प्रयागराजमध्ये ट्रिपल आयटीमध्ये बीटेकच्या पहिल्या वर्षात शिकणाऱ्या मुलानं आत्महत्या केली आहे. पाचव्या मजल्यावरुन उडी मारत राहुल चैतन्य मडला नावाच्या तरुणानं जीव दिला. तो मुलांच्या वसतिगृहात वास्तव्यास होता. ३० मार्चला म्हणजेच स्वत:च्या वाढदिवशीच त्यानं जीवनप्रवास संपवला. आत्महत्या करण्यापूर्वी त्यानं आईला एक मेसेज केला होता. भावाची, कुटुंबाची काळजी घे, अभ्यासामुळे थोडा त्रासलोय, असं राहुलनं त्याच्या आईला पाठवलेल्या मेसेजमध्ये लिहिलं होतं.

राहुलनं पाचव्या मजल्यावरुन उडी घेत आयुष्य संपवलं. रात्री १२ च्या सुमारास घडलेल्या घटनेनं शिवपुरी वसतिगृहात खळबळ माजली. महाविद्यालय प्रशासनानं राहुलला रुग्णालयात दाखल केलं. पण डॉक्टरांनी त्याला मृत घोषित केलं. राहुल मंडला बीटेकच्या पहिल्या वर्षाचा विद्यार्थी होता. तो तेलंगणातील निजामाबादचा रहिवासी होता. तो मूकबधीर होता.पहिल्या शैक्षणिक वर्षाच्या पहिल्याच सेमिस्टरमध्ये राहुल अनुत्तीर्ण झाला. त्यामुळे त्यानं आत्महत्या केली असावी, अशी चर्चा महाविद्यालय आणि वसतिगृहात आहे. पहिल्याच सेमिस्टरमध्ये नापास झाल्यानं तो तणावाखाली होता. त्याचाच उल्लेख त्यानं आईला केलेल्या मेसेजमध्ये केला. ‘अभ्यासाचा ताण आहे. त्यामुळे आयुष्य संपवतोय,’ असं राहुलनं आईला केलेल्या मेसेजमध्ये लिहिलं होतं.राहुलचा मेसेज वाचून आईनं महाविद्यालयात फोन केला. राहुल ऐकू, बोलू शकत नव्हता. त्यामुळे तो कायम व्हिडीओ कॉल करुन खाणाखुणांनी संवाद साधायचा, असं राहुलच्या आईनं सांगितलं. ‘महाविद्यालयात प्रवेश घेताना तो ५२ व्या क्रमांकावर होता. त्यामुळेच त्यानं प्रवेश घेतला होता,’ अशी माहिती राहुलच्या आईनं दिली.राहुलच्या आत्महत्येनं त्याच्या कुटुंबाला जबर धक्का बसला आहे. राहुलची आई शवविच्छेदन केंद्राबाहेर बसून लेकाची आठवण काढून धाय मोकलून रडली. राहुलनं वाढदिवशीच आत्महत्या केली. दुसरीकडे राहुलच्या आत्महत्येनं नाराज झालेल्या महाविद्यालयीन विद्यार्थ्यांनी कँडल मार्च काढला. विद्यार्थ्यांना होणाऱ्या मानसिक त्रासामुळे तणाव वाढला आहे. याबद्दल महाविद्यालय प्रशासनानं पाऊल उचवावं, अशी मागणी विद्यार्थ्यांनी केली. या घटनेनं विद्यार्थ्यांवरील वाढत्या मानसिक ताणाचा विषय ऐरणीवर आला आहे.