ठाण्यात पुन्हा ‘उबाठा’ला धक्का, ठाकरेंच्या शिलेदाराचा शिंदे गटात प्रवेश; उपमुख्यमंत्र्यांच्या उपस्थितीत मोठी जबाबदारी.

उद्धव ठाकरेंच्या शिलेदाराने त्यांची साथ सोडून एकनाथ शिंदे यांच्या गटात प्रवेश केला आहे. त्यांना मोठी जबाबदारी देण्यात आली आहे.ठाण्यात शिवसेनेला (उद्धव बाळासाहेब ठाकरे) गळती कायम असून रविवारी नौपाडा येथील विभागप्रमुख प्रकाश पायरे यांनी उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. त्यामुळे ठाण्यात शिवसेनेला धक्का बसला असून पायरे यांच्यावर शिवसेना ठाणे शहरविधानसभा समन्व्यक म्हणून जबाबदारी सोपवण्यात आली आहे.नौपाडा परिसरात गेल्या १५ वर्षांपासून विभागप्रमुख म्हणून प्रकाश पायरे कार्यरत आहेत. त्यांनी एक टर्म ठाणे परिवहन समितीचे सदस्य म्हणून काम पाहिले असून नौपाडा, विष्णूनगर, गोखले रोड आणि प्रशांतनगर भागात त्यांचा दांडगा जनसंपर्क आहे. शिवसेनेतील फुटीनंतर पायरे यांनी उद्धव ठाकरे यांची साथ देत शिवसेना (उबाठा) पक्षात राहण्याचा निर्णय घेतला.

या काळात लोकसभा आणि विधानसभा निवडणुकीतील उमेदवार राजन विचारे यांचा प्रचारात तसेच विविध आंदोलनात पायरे आघाडीवर होते.मात्र पराभवानंतरही पक्षाच्या कार्यपद्धतीत बदल होत नसून येत्या काळात प्रभागाचा विकास डोळ्यासमोर ठेवून उपमुख्यमंत्री एकनाथ शिंदे आणि खासदार नरेश म्हस्के यांच्या नेतृत्वाखाली शिवसेनेमध्ये जाण्याचा निर्णय घेतल्याचे प्रकाश पायरे यांनी सांगितले. नववर्ष स्वागतयात्रा गोखले रोड परिसरात आल्यानंतर येथे उभारलेल्या मंचावर प्रकाश पायरे आणि त्यांच्या कार्यकर्त्यांचा प्रवेश सोहळा पार पडला.

यावेळी खासदार नरेश म्हस्के, परिवहन मंत्री प्रताप सरनाईक, माजी आमदार रवींद्र फाटक, ठाणे विधानसभा क्षेत्रप्रमुख हेमंत पवार, ठाणे शहर सचिव बाळा गवस उपस्थित होते.अवघ्या महिन्याभरापूर्वीच माजी नगरसेविका रागिणी बैरीशेट्टी यांच्यासह शिवसेनेचे (उबाठा) ओवळा – माजिवडा विधानसभा क्षेत्राचे उपशहरप्रमुख भास्कर बैरीशेट्टी, युवासेना चिटणीस सागर बैरीशेट्टी यांनी शेकडो कार्यकर्त्यांसह भाजपची वाट धरली होती. त्यानंतर पुन्हा प्रकाश पायरे आणि नौपाड्यातील ठाकरे गटाच्या पदाधिकाऱ्यांनी पक्षाला सोडचिट्ठी दिल्याने महिन्याभरात ठाकरे गटाला दुसरा झटका बसला आहे.